Referensi tu Parpunguan Hangoluan dohot Pangkobasion Na Laho Diparsiajari
6-12 FEBRUARI
ARTA NA ARGA NA ADONG DI BIBEL | JESAYA 47-51
”Mangoloi Jahowa Parohon Godang Pasupasu”
ip-2-IN 131 ¶18
Parohon Laba tu Hita do Angka PatikNa
Radoti ma Angka Patikki!
18 Marhite tondi parbadia, didok panurirang i ma, ”Disuru Tuhan Jahowa dohot Tondina i ahu. Songon on do hata ni Jahowa sipalua ho, na badia ni Israel: Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.” (Jesaya 48:16b, 17) Holong ni Jahowa sipaluanasida paposhon roha ni bangso Israel na paluahonon ni Debata do nasida sian Babel. (Jesaya 54:5) Dihalomohon Jahowa do asa mulak bangso Israel tu Ibana jala mangoloi parentaNa. Panombaon na sintong marojahan tu pangoloion tudutudu ni Debata. Ndang boi nasida mardalan di dalan na sintong molo ndang diajari taringot tu ’dalan na tama sidalanannasida’.
ip-2-IN 131 ¶19
Parohon Laba tu Hita do Angka PatikNa
19 Tangkas do disurat taringot sangkap ni Jahowa laho mangalinggomi angka naposoNa sian mara jala marlas ni roha, ”Aut na diradoti roham angka patikki, jala doshon batang aek hasonanganmu, jala hatigoranmu doshon galumbang ni laut. (Jesaya 48:18) Las do rohanta mambege hata on! (5 Musa 5:26; Psalmen 81:14) Sasintongna, boi do halak Israel ndang ditaban jala mangkilala hadameon songon batang aek. (Psalmen 119:165) Jala hatigoran ni nasida songon galumbang ni laut. (Amos 5:24) Disarihon Debata do bangso Israel, jala lambok do Jahowa paboahon tudutudu tu dalan na tama sidalanannasida. Aut sugari olo ma nasida manangihon!
ip-2-IN 132 ¶20-21
Parohon Laba tu Hita do Angka PatikNa
20 Pasupasu aha do di halak Israel molo muba nasida? Jahowa mandok, ”Jala doshon horsik di topi laut pinomparmu toropna, jala angka tubum songon rihit di topi ni batang aek; ndang tagamon ripur manang mago goarna maradophon ahu.” (Jesaya 48:19) Dipaingot Jahowa do nasida taringot tu janjiNa tu si Abraham, na bahenonNa godang pinomparna ”sobokkon bintang angka na di langit, jala sobokkon rihit, angka na di topi ni laut.” (1 Musa 22:17; 32:12) Alai, jotjot do pinompar ni si Abraham on mangalo Debata, umbahen ndang tama nasida manjalo janji i. Mansai godang do hajahaton na diulahon nasida. Hombar tu uhum ni Jahowa, tama do diripashon bangso i. (5 Musa 28:45) Alai, ndang olo Jahowa mangaripashon naposoNa, jala ndang olo Ibana manadingkon nasida.
21 Marlangku do prinsip on tu angka naposo ni Jahowa saonari. Jahowa do Mual ni hangoluan, jala Ibana do na umbotoan taringot tu parngoluonta sian manang ise pe. (Psalmen 36:10) Dilehon do tudutudu tu hita jala ndang na dokdok i. Ingkon dilului jala dijangkon halak Kristen na sintong do tudutudu ni Jahowa. (Mika 4:2) Tudutudu on mangondingi partondion dohot paralealeonta tu Debata, jala mangondingi hita sian elaela ni Sibolis. Molo taargai angka prinsip na gabe ojahan ni uhum ni Debata, tahilala ma na parohon laba tu hita do angka patikNa i. Taboto do ”ndada na dokdok patikna i.” Ndang na laho ripashononNa hita.—1 Johannes 2:17; 5:3.
MANGALULUI ARTA NA ADONG DI BIBEL | JESAYA 47-51
w07-IN 15/1 9 ¶8
Angka na Denggan sian Buku Jesaya—II
49:6—Songon dia do Messias gabe ’sinondang tu angka bangso’, hape holan satongkin do pangkobasionna tu halak Israel tingki di tano on? Messias gabe ’sinondang tu angka bangso’ marhite angka na masa dung hamatean ni Jesus. Surirang di Jesaya 49:6 marlangku tu angka sisean ni Jesus. (Ulaon ni Apostel 13:46, 47) Saonari on halak Kristen na miniahan dohot punguan na bolon ma na gabe ”sinondang tu angka bangso”, marhite paboahon hasintongan tu angka sude halak ”ro di ujung ni tano on”.—Mateus 24:14; 28:19, 20.
it-1-IN 502 ¶3-4
Parsirangan
Dibahen gabe gombaran. Dibahen do parsaripeon gabe gombaran di Bibel. (Jes 54:1, 5, 6; 62:1-6) Dibahen do muse parsirangan manang paulakkon tungganeboru gabe gombaran.—Jer 3:8.
Taon 607 SM ditaluhon ma harajaon Juda jala diropukhon ma huta Jerusalem. Ditaban ma angka rayatna tu Babel. Pigapiga taon andorang so masa i, nunga disurirangkon tu halak Jahudi, ”Didia do surat parsirangan ni inamuna, paboa naung hupaulak Ibana?” (Jes 50:1) Dipaulak pe ina ni nasida manang bangsonasida, ndang alani mangose padan Jahowa, alai nasida do na mangose parjanjian Hukum. Alai adong do pigapiga halak Israel na muba jala mangelehelek tu Jahowa asa boi muse mulak tu hutana dohot tu tungganedoli ni nasida i ma Jahowa. Marningot goarNa, dipaulak Jahowa ma bangsoNa i tu hutanasida di taon 537 SM, i ma ujung ni 70 taon na ditaban nasida, songon naung dijanjihon.—Ps 137:1-9; ida ma KAWIN, PERKAWINAN.
13-19 FEBRUARI
ARTA NA ARGA NA ADONG DI BIBEL | JESAYA 52-57
”Kristus Manaon na Porsuk Humongkop Hita”
w09-IN 15/1 25-26 ¶3-5
Naposo ni Jahowa—Na Tartullang ”Alani Pangalaosionta”
”Dileai” jala Dipasiding Jolma
3 Jaha Jesaya 53:3. Rimangi ma songon dia Anak ni Debata na sasada i manadingkon hangoluanna na sonang di lambung ni Amana jala tuat tu tano on laho mangalehon ngoluna gabe tobusan! (Plp. 2:5-8) Tobusan on manesa dosa ni angka jolma salelengna ala pelean na didok di uhum ni si Musa ndang marlangku salelengna. (Heb 10:1-4) Sasintongna ingkon dijangkon halak Jahudi do Jesus alana maimaima do nasida di haroro ni Mesias na dijanjihon. (Joh. 6:14) Alai ”dileai” jala dipasiding halak Jahudi do ibana songon na disurirangkon si Jesaya. Apostel Johannes mandok, ”Na ro do Ibana manopot na di Ibana hian, gabe ndang dijangkon angka na di ibana i Ibana.” (Joh. 1:11) Didok Petrus ma tu halak Jahudi, ”Na dipasangap Debata ni si Abraham, si Isak dohot si Jakkob, Debata ni angka amanta i do Jesus naposona i, na pinasahat jala na sinoadahonmuna di jolo ni si Latus na mandok uhumna, paluaon Ibana nian. Alai disoadahon hamu do na badia jala partigor i.”—Ul. 3:13, 14.
4 Disurirangkon si Jesaya do muse taringot Jesus na ”somal mangae pardangolan dohot sahit”. Saleleng di tano on, sipata loja do dihilala Jesus alai ndang hea didok ibana marsahit. (Joh. 4:6) Alai, jotjot do Jesus pajumpang dohot halak na marsahit tingki marbarita. Asi ma rohana tu nasida jala dipamalum ma godang halak. (Mrk. 1:32-34) Jadi digohi Jesus ma surirang na mandok, ”Tongon do angka sahitta diusung ibana, jala angka pardangolanta diporsan.”—Jes. 53:4a; Mat. 8:16, 17.
Hira na Dipungkul Debata
5 Jaha Jesaya 53:4b. Godang halak na mangolu di tingki ni Jesus ndang mangantusi aha do na mambahen parungkilon dohot hamateanna. Dirimpu nasida, na dipungkul Debata do ibana. (Mat. 27:38-44) Didok halak Jahudi do Jesus mangaleai Debata. (Mrk. 14:61-64; Joh. 10:33) Ndang pardosa Jesus manang na mangaleai Debata gariada mansai balga do holongna tu amana. Alani i, lam hansit do dihilala umboto na ingkon mate ibana jala didok mangaleai Debata. Nang pe songon i, dioloi ibana do Jahowa.—Mat. 26:39.
w09-IN 15/1 27 ¶10
Naposo ni Jahowa—Na Tartullang ”Alani Pangalaosionta”
”Songon Birubiru do Ibana na Tinogu tu Pamotongan”
10 Jaha Jesaya 53:7, 8. Tingki diida si Johannes pandidi Jesus ro, didok ibana ma, ”On do Birubiru ni Debata, na mamorsan dosa ni portibi on!” (Joh. 1:29) Tingki didok si Johannes Anak ni birubiru do Jesus, ra na diingot ibana do hata ni panurirang Jesaya na mandok, ”Songon birubiru do ibana na tinogu tu pamotongan”. (Jes. 53:7) Disurirangkon si Jesaya, ”Naung sineahonna [diusehon] i hosana tu hamatean.” (Jes. 53:12) Di borngin tingki diparentahon angka siseanna asa mambahen borngin parningotan, dilehon do anggur tu sampulu sada siseanna na marsihohot jala didok, ”Mudarhu do on, mudar parpadanan i, na niusehon humongkop torop, bahen hasesaan ni dosa.”—Mat. 26:28.
w09-IN 15/1 28 ¶13
Naposo ni Jahowa—Na Tartullang ”Alani Pangalaosionta”
”Torop ma halak pintoran ni naposongku”
13 Jaha Jesaya 53:11, 12. Taringot Naposo na pinillitNa, Jahowa mandok, ”Torop ma halak pintoran ni naposongku na tigor i marhitehite parbinotoanna.” Songon dia carana? Di ujung ni ayat 12 ma didok, ”Jala diondihon [naposo i] halak parjahat.” Saluhut pinompar ni si Adam mardosa manang didok ”parjahat”, alani i dijalo nasida ma ”upa tinuhor ni dosa” i ma hamatean. (Rom 5:12; 6:23) Alani i, ringkot do jolma dipadame tu Debata. Tangkas do dipaboa taringot songon dia Jesus padamehon jolma na mardosa i di Jesaya bindu 53 na mandok, ”Ampe tu ibana pinsangpinsang parhitean ni hasonanganta, jala binahen ni bugangna malum itahilala.”—Jes. 53:5.
MANGALULUI ARTA NA ADONG DI BIBEL | JESAYA 52-57
w06-IN 15/3 11 ¶2
Sada Tudosan na Mararga di Hita
Ise do ina ”na hol [manang, na so boi marianakhon]” si Sara na didok di surirang on, jala ise do anakna, si Isak? Dipaboa si Paulus do taringot tu si Sara manang ”borua na hol,” tungganeboru ni Debata manggombarhon organisasi ni Debata na di surgo. Didok do borua on hol alana andorang so ro Jesus, ndang adong dope angka ”anak” di tano on na dimiahi tondi parbadia. (Galatia 4:27; Jesaya 54:1-6) Alai, dung Pentakoste 33 M, dimiahi tondi parbadia ma sada punguan ni baoa nang borua na gabe ianakhon ni borua na di gombaran i. Angka anak sian organisasi on ma dibahen gabe anak ni Debata jala rap dohot Jesus gabe sitean Harajaon di padan na imbaru. (Rom 8:15-17) Sada sian ianakhon i, i ma si Paulus manurat, ”Alai Jerusalem na di ginjang i: I do boru mata i, jala i do ina di hita saluhutna!”—Galatia 4:26.
w05-IN 15/10 26 ¶3
Lam Serep ma Rohamu
Tiru ma Jahowa
3 Nang pe ndang tardodo hasangapon dohot habasaon ni Jahowa, alai ”manatap manonggor do mata ni Jahowa manatap sandok tano on humaliang, laho mangalehon gogo tu halak parroha na marsitiopan tu Ibana.” (2 Kronika 16:9) Jala aha do na diulahon Jahowa tingki mangida naposoNa na marmetmet ni roha alani godang sitaonon? Hira na ”marhabangsa” do Ibana marhite tondi parbadiaNa ”pangoluhon tondi ni halak na serep marroha dohot pangoluhon halak parroha na magopu.” (Jesaya 57:15) Alani i gabe boi ma nasida marlas ni roha manomba Ibana! Serep do roha ni Debata!
20-26 FEBRUARI
ARTA NA ARGA NA ADONG DI BIBEL | JESAYA 58-62
”Maningtingkon Taon Parasinirohaon sian Jahowa”
ip-2-IN 322 ¶4
Martunas ma Hatigoran di Sion
”Taon Parasinirohaon” ni Debata
4 Si Jesaya manurat, ”Songgop do tu ahu tondi ni Tuhan Jahowa, ala naung miniahan ni Jahowa ahu mamaritahon barita na uli tu halak na dangol, marsuru ahu pauliuli halak parroha na bojok, maningtingkon haluaon tu halak na tarhurung dohot tu halak na tarrante buha ni hurungan.” (Jesaya 61:1) Ise do na disuru laho mamaritahon barita na uli? Ra, na parjolo manggohi surirang on i ma si Jesaya na dimiahi Debata manurat barita na uli tu na ditaban di Babel. Alai, Jesus ma na godangan manggohi surirang on tingki diulahon ibana na didok si Jesaya taringot tu dirina. (Lukas 4:16-21) Jesus dimiahi tondi parbadia tingki tardidi laho paboahon barita na uli tu angka parlambok roha.—Mateus 3:16, 17.
ip-2-IN 326-327 ¶13-15
Martunas ma Hatigoran di Sion
13 Mulai Pentakoste 33 M, disuan Debata ma ”hariara hatigoran” na sarupa, di bangsoNa na imbaru na digoari ”Israel ni Debata” i ma angka halak Kristen na miniahan. (Galatia 6:16) Saleleng maratus taon, marparbue ma ”hariara” i gabe 144.000 laho pasangaphon Debata Jahowa. (Pangungkapon 14:3) Angka halak na parpudi sian ”hariara” on martunas mulai sian taon 1919 tingki dibahen Jahowa muse nasida boi mangulahon ulaon partondion. Ala dilehon godang sipanganon partondion, songon na mambahen harangan na gok hariara hasintongan na marparbue ma Jahowa.—Jesaya 27:6.
14 Huhut patorangkon taringot parkarejoan ni ”hariara” on, didok si Jesaya muse ”Jadi nasida ma paulihon angka naung leleng tarulang, angka naung tartaban di na robi, nasida muse pajongjongkon dohot paimbaruhon huta na tartaban, angka naung tarulang marsundutsundut.” (Jesaya 61:4) Marhite parenta ni raja Sirus sian Persia, dipaulak ma halak Jahudi na marsihohot sian Babilon laho pajongjongkon muse tembok Jerusalem dohot bagas joro naung leleng ditadingkon. Hombar do ulaon i tu ulaon na dipungka dung taon 33 M dohot 1919.
15 Di taon 33 M, mansai lungun do roha ni sisean ni Jesus ala ditangkup jala dipamate Jesus. (Mateus 26:31) Alai ndang lungun be rohanasida dung diida hehe Jesus. Jala dung songgop tondi parbadia tu nasida, gabe ringgas ma nasida marbarita na uli tu ”Jerusalem dohot di sandok Judea dohot di Samaria, sahat ro di ujung ni tano on.” (Ulaon ni Apostel 1:8) Dung i diulahon nasida ma muse panombaon na sintong. Suang songon i ma sian taon 1919, diurupi Jesus ma angka halak Kristen na miniahan laho paulihon muse ”angka naung tarulang marsundutsundut”. Saleleng marratus taon, ndang tolap angka pamimpin ni agama Kristen na so sintong laho mangajarhon parbinotoan na sintong taringot Jahowa; gariada diajarhon nasida angka adat na binahen ni jolma dohot angka ajaran na so sian Bibel. Dipaias halak Kristen na miniahan i do huria nasida sian angka hasomalan ni agama na so sintong asa tongtong adong panombaon na sintong. Jala dipungka nasida ma ulaon mamaritahon ”barita na uli i tu ganup bangso”.—Markus 13:10.
w12-IN 15/12 25 ¶5-6
Halak Silehan Marsada Manomba Debata na Sintong
5 Sungkunsungkun do ra angka halak taringot tu surirang di Jesaya bindu 61 na digohi tu huria Kristen. Dipaboa do di ayat 6 taringot angka halak na laho gabe ”malim ni Jahowa”. Alai ayat 5 paboahon taringot ”halak sileban” na rap karejo dohot ”angka malim”. Aha do lapatanna?
6 Angka ”malim ni Jahowa” i ma halak Kristen na miniahan na mandapot ”haheheon na parjolo” jala gabe ”malim ni Debata dohot Kristus do nasida, jala mangarajai rap dohot Ibana leleng ni na saribu taon i.” (Pgk. 20:6) Asing ni i, adong godang halak Kristen na marsihohot na marpangkirimon mangolu di tano on. Nang pe nasida rap karejo jala marsaor dohot angka halak na marpangkirimon tu surgo, dipatudos do nasida tu ”halak sileban”. Las do rohanasida mangurupi angka ”malim ni Jahowa” gabe ’pangula dohot tukang porlak anggur.’ Dohot do nasida manuan, mamupuk jala mamanen angka halak tingki marbarita. Tangkas ma, angka na miniahan dohot ’birubiru na asing’ rap mangalului jala mamparmahani halak na marroha birubiru jala na olo manomba Debata salelengna.—Joh. 10:16.
MANGALULUI ARTA NA ADONG DI BIBEL | JESAYA 58-62
w15-IN 1/7 13-14 ¶14-17
Patogu ma Paradeiso ni Partondion
14 Godang donganta naung matua na mangida hamajuon na binahen ni organisasi ni Debata di tano on. Diingot nasida do, najolo sada huria diradoti holan sahalak sintua. Molo najolo, sada negara holan diradoti sahalak sintua cabang ndang Punguan na Mangaradoti Kantor Cabang. Jala najolo, organisasi diradoti presiden lembaga Joujou Paboahon, ndang Punguan na Mangaradoti Organisasi. Jala, nang pe adong na mangurupi angka donganta baoa on, alai holan sahalak sintua do na mambahen haputusan di huria, di kantor cabang, dohot di liat portibi on. Dungkon taon 1970, dibahen ma hamajuon ndang be sahalak sintua na mambahen haputusan alai sada punguan ni sintua do.
15 Boasa dapotan laba organisasi sian hamajuon on? Alana hamajuon on marojahan sian pangantusion ni nasida na lam denggan tu Bibel. Umgodang do laba na didapot ni organisasi molo punguan ni sintua, ”silehonlehon” sian Jahowa na mambahen haputusan.—Eps. 4:8; Poda 24:6.
16 Pingkirhon ma pigapiga hamajuon na dibahen tu angka bukunta. Las do rohanta mangurupi angka jolma marhite angka buku tingki marbarita. Pingkirhon ma muse alat na baru laho pasarhon barita na uli. Songon, situs web jw.org na mangurupi gumodangan halak asa boi mandapot pangurupion na dihaporluhon. Sude hamajuon on, patuduhon na disarihon jala dihaholongi Jahowa do angka jolma.
17 Las do muse rohanta mangida hamajuon na dibahen di parpunguan, alana gabe adong ma tingkinta laho mambahen panombaon na sasaripe manang marsiajar Bibel sahalakta. Jala las do muse rohanta mangida hamajuon na dibahen tu parpunguan bolon. Sian taon tu taon, lam tu dengganna do parpunguan i! Mandok mauliate ma hita di sude pangajarion na tadapot sian singkola na marojahan tu Bibel. Sude hamajuon on, patuduhon Jahowa do na manguluhon organisasiNa jala dibahen Ibana do asa lam tu dengganna paradeiso ni partondion!
w07-IN 15/1 11 ¶5
Angka na Denggan sian Buku Jesaya—II
Sungkunsungkun sian Panjahaion Bibel:
61:8, 9—Aha do na didok ”padan salelenglelengna”, jala ise do ’pinompar’ i? On ma padan na imbaru di Jahowa dohot halak Kristen na miniahan. Pinompar manggombarhon birubiru na asing, i ma marjuta halak na manjangkon baritanasida.—Johannes 10:16.
27 FEBRUARI–5 MARET
ARTA NA ARGA NA ADONG DI BIBEL | JESAYA 63-66
”Langit na Imbaru dohot Tano na Imbaru Parohon Las ni Roha”
ip-2-IN 383 ¶23
’Marolopolop Ro di Salelenglelengna ala Ahu Manompa Angka i’
23 Buku Pangungkapon manggombarhon parnidaan ni apostel Johannes taringot tu ari ni Jahowa na laho ro, tingki diropukhon harajaon ni portibi on. Dung i, didabu ma Sibolis tu banua toru. (Pangungkapon 19:11–20:3) Didok si Johannes do muse songon naung sinurirangkon ni si Jesaya adong ”langit na imbaru dohot tano na imbaru”. Angka ayat na hombar tu parnidaan on paboahon tingki dipauba Jahowa tano on gabe inganan na dumenggan. (Pangungkapon 21:1, 3-5) Tangkas ma, na laho digohi do janji na disurat si Jesaya taringot ”langit na imbaru dohot tano na imbaru!” Di pamarentaon na imbaru, dihilala angka jolma na tading disi ma Paradeiso partondion dohot Paradeiso di tano on. Tarapul do rohanta mangingot janji na mandok, ”Ndang be ingoton angka na parjolo i [sahit, parungkilon dohot hasusaan na jotjot dihilala jolma] manang tarsunggul tu roha.” Ndang hansit be roha ni halak marningot naung salpu.
ip-2-IN 384 ¶25
’Marolopolop ma Ro di Salelenglelengna ala Ahu Manompa Angka i’
25 Saonari pe, dibahen Jahowa do Jerusalem gabe ”parolopolopon”. Songon dia carana? Songon naung taboto, langit na imbaru naung jongjong di taon 1914 manggombarhon 144.000 na dohot mamarenta sian surgo. Di surirang, digombarhon do nasida gabe ”Jerusalem na imbaru”. (Pangungkapon 21:2) Taringot Jerusalem na imbaru i, didok Debata do, ”Ahu manompa Jerusalem bahen parolopolopon, jala bangso isina i bahen las ni roha.” Marhite Jerusalem on ma Jahowa mangalehon marganda pasupasu tu angka jolma na mangoloi. Ndang adong be na mangangguhi manang morongorong, lehonon ni Jahowa ma sude na ’pinangido ni roha.’—Psalmen 37:3, 4.
w12-IN 15/9 9 ¶4-5
Hadameon Saribu Taon—jala Salelenglelengna!
’PAULIONNASIDA MA BAGAS JALA SUANONNASIDA ANGGUR’
4 Ise do na so olo rap mian dohot keluarga di jabu sandiri jala mangkilala hadameon? Saonari on, maol do mangalului jabu na denggan laho diingani. Godang halak tading di inganan na marsompitsompit. Adong do na tading di inganan na so ias manang di toru ni jembatan. Hira na so boi do godang halak maringanan di jabu na denggan.
5 Di Harajaon ni Debata, sude halak boi maringanan di jabuna sandiri. Disurirangkon si Jesaya do, ”Jala paulionnasida ma angka bagas, laos inganannasida, suanonnasida ma hau anggur jala panganonnasida parbuena.” (Jes. 65:21) Ndang holan marjabu sambing, alai hot do jabu i di nasida. Pigapiga halak saonari nunga marjabu jala adong do na balga jabuna. Alai mabiar do nasida sadihari ro panangko manang disita Bank. Alai ndang songon i di Harajaon ni Debata di tano on! Panurirang Mika manurat, ”Hundul be ma nasida di toru ni hau anggurna dohot di toru ni hau arana, jala ndang adong panonggoti.”—Mika 4:4.
MANGALULUI ARTA NA ADONG DI BIBEL | JESAYA 63-66
w07-IN 15/1 11 ¶6
Angka na Denggan sian Buku Jesaya—II
63:5—Songon dia rimas ni Jahowa mandongani Ibana? Tigor do rimas ni Jahowa. RimasNa i mangonjar rohaNa mambahen panguhuman na tigor.
w13-IN 15/6 25 ¶3-5
Oloi ma Poda ni Jahowa Manopa Hamu
CARA NI PANOPA MAMANGKE HUASONA
3 Tingki manggombarhon huaso ni Jahowa, Jesaya 64:8 mandok, ”Alai nuaeng ale Jahowa. Ho do amanami! Tano do ianggo hami, jala ho do sitompa hami, jala jadijadian ni tanganmu do hami sudena.” Lomo ni si Panopa do laho mambahen sitopaonna. Ndang boi tano liat i mamillit. Suang songon i ma angka jolma di jolo ni Debata. Ndang boi jolma manontuhon songon dia bahenon ni Debata tu ibana.—Jeremia 18:1-6.
4 Ditopa Jahowa do halak Israel najolo doshon sitopa hudon. Alai imbar do na diulahon Jahowa. Lomo ni sahalak do mambahen tano liat gabe hudon manang gunsi. Songon i do nang Jahowa? Lomolomo ni Jahowa do manopa halak manang bangso? Ndang. Diloas Jahowa do jolma mamillit na denggan manang na roa. Ndang dipangke Jahowa huasoNa laho mamaksa jolma mangoloi Ibana. Angka jolma do na mamillit, olo manang ndang nasida ditopa Jahowa.—Jaha Jeremia 18:7-10.
5 Songon dia molo ndang olo sasahalak ditopa Jahowa? Sala ni Jahowa do i? Rimangi ma aha na masa molo maol tano liat ditopa gabe hudon. Boi do topaon ni sitopa hudon i gabe gunsi manang na asing. Manang boi do dibolongkon! Somalna, sala ni sitopa hudon do molo ndang boi tano liat ditopa. Alai ndang songon i Sitopa hita. (5 Mus 32:4) Molo ndang olo sasahalak ditopa Jahowa, halak i do na sala. Marragam do cara ni Jahowa laho manopa jolma hombar tu pangalaho ni sasahalak. Halak na mangoloi Jahowa, doshon hudon na denggan. Songon halak Kristen na miniahan, didok do nasida ”angka ulaula siasian” na dibahen gabe ”ulaula tu na tama”. Alai halak na so mangoloi Jahowa, dibahen ma i gabe ”ulaula sirimasan angka na pinadiri tu hamagoan.”—Rom 9:19-23.