Igwa daw nin Nabubuhay sa Kahiwasan?
IGWA nin sarong tawo sa Massachusetts, E.U.A., na bilang kabtang kan saiyang trabaho aroaldaw hiniheling kun may nag-abot na mensahe. Aroaldaw, mayo man. Sa dakol nang taon na nakaagi, mayo nin nag-abot. Pero dayaday pa man giraray niang hiniheling, asin permi siang nabibigo. Dai daw sia gusto nin iba? Raot daw an saiyang makina sa pagsimbag sa telepono?
Dai man. Makina an hiniheling nia, pero iyan dai konektado sa telepono. Iyan computer na konektado sa dakulaon na elektronikong talinga na paitaas an direksion, paluwas sa satong kinaban, pasiring sa espasyo: sarong radyo teleskopyo. An tawong ini nagtatabang sa sarong grupo nin mga sientista sa pagpadara nin mga signal sa mga bitoon tanganing makaako nin mensahe hale sa intelihenteng mga extraterrestrial, mga linalang na nasa luwas kan satong kinaban.
An iba, kapareho nia, 30 anyos naman na naghihinanyog. Kan 1960 an astronomong si Frank Drake nagin an enot na tawo na naghinanyog paagi sa sarong radyo teleskopyo para sa mga senyal nin intelihensiang extraterrestrial. Magpoon kaidto, garo baga ibinugtak nin tawo an saiyang talinga sa espasyo. Mga 50 nang laen-laen na haloyan na pagsiyasat sa espasyo an ginibo.
An mga radyo teleskopyo sa bilog na kinaban nakiiba na sa paghanap—sa Pransia, Republika Pederal nin Alemania, Netherlands, Australia, Unyon Sobyet, Argentina, Estados Unidos, asin Canada. Arog kan sabi nin sarong tawo: “An SETI [pinahalipot kan Search for Extraterrestrial Intelligence na ginigibo nin tawo] nagigin arog kainternasyonal kan espasyo mismo.” An sarong simposium manongod dian nakaakit sa mga 150 sientista hale sa 18 nasyon na lakop sa limang kontinente.
Pero, an pinakaambisyosong proyekto nin SETI ilalansar sa 1992. An NASA, National Aeronautics and Space Administration kan Estados Unidos, nagpaplanong gumamit nin sarong makosog na bagong instrumento na magpapangyaring eksaminon nin durungan an minilyon na radio frequency. An paghanap pinaplanong lumawig nin sampulong taon sa kantidad na $90 milyones. Iyan magigin mga dies mil milyones na doble kahiwas sa gabos na pinag-iribang nakaaging mga paghanap.
Alagad kun an tawo naghahapot sa mahiwas na uniberso, “Igwa daw nin nabubuhay sa kahiwasan?” bako sanang pinakamodernong mga instrumento an kaipuhan nia tanganing manompongan an simbag. Sa dakol na paagi iyan sarong espirituwal na hapot. Sa paghanap sa simbag, ipinaheheling nin tawo an nagkapira sa pinakamamawot nia: an pagkatapos nin guerra, an pagkawara nin helang, tibaad pati an pagkaigwa mismo nin inmortalidad. Kaya darakulang bagay an nakataya. Alagad pakalihis nin dakol na siglo nin pag-isip-isip asin nin mga dekada nin paghanap, gurano karani an tawo sa simbag?