Mga Extraterrestrial—Pakanompong sa Simbag

KAN Pebrero 17, 1600, an sarong tawo na an ngaran Giordano Bruno sinolong buhay sa sarong plasa sa Roma, Italia. Taano? Ikinaanggot kan iglesya an saiyang mga isinurat. Kabilang sa ibang bagay, sia nagtokdo na dakol an kinaban na may nag-iistar sa uniberso. Kan ika-11 siglo, ideneklarar kan iglesya an doktrinang iyan, an pagigin dakol nin kinaban, na sarong erehiya. An pagtokdo kaiyan nangangahulogan nin kagadanan. Si Bruno nagadan.

Sagkod kan ika-19 siglo, an debate sa kun baga may buhay sa ibang kinaban ipinagpadagos sa laog nin relihiyon. Sa dakol na siglo, an mga namomoon sa relihiyon asin an mga sientista na nasa irarom kan saindang impluwensia nag-insister na an daga nasa sentro kan uniberso; na an uniberso linalang kan 4004 B.C.E.; asin iba pa.

Kaya bakong makangangalas na an dakol na sientista asin an iba pa kakadikit kan paggalang sa relihiyon. Alagad ta an resulta, dakol man an nawaran nin paggalang sa Biblia, sa paghona na iyan an ginikanan kan gabos nindang salang ideya. Ini harayoon sa katotoohan.

An Biblia dai nagsasabi na iyan reperensia sa siensia. Pero, noarin man iyan dai nasasala kun iyan nakakasambit manongod sa uniberso o sa ano pa man na sientipikong bagay. Halimbawa, dai noarin man sinasabi kan Biblia na an daga asin tawo iyo an sentro kan uniberso. Al kontraryo, ipinaheling kan pinasabngan na mga parasurat kaiyan an malinaw na pakamansay sa kun gurano kasadit nin tawo kun ikokomparar sa mahiwas na uniberso.—Salmo 8:3, 4.a

Kun siring, sono sa Biblia, igwa daw nin nabubuhay sa kahiwasan?

An Biblia Minasimbag

Sono sa Biblia, an buhay na extraterrestrial bako sanang nag-eeksister kundi nag-eeksister nin abunda. Iyan mas komplikado, mas kawiliwili, asin mas mapaniniwalaan kisa ano pa man na naimahinar nin mga ebolusyonista, mga parasurat nin osipon sa siensia, asin mga paragibo nin pelikula. Total, sa simpleng pagtaram an extraterrestrial saro na naghale sa luwas kan dagang ini asin sa atmospera kaiyan.

An mga sientista iniisip kun baga may mga nabubuhay na dai niato kayang maheling. Sinisierto sato kan Biblia na talagang nag-eeksister an siring na mga linalang. Alagad ta sinda bakong bunga nin ebolusyon. Kapareho nin gabos na buhay sa uniberso, sa ano man na porma, sinda gikan sa Burabod nin buhay, si Jehova Dios. Sia espiritung Persona, asin sia naglalang nin riniboribong ibang espiritung persona na manlaenlaen na klase: anghel, kerubin, asin serafin. Sinda may laen-laen na trabaho asin katongdan sa saiyang langitnon na organisasyon.—Salmo 104:4; Hebreo 12:22; Kapahayagan 19:14.

Ano Man an Buhay sa Ibang Planeta?

An nagkapirang maimpluwensia sa relihiyon nag-insister na an Dios dai malalang nin kinaban na mayo nin katuyohan asin na an gabos na maiistaran na kinaban seguradong may nag-iistar. Iyan daw an sinasabi kan Biblia? Bako. Ipinaririsa kan Biblia na harayo sa posibilidad na an Dios naglalang sa panahon na ini nin intelihenteng pisikal na mga linalang sa arin man na planeta apuwera kan sa sato. Taano man?

Kun talagang naglalang an Dios nin siring na mga persona, iyan ginibo nia bago nia linalang si Adan asin Eva. An mga personang iyan magsalang nagdanay na maimbod sa saindang Kaglalang, o kapareho ni Adan asin Eva, sinda nagkasala asin naholog sa pagkabakong sangkap.

Alagad kun sinda nagin bakong sangkap, nagkakaipo sinda nin parabalukat. Arog kan pagkasabi nin sarong parasurat: “An saro sinasabngan kan makatatakot na kaisipan na ini na kun Biyernes [an aldaw na ginadan si Jesu-Cristo], kada Biyernes, sa sarong lugar sa uniberso si Jesus ipinapako para sa mga kasalan nin iba.” Alagad ta iyan bakong Makakasuratan. Sinasabi sato kan Biblia na si Jesus ‘nagadan dapit sa kasalan nin makasaro sa gabos na panahon.’—Roma 6:10.

Ano kun nagdanay na sangkap an mga personang ini? Bueno, kan magkasala si Adan asin Eva, sinda nagrereklamo sa diretso nin Dios na maghade sa kinaban nin intelihenteng pisikal na mga persona. Kun may ibang planeta kan panahon na idto, sarong kinaban na pano nin intelihenteng pisikal na mga persona na nabubuhay na oroyon asin maimbod sakop kan paghade nin Dios, bako daw na inapod kutana sindang mga saksi tanganing magpatotoo na talagang epektibo an paghade nin Dios? Dai malilikayan an konklusyon na ini, ta naggamit na sia pati nin bakong sangkap na mga tawo bilang saksi nia sa mismong isyung iyan.—Isaias 43:10.

Kun siring, iyan daw nangangahulogan na linalang nin Dios an daing kabilangan na minilyon na aldaw (asin planeta kun igwa) na mayo nin katuyohan? Dai man. Mantang aram niato, kun kokonsideraron an pagigin pambihira ni Jesu-Cristo, na an daga iyo an solamenteng ineerokan na planeta sa uniberso ngonyan, asin mantang aram man niato na iyan sagkod lamang na mapapalaen bilang an planeta na dian ibinindikar kan Kaglalang an pagigin may diretso kan saiyang paghade, dai niato aram kun ano an natatagama sa ngapit.

Dai Kita Nagsosolo

Aroaldaw, taon-taon, an mga astronomo kan SETI daing ontok na naghahanap nin mga signal sa kalangitan hale sa intelihenteng buhay. Sa paghona ninda an saindang paghanap tibaad magsarong dekada pa, o tibaad magsarong siglo. Makangingisi ini! Inuubos ninda an saindang buhay, an saindang mga paglaom, asin an darakulang halaga nin kuwarta sa paghanap nin signal na inako na nin katawohan dakol nang siglo an nakaagi. Huli ta an Biblia mismo sarong mensahe hale sa Intelihensiang extraterrestrial, asin iyan superyor sa gabos na paagi sa mga signal na iniimahinar dawa kan pinakaoptimistikong sientista.—Helingon an kahon sa pahina 10.

Ano an reaksion nin katawohan sa solamenteng tunay na mensaheng extraterrestrial? Ano an reaksion nin mga tawo, sa kagabsan, sa Biblia? Dai ninda iyan iniintindi. Iyan tuyo nindang iinaaplikar nin sala para sa sadiri nindang ikararahay. Iniinsulto ninda an Nagpadara kaiyan paagi sa kadakoldakol na daing basihan asin superstisyosong mga katokdoan. Inaapod pa ngani ninda iyan na palsipikado asin dinideharan an mismong pag-eksister kan Nagpadara kaiyan. Siyempre, an satong Kaglalang dai nanggad naoogma sa reaksion nin katawohan. Pero, sia nagpadagos sa pagkomunikar. Paagi sa saiyang Tataramon, tinotokdoan nia an minilyon na tawo ngonyan sa mga dalan nin katoninongan. An mga tawong ini nagrerepresentar ki Jehova asin dinadara sa kinaban an saiyang mga pakikikomunikar. Alagad ta sadit na minoriya sana nin katawohan an naghihinanyog sa sainda. An kinaban sa kagabsan nagbibinongog.—Isaias 2:2-4; Mateo 24:14.

Alagad, makaoogma, an lambang saro sa sato puwedeng makikomunikar sa kadarudakulaing Persona sa uniberso, asin ini daing magastos na teknolohiya, daing haloyon na paghalat nin mga mensahe tanganing matulayan an kahiwasan. Puwede na kamong maghinanyog ngonyan paagi sa pag-adal sa saindong Biblia asin pagpatunay sa saindong sadiri kun baga iyan talagang hale sa Ginikanan na mas makapangyarihan sa tawo. Makasisimbag kamo paagi sa pamibi asin sa saindong pamumuhay. Dai kita nagsosolo. An satong Kaglalang nanunuga na “sia bakong harayo sa lambang saro sa sato.”—Gibo 17:27; helingon man an 1 Cronica 28:9.

Dai pa man sia natatapos sa pakikikomunikar sa katawohan. Sia nanuga na liliwaton nia nin bigla an dalagan kan kasaysayan kan kinaban, tanganing tapuson an dai mapogolan na pagdalagan nin katawohan pasiring sa paglaglag sa sadiri paagi sa biyong paglaglag sa dai nang paglaom na palakaw na ini nin mga bagay asin pagsalida dian nin gobyerno na sia an kaggibo, saro na talagang magtatrabaho para sa ikararahay nin gabos. (Daniel 2:44; Isaias 9:6, 7) Iyo, an masunod na komunikasyon hale sa kadarudakulaing extraterrestrial na Intelihensia nanunuga na dumatong sa porma nin aksion, bakong tataramon.—2 Tesalonica 1:6-9.

[Nota sa Ibaba]

[Kahon sa pahina 10]

An mga Mensaheng Linalaoman nin mga Sientista sa Saindang Paghanap nin Extraterrestrial na Intelihensia:

An Mensaheng Dai Ninda Iniintindi

*Puwedeng dai totoo, ta ini bako man na pambihira; posible an mga panloloko.

*Puwedeng mag-opresir nin edukasyon asin kan mga pakinabang hale sa minilyon na taon na kabatidan.

*Puwedeng magtokdo sato na likayan an nuklear na pagkatunaw asin an gabos na guerra.

*Puwedeng mag-opresir nin mga bolong sa mga helang asin pati sa kagadanan; an matatada na sana kagadanan gikan sa aksidente.

*Puwedeng tumapos sa ‘kosmikong kapungawan’ nin katawohan.

*Puwedeng imposibleng itradusir; kakaipuhanon an rinibo—tibaad minilyon pang—taon tanganing makasimbag asin makapakipag-olay.

*Ini gabos basado sa pagbanabana asin suposisyon.

An Tataramon nin Dios, an Biblia:

*Talagang hale sa extraterrestrial na Intelihensia na mas makapangyarihan sa tawo.—Isaias 55:9; 2 Timoteo 3:16.

*Talagang nagtatao sa presente nin edukasyon para sa minilyon, kaiba an mga pakinabang nin kadonongan na mas gurang pa sa uniberso.—Job 36:26; Salmo 103:14; Isaias 48:17; Kapahayagan 4:11.

*Talagang nagtotokdo nin katoninongan sa minilyon ngonyan mismo; an Autor kaiyan nanunuga na papagdanayon sagkod lamang an daga asin laglagon an mga naglalaglag kaiyan.—Salmo 104:5; Isaias 2:2-4; Kapahayagan 11:18.

*An Autor kaiyan ipinaheling nanggad an saiyang abilidad na paomayan an gabos na helang; sia nanunuga na tapuson an kagadanan asin paraon an mga epekto kaiyan, na itinatao an buhay na daing katapusan.—Lucas 7:22; Juan 20:30, 31; Kapahayagan 21:4.

*Ngonyan mismo an Autor kan Biblia “bakong harayo sa lambang saro sa sato.”—Gibo 17:27.

*Talagang madaling kamtan kan pamilya nin tawo. Iyan puwede niatong basahon ngonyan asin simbagon. An satong mga mensahe tolos-tolos na inaako.—Juan 17:3; 1 Tesalonica 5:17; 1 Pedro 3:12.

*An pagtubod niato sa nasasabi sa itaas basado sa ebidensia asin pangangatanosan.—Hebreo 11:1.

[Ritrato sa pahina 11]

Puwede kitang makikomunikar sa kadarudakulaing Persona sa uniberso