Siisay an Gustong Magin Milyonaryo?

AN SIMBAG garo baga: haros gabos. Asin an pinakamadaling paagi na magin siring​—sono sa popular na opinyon—​iyo an pagtama sa loteriya o taya sa putbol.a

Sa pagpanigo sa hilig nin dakol​—asin sa pagmawot sa ekstrang entrada na gikan sa mga loteriya—​an mga gobyerno magpoon sa Moscow sagkod sa Madrid, magpoon sa Manila sagkod sa Siudad nin Mejico, nag-iisponsor nin mga loteriyang pangobyerno na nag-oopresir nin mga premyo na sagkod sa sanggatos milyones na dolyar.

May nagkapira na talagang nagigin milyonaryo. An sarong Ingles 25 anyos nang naglillenar sa mga kupon sa pagtaya sa putbol bago sia nakatama sa dakulaon na premyo. Sa tayang 50 sentimos sa kuwarta nin Amerika, haros $1.5 milyones an ginana nia. Mas pambihira pa an ginana nin sarong babaeng taga-Nueva York, na nagin saro sa pinakadakula an ginana sa kinaban kan ganahon nia an $55 milyones sa loteriyang pangobyerno sa Florida.

Alagad ta an mga ini pambihira. Mas normal an kaso nin sarong nasa kasiyahan nang edad na eskribienteng Kastila na nagbakal nin tiket sa loteriya serosemana sa laog nin 30 taon. Minsan dai pa sia nin ginaganang darudakula, dai pa man giraray sia pinanluluyahan nin boot. “Permi akong naglalaom na manggana,” sabi nia. Siring man, an sarong lalaki sa Montreal, na inubos an sarong semanang suweldo sa sarong loteriya sa Canada, sinumaryo an punto-de-vista nin dakol kan ipaliwanag nia: “An mga loteriyang arog kaini iyo an solamenteng paagi na an saradit makapangangarap nin mas marahay na buhay.” Pero dai man sia nanggana.

Sa ibong kan lakop na popularidad nin mga loteriya, may saro pang klase nin paghuwego na nag-oorog an pagkapopular: pagtaya sa makina sa paghuwego na hinuhulogan nin sinsilyo. Minsan ngani dai nag-oopresir nin biglang kayamanan an sasaro an takyag na mga bandidong ini, iyan nagtatao sa nagtaya nin ora mismong oportunidad na ganahon an jackpot​—na tibaad dakula. Asin an mga iyan bako na sanang sa mga kasino. An nakadadarang mga kanta, nagkikilyab na mga ilaw, asin an paminsanminsan na taginting nin nagluluwas na mga sinsilyo nag-aanunsio kan lakop na presensia kaiyan sa dakol na kapihan, klab, restawran, asin hotel sa Europa.

Si Frances may edad nang balo na nag-iistar sa Siudad nin Nueva York. Mga duwa o tolong beses kada semana, minasakay sia nin duwa may kabangang oras sa awto pasiring sa Atlantic City, New Jersey. Pag-abot duman minalaog sia sa saro sa mga kasino kan siudad, asin dian mga anom na oras siang nagtataya sa mga makina sa paghuwego na hinuhulogan nin sinsilyo bago magpuli. “Dai ko aram an gigibohon ko kun mayo an Atlantic City,” an komento nia. “Aram mo, ini an kaogmahan mi, ini an ginigibo mi.”

Para sa iba, an paghuwego bako sanang kaalingan, pagdulag sa rutina nin aroaldaw, o pagprobar na yumaman. Sa kaso ninda iyan mahalaga​—kun bakong kaipuhan—​na kabtang nin buhay.

“Hugador ako ta nagugustohan ko an kaibang peligro,” an paliwanag ni Luciano, taga-Córdoba, España. “Dai ako nananarahotan,” an idinugang nia, “pero an totoo namomondo ako, asin iyan an dahelan na nagpoon akong magbingo. Dangan naghanap ako nin iba pang huwego. Masiramon an pagmate mo kun pano nin kuwarta an bulsa mo asin andam kang tumaya.” An saro pang bisyo na an paghuwego, na nawaran kan trabaho nia bilang direktor nin sarong kompaniya, hinapot kun baga naisip-isip na niang bayaan an bisyo nia. “Bayaan iyan?” an simbag nia. “Dai ko magigibo iyan. Iyan an sakong pagbuhay.”

Minsan ngani laen-laen an motibo, an mga hugador tunay na bakong minoriya. Poko mas o menus, an 3 sa 4 na adultong Amerikano naghuhuwego; arog man kaiyan an proporsion sa España, saro pang nasyon na pinagkatodan na an paghuwego. Asin dakulang negosyo an huwego. Pipira sanang industriyal na korporasyon sa kinaban an may taonan na benta na nakalalabi sa nakukua kan mga loteriya sa 39 nasyon.

Malinaw na makosog an pan-akit nin huwego. Alagad iyan daw dai nakaaanong pan-akit, o iyan daw may tinatagong mga peligro? An sarong suanoy na talinhaga nagpapatanid: “An naghihidale sa pagtipon nin kayamanan dai magdadanay na daing kasalan.” (Talinhaga 28:20) Totoo daw ini sa kaso kan mga gustong yumaman paagi sa paghuwego?

[Nota sa Ibaba]