Komunikasyon sa Ministeryong Kristiano

“Kaya paduman kamo asin gumibo kamo nin mga disipulo sa mga tawo kan gabos na nasyon.”—MATEO 28:19.

1. Anong sugo ni Cristo an nagpaparisa kan pangangaipo na magkomunikar?

AN SUGO ni Jesus, na kinotar sa itaas, nag-aatubang sato kan angat na makikomunikar sa mga tawo sa satong ministeryo mantang kita naghaharongharong, nandadalaw liwat, asin nakikikabtang sa gabos na iba pang kabtang kan paghuhulit kan Kahadean. Kaiba sa sugong iyan an paninimbagan na ipahayag an katotoohan manongod ki Jehova Dios, ki Jesu-Cristo, asin sa Mesiyanikong Kahadean na pinaghahadean ngonyan ni Jesus.—Mateo 25:31-33.

2. Tanganing epektibong makakomunikar, ano an kaipuhan niato?

² Paano kita makakapagkomunikar nin epektibo? Enot, kaipuhan na kita nagtutubod sa impormasyon na satuyang ikinokomunikar. Sa ibang pagtaram, kaipuhan na kita may marigon na pagtubod na si Jehova iyo an sarong tunay na Dios, na an Biblia talagang Tataramon nin Dios, asin na an Kahadean nin Dios iyo an solamenteng paglaom nin katawohan. Sa siring, an itinotokdo niato magikan sa puso, asin makukuyog niato an hatol ni Pablo ki Timoteo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasopog, na ginagamit an tataramon kan katotoohan sa tamang paagi.”—2 Timoteo 2:15.

Komunikasyon na Bakong Berbal

3-5. (a) Paano kita makakakomunikar dawa dai magtaram? (b) Anong mga eksperyensia an nagpapatunay kaini?

³ An komunikasyon parateng may kalabot na mga tataramon. Alagad, an totoo, kita nagkokomunikar sa mga tawo bago pa man kita magtaram sa sainda. Paano? Paagi sa satong hiro asin sa satong paggubing saka pag-alinyar. Kaidtong dakol nang taon an nakaagi an sarong misyonerong graduwado sa Watchtower Bible School of Gilead nagbibiyahe sa barko pasiring sa saiyang destino sa ibang nasyon. Pakalihis nin pirang aldaw sa dagat, an sarong estranghero naghapot saiya kun taano ta sia laen na marhay sa gabos na ibang pasahero. An misyonero nagkokomunikar nin bagay na nakaaapod nin atension—na sia may laen na mga pamantayan asin madaling dolokon—paagi sana sa saiyang itsura asin hiro-hiro. Ini nagtao nin marahay na oportunidad na an misyonero makapagpatotoo.

⁴ An saro man na tugang na babae na nagtitindog sa tinampo sa pag-alok nin mga babasahon sa Biblia sa mga minaagi hinuyuman an sarong babae na nag-agi harani saiya. An babaeng ini nagpoon na humilig sa hagyanan pasiring sa istasyon nin subway. Dangan nagbago an isip nia, binalikan an tugang, asin naghagad nin pag-adal sa Biblia. Ano an hinangaan nia? Minsan ngani dai sia inalokan nin babasahon sa Biblia, nag-ako sia nin makikatood na huyom sa Saksi na naghuhulit sa tinampo.

⁵ Ikatolong halimbawa: An sarong grupo nin hoben na mga Saksi nagkarakan sa restawran asin napangalas kan an sarong estranghero nagrani sa lamesa ninda asin binayadan an saindang kinakan. Taano ta ginibo nia iyan? Hinangaan nia an saindang hiro-hiro. Minsan dai nakaolay an estranghero, ikinomunikar kan hoben na mga Kristianong ini na sinda mga tawong matatakton sa Dios. Malinaw, paagi sa satong hiro-hiro, itsura, asin pagkamakikatood, kita nagkokomunikar bago pa man kita magtaram.—Ikomparar an 1 Pedro 3:1, 2.

An Pangangatanosan Kaipuhan sa Komunikasyon

6. Iilustrar kun paano an pangangatanosan napakahalaga sa komunikasyon.

⁶ Tanganing makakomunikar nin berbal sa mga tawo manongod sa maogmang bareta, kaipuhan na kita andam, bakong tanganing magtaram nin dogmatiko, kundi makipagrasonan sa sainda. Paorootro niatong nababasa na si Pablo nakipagrasonan sa mga hiningoa niang paabotan kan maogmang bareta. (Gibo 17:2, 17; 18:19) Paano niato maaarog an saiyang halimbawa? Bueno, huli sa naggagrabeng mga kamugtakan sa kinaban an iba tibaad nagdududa na sa pag-eksister nin makakamhan sa gabos asin mamomoton na Dios na nagmamakolog sa katawohan. Alagad puwede kitang mangatanosan sainda na an Dios may panahon para sa gabos na bagay. (Eclesiastes 3:1-8) Halimbawa, an Galacia 4:4 nagsasabi na kan dumatong an itinalaan na panahon nin Dios, isinugo nia an saiyang Aki digdi sa daga. Ini rinibong taon poon kan enot niang ipanuga na gibohon iyan. Siring man, pagdatong kan saiyang itinalaan na panahon, tatapuson nia an kasakitan asin karatan. Dugang pa, ipinaheheling kan Tataramon nin Dios na an Dios may makokosog na dahelan na itogot na magpadagos nin haloy an karatan. (Ikomparar an Exodo 9:16.) An pangangatanosan sa mga puntong ini, asin pagsuportar sa pangangatanosan na iyan paagi sa mga ilustrasyon asin marigon na pruweba sa Kasuratan, makatatabang sa mga sinsero na marealisar na an lakop na karatan dai magagamit na argumento na si Jehova dai nabubuhay o dai nagmamakolog.—Roma 9:14-18.

7, 8. Paano puwedeng makatabang sato an pangangatanosan na magkomunikar sa sarong Judiong Ortodokso?

⁷ Ipamugtak niato na mantang kamo naghaharongharong, an kagharong nagsabi saindo: “Judio ako. Dai ako interesado.” Ano daw an gigibohon nindo? An sarong tugang ibinabaretang sia mapanggana sa paggamit kan paaging ini: ‘Seguradong maoyon kamo sako na si Moises saro sa pinakadakulang propeta na ginamit nin Dios. Asin aram daw nindo na sinabi nia an nakatala sa Deuteronomio 31:29: “Naiisihan ko na pagkagadan ko . . . masuhay kamo sa dalan na manongod dian ako nagboot sa saindo; asin maabot sa saindo an kalamidad”? Si Moises tunay na propeta, kaya an saiyang mga tataramon seguradong maootob. Posible daw na iyan naotob kan isugo nin Dios an Mesiyas sa mga Judio asin iyan an dahelan na dai sia inako kan mga Judio? Posible na iyan an nangyari. Ngonyan kun siring kaini asin nasala sinda, dahelan daw iyan na kamo asin ako masala man kapareho ninda?’

⁸ Girumdomon man na an mga Judio nag-agi nin makuring kasakitan sa kamot nin Kakristianohan, partikularmente sa siglong ini. Kaya tibaad boot nindong sabihan an kagharong na mayo kitang kabtang dian. Halimbawa, tibaad boot nindong sabihon: ‘Aram daw nindo na kan nasa kapangyarihan si Hitler, binalga kan mga Saksi ni Jehova an pagsayuma niang magkaigwa nin koneksion sa mga Judio? Nagsayuma man sindang magsabing “Heil Hitler” asin maglingkod sa saiyang hukbo.”a

9, 10. Paano magagamit an pangangatanosan tanganing matabangan an saro na nagtutubod sa impiernong may kalayo?

⁹ Sa paghihingoang makikomunikar sa saro na nagtutubod sa impiernong may kalayo, puwede kamong mangatanosan na tanganing an saro magsakit nin daing sagkod sa impierno, kaipuhan na sia may inmortal na kalag. Siyempre maoyon an nagtutubod sa impiernong may kalayo. Dangan puwede nindong sambiton an tala manongod sa paglalang ki Adan asin Eva asin maboot na ihapot kun may narisa sia sa talang iyan nin ano man na pagkasambit sa inmortal na kalag. Sa pagpapadagos kan saindong pangangatanosan, puwede nindong darahon an saiyang atension sa Genesis 2:7, na dian sinasabi kan Biblia na si Adan nagin kalag. Asin mangnoha an isinabi nin Dios na magigin resulta kan kasalan ni Adan: “Sa ganot kan saimong lalauogon makakan ka nin tinapay sagkod na ika bumalik sa kabokabo, huli ta dian ka kinua. Huli ta ika kabokabo asin sa kabokabo ka man mabalik.” (Genesis 3:19) Kaya, si Adan na kalag nagbuwelta sa kabokabo.

¹⁰ Puwede man nindong darahon an atension sa bagay na sa tala nin Genesis mayo nin nasasambitan an Dios na daing katapusan na pagsakit sa impiernong may kalayo. Kan patanidan nin Dios si Adan na dai kumakan kan ipinangangalad na bunga, sia nagsabi: “Sa aldaw na kumakan ka kaiyan ika siertong magagadan.” (Genesis 2:17) Dai nin nasambitan na impiernong may kalayo! Kun an tunay na ibubunga nin kasalan para ki Adan, bakong kagadanan, ‘pagbalik sa kabokabo,’ kundi daing sagkod na pagsakit, huli sa hustisya bako daw na ini maninigong malinaw kutanang ipinaliwanag nin Dios? Kaya, an maingat asin maboot na pangangatanosan tibaad makatabang sa sinserong tawo na maheling an dai pagkakaoroyon kan saiyang paniniwala. Nungka logod na malingawan niato an halaga nin pagpukaw sa pangangatanosan kan tawo mantang dinadara niato sa iba an katotoohan kan Tataramon nin Dios.—Ikomparar an 2 Timoteo 2:24-26; 1 Juan 4:8, 16.

Mga Kuwalidad na Kaipuhan sa Epektibong Komunikasyon

11-13. Anong Kristianong mga kuwalidad an makatatabang sato na epektibong magkomunikar?

¹¹ Ngonyan, anong mga kuwalidad an kaipuhan na kultibaron niato tanganing ikakomunikar nin pinakaepektibo an mga katotoohan kan Kahadean? Bueno, ano an sinasabi sato kan halimbawa ni Jesus? Sa Mateo 11:28-30, mababasa niato an saiyang mga tataramon: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin magin sakong mga disipulo, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” Dian maheheling niato an saro sa mga liyabe kan kapangganahan ni Jesus sa pagkomunikar. Sia maboot asin mapakumbaba sa puso. Para sa mga tawong may matanos na puso sia nakagiginhawa. Si apostol Pablo nagtao man nin marahay na halimbawa, ta, arog kan sinabi nia sa kamagurangan na taga-Efeso, poon kan enot na aldaw na sia nagduman sa sainda, sia naglilingkod na garo oripon para sa Kagurangnan “na may dakulang kapakumbabaan nin isip.”—Gibo 20:19.

¹² Paagi sa danay na pagpaheling niato nin hababang boot asin kapakumbabaan nin isip, maririsa nin iba na kita man nakagiginhawa, asin mas pasil para sa sato na makikomunikar sa sainda. An ibang gawe posibleng magpalataw nin lanob sa pag-oltanan niato asin kan mga pinagmamaigotan niato na makakomunikar. Totoo, “yaon sa mga may hababang boot an kadonongan.”—Talinhaga 11:2.

¹³ Tanganing epektibong makatao nin impormasyon, kaipuhan man kitang magin mapasensia asin mataktika. Si apostol Pablo tunay na mataktika kan sia magpatotoo sa mga pilosopo na tiripon sa atubangan nia duman sa Bolod ni Marte. Iinatubang nia an maogmang bareta sa paagi na masasabotan ninda. (Gibo 17:18, 22-31) Kun boot niatong mapangganang makikomunikar sa mga nagdadangog sa sato, kaipuhan na kuyogon niato an hatol ni apostol Pablo sa mga taga-Colosas kan sia magsabi: “An saindo logod na pakikiolay danay na maboot, asin nungka na matabang; pag-adalan nindo kun paano an pinakamarahay na pakipag-olay sa lambang tawo na saindong manompongan.” (Colosas 4:6, The New English Bible) An pagtaram niato maninigo na perming nakawiwili. An siring na pagtaram magbubukas kan isip nin mga naghihinanyog sa sato, mantang an daing pag-iingat na mga komento magpapangyari na sirrahan ninda an saindang isip.

14. Paano an kalmado, garo sana nakikipag-olay na paagi makatatabang sato na magkomunikar sa iba?

¹⁴ Boot niatong humiro nin kalmado sa gabos na panahon. Ini nakatatabang na mapamugtak an boot kan mga naghihinanyog sa sato. An pagigin kalmado nangangahulogan nin dai pagigin galagang marhay na iyo na sana an magparataram. Imbes, paagi sa pagigin kalmado asin sa makikatood na mga hapot, tinatawan niato nin oportunidad an mga naghihinanyog sato na ipahayag an nasa boot ninda. Nangorogna kun kita nagpapatotoo sa impormal na madonong na dagkahon an kaolay niato na magtaram. Halimbawa, an sarong Saksi sarong beses nakataed sa eroplano an sarong pading Romano Katoliko. Sa laog nin labing sarong oras, daing pondo an paghapot kan Saksi sa padi nin mataktikang mga hapot, asin an padi, sa pagsimbag, iyo an nagparataram. Pero kan sinda magsuwayan, an padi nakakua na nin pirang publikasyon sa Biblia. An siring na mapasensiang paagi makatatabang sato na magibo an saro pang kinakaipuhan na kuwalidad, an empatiya.

15, 16. Paano makatatabang sato an empatiya na magkomunikar?

¹⁵ An empatiya nangangahulogan nin garo baga pagbugtak kan satong sadiri sa lugar nin iba. Lubos na nasabotan ni apostol Pablo an pangangaipo nin empatiya, arog kan maheheling sa isinurat nia sa mga taga-Corinto: “Minsan ako talingkas sa gabos na tawo, nagpaoripon ako sa gabos, tanganing makadara ako kan pinakadakol. Kaya sa mga Judio ako nagin siring sa Judio, tanganing ako makadara nin mga Judio; sa mga sakop kan katogonan ako nagin siring sa sakop kan katogonan, minsan ngani ako mismo bakong sakop kan katogonan, tanganing ako makadara kan mga sakop kan katogonan. Sa mga dai nin katogonan ako nagin siring sa dai nin katogonan, minsan ngani ako bakong dai nin katogonan sa Dios kundi sakop kan katogonan ki Cristo, tanganing ako makadara kan mga dai nin katogonan. Sa maluya ako nagin maluya, tanganing madara ko an maluya. Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira.”—1 Corinto 9:19-22.

¹⁶ Tanganing maarog si apostol Pablo sa mga bagay na ini, kaipuhan kitang magin mataktika, mapagmansay, asin mapagmasid. An empatiya matabang sato na ikomunikar an katotoohan sa mga naghihinanyog sa sato sono sa saindang pag-isip asin saboot. An librong Reasoning From the Scriptures nagtatao nin dakulang tabang sa bagay na ini. Darahon iyan permi sa ministeryo.

Pagkamoot—Sarong Pantabang sa Komunikasyon

17. Sa gabos na kuwalidad na Kristiano, arin an pinakamahalaga sa epektibong pagkomunikar kan katotoohan, asin paano iyan ipinaheheling?

¹⁷ An hababang boot, kapakumbabaan nin isip, pagpasensia, asin empatiya kaipuhan sa epektibong komunikasyon sa pagpaabot nin impormasyon. Alagad orog sa gabos, an daing kapasloan na pagkamoot makatatabang sato na magin mapanggana sa pagtaros sa puso nin iba. Si Jesus naherak sa mga tawo huli ta sinda “maniwang asin nagkakaralagalag siring sa mga karnero na mayong pastor.” Pagkamoot an nagpahiro ki Jesus na magsabi: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan.” (Mateo 9:36; 11:28) Huli sa pagkamoot niato sa sainda na boot man niatong paginhawahon an mga tawo asin tabangan sindang makalakaw sa dalan pasiring sa buhay. An mensahe niato mensahe nin pagkamoot, kaya isabi niato iyan sa mamomoton na paagi. An pagkamoot na ini nahahayag sa makikatood na paghuyom, sa kabootan asin pagkakalmado, sa pagigin maogma asin mainit.

18. Paano niato maaarog si Pablo, kun paanong inarog nia an Kagurangnan?

¹⁸ Sa bagay na ini si apostol Pablo marahay na paraarog sa saiyang Kagurangnan, si Jesu-Cristo. Taano daw ta mapanggana siang marhay sa pagpopoon nin sunod-sunod na kongregasyon? Huli daw sa saiyang kaigotan? Iyo. Pero huli man sa pagkamoot na saiyang ipinaheling. Mangnoha an mga pagpapahayag nia nin pagpadangat mapadapit sa bagong kongregasyon sa Tesalonica: “Kami nagin maboot sa tahaw nindo, arog kan pagmamahal nin nag-aaling na ina sa saiyang mga aki. Kaya, huli sa pagkaigwa nin pagkamoot sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” An pag-arog ki Pablo matabang sa sato sa satong mga paghihingoa na magkomunikar.—1 Tesalonica 2:7, 8.

19. Taano ta dai kita maninigong panluyahan nin boot huli sa teritoryong dai nag-aako?

¹⁹ Kun ginibo na niato an pinakamakakaya niato na magkomunikar asin nasudya kitang kamtan an minamawot na mga resulta, maninigo daw na panluyahan kita nin boot? Dai man. An mga Estudyante sa Biblia (na dating apod sa mga Saksi ni Jehova) kaidto nagsasabi na tanganing umako kan katotoohan, an mga tawo kaipuhan na magkaigwa nin tolong kuwalidad. Kaipuhan na sinda sadiosan, mapakumbaba, asin nagugutom. Dai niato malalaoman an mga tawong bakong sinsero, an mga bakong sadiosan, na umako sa katotoohan; ni malalaoman man niato an mga maabhaw o mapalangkaw na maghinanyog sa maogmang bareta. Saro pa, dawa kun an saro sadiosan asin mapakumbaba, bakong posible na akoon nia an katotoohan kun sia dai nagugutom sa espirituwal.

20. Taano ta perming masasabi na an satong mga paghihingoa dai nasasayang?

²⁰ Daing duwaduwa na an dakol na nanonompongan nindo sa saindong teritoryo kulang nin saro o duwa sa tolong kuwalidad na ini. Iyan man an eksperyensia ni propeta Jeremias. (Jeremias 1:17-19; ikomparar an Mateo 5:3.) Pero, nungka na nasasayang an satong mga paghihingoa. Taano ta dai? Huli ta ipinaiisi niato an ngaran asin Kahadean ni Jehova. Paagi sa satong paghuhulit asin sa mismong presensia niato, pinatatanidan niato an mga maraot. (Ezequiel 33:33) Asin nungka na lingawan na paagi sa satong mga paghihingoa na ikomunikar an katotoohan sa iba, pinakikinabang niato an satong sadiri. (1 Timoteo 4:16) Pinapagdadanay niatong marigon an satong pagtubod asin maliwanag an satong paglaom sa Kahadean. Saro pa, napagdadanay niato an satong integridad asin kun siring nakikikabtang sa pagpakangbanal sa ngaran ni Jehova Dios, na pinaoogma an saiyang puso.—Talinhaga 27:11.

21. Ano an masasabi bilang sumaryo?

²¹ Sa pagsumaryo: An komunikasyon iyo an epektibong pagtao nin impormasyon. An abilidad sa pagkomunikar kaipuhan, asin dakulang danyos an ibinubunga kun nawawara an komunikasyon. Naheling niato na si Jehova Dios asin si Jesu-Cristo an pangenot na mga parakomunikar asin na may isinugo si Jesu-Cristo na pinakapaagihan nin komunikasyon sa satong aldaw. Nasabotan man niato na sa satong pag-alinyar asin gawe-gawe, kita nagkokomunikar, na nagtatao nin mga mensahe sa iba. Nanodan niato na an pangangatanosan may mahalagang kabtang sa satong paghihingoa na magkomunikar sa mga tawo asin na tanganing epektibong makakomunikar, kaipuhan na kita magin hababa an boot asin mapakumbaba, magpaheling nin empatiya, magpasensia, asin, orog sa gabos, pahiroon nin puso na pano nin pagkamoot. Kun patataluboon niato an mga kuwalidad na ini asin aarogon an mga halimbawa sa Biblia, kita magigin mapangganang mga parakomunikar na Kristiano.—Roma 12:8-11.

[Nota sa Ibaba]

Ano an Isisimbag Nindo?

◻ Sa anong paagi na nagpopoon na an komunikasyon bago ikataram an sarong termino?

◻ Ano an pirang halimbawa nin komunikasyon paagi sa epektibong pangangatanosan?

◻ Anong mga kuwalidad an nagpangyari ki Jesu-Cristo asin ki Pablo na epektibong magkomunikar?

◻ Taano ta dai kita dapat na panluyahan nin boot kun haloy na umabot an mga resulta?