Pag-omaw sa Bagong Kinaban nin Dios na May Katalingkasan
“Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”—KAPAHAYAGAN 21:4.
1, 2. Siisay sana an makatatao nin tunay na katalingkasan, asin ano an manonodan niato sa Biblia manongod sa Saiya?
PINATUNAYAN nin kasaysayan an katotoohan kan isinabi ni propeta Jeremias: “Bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad.” Siisay sana an makagigiya nin tama sa lakad nin tawo? Si Jeremias nagpadagos: “Tanosan ako, O Jehova.” (Jeremias 10:23, 24) Iyo, solamente si Jehova an makatatao nin tunay na katalingkasan sa mga problemang nagdadamat sa pamilya nin tawo.
2 An Biblia dakol an halimbawa sa kakayahan ni Jehova na tawan nin katalingkasan an mga naglilingkod sa saiya. “An gabos na mga bagay na isinurat kaidto isinurat sa pagtokdo sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) An mga paghokom ni Jehova tumang sa falsong pagsamba isinurat man, asin an mga ini nagseserbing “pagpatanid sato na inabotan kan mga katapusan kan mga palakaw nin mga bagay.”—1 Corinto 10:11.
Pagkalda sa Saiyang Banwaan
3. Paano ipinaheling ni Jehova an saiyang kakayahan na kaldahon an saiyang banwaan sa Egipto?
3 An sarong halimbawa kan kakayahan nin Dios na hokoman an falsong pagsamba asin kaldahon an mga nag-ootob kan saiyang kabotan nangyari kan an saiyang banwaan kan suanoy na mga panahon oripon sa Egipto. An Exodo 2:23-25 nagsasabi: “An saindang pag-agrangay sa tabang daing ontok na nag-iitaas sa tunay na Dios huli sa kaoripnan. Pag-abot nin panahon dinangog nin Dios an saindang inagagha.” Sa makangingirhat na pagpaheling kan saiyang pagigin superyor sa falsong mga dios nin Egipto, pinaabotan kan Makakamhan sa gabos na Dios nin sampulong damat an nasyon na iyan. An kada damat sa pagsopog sa sarong dios nin Egipto, na ipinaheheling na sinda falso asin dai makatatabang sa mga Egipcio na nagsasamba sa sainda. Sa siring kinalda nin Dios an saiyang banwaan asin linaglag si Faraon asin an saiyang mga hukbo sa Dagat na Pula.—Exodo, kapitulo 7 sagkod 14.
4. Taano ta bakong inhustisya na gibohon nin Dios an saiyang mga paghokom tumang sa mga Cananeo?
4 Kan darahon nin Dios an Israel sa Canaan, linaglag an mga nag-eerok dian na nagsasamba sa demonyo asin an daga itinao sa banwaan nin Dios. Bilang Unibersal na Soberano, si Jehova may diretsong hokoman an marigsok na mga relihiyon. (Genesis 15:16) Asin manongod sa relihiyon na Cananeo, an Bible Handbook ni Halley nagsasabi: “An pagsamba sa . . . mga dios na Cananeo maluhong marhay na mga pagpangana; an saindang mga templo sentro nin mga bisyo. . . . An mga Cananeo nagsamba, paagi sa inmoral na pagpalabilabi, bilang relihiyosong rituwal, sa atubangan kan saindang mga dios; dangan, paagi sa paggadan sa saindang mga aking panganay, bilang atang sa iyo man sanang mga dios na ini. Garo baga, sa dakulang paagi, an daga nin Canaan nagin garo Sodoma asin Gomorra sa nasyonal na sokol.” Idinugang nia: “May diretso daw na magdanay pa an sibilisasyon na may siring kamakababaldeng ramog asin karingisan? . . . An mga arkeologo na nagkokotkot sa mga kagabaan nin mga siudad na Cananeo nagngangalas na dai sinda linaglag nin Dios nin mas amay pa kisa ginibo nia.”
5. Paano an pagkalda nin Dios sa saiyang suanoy na banwaan nagseserbing arogan para sa satong panahon?
5 An talang ini manongod sa paghiro nin Dios tumang sa falsong pagsamba, na kinakalda an saiyang katipan na banwaan, asin tinatawan sinda nin ipinanugang daga nagseserbing arogan nin mga bagay na maabot. Iyan nagtotokdo sa haranihon nang ngapit na roronoton nin Dios an falsong mga relihiyon kan kinaban na ini saka an mga nagsusuportar sa sainda asin palalaogon an saiyang modernong mga lingkod sa sarong bagong kinaban na may katanosan.—Kapahayagan 7:9, 10, 13, 14; 2 Pedro 3:10-13.
Tunay na Katalingkasan sa Bagong Kinaban nin Dios
6. Ano an pira sa makangangalas na mga katalingkasan na itatao nin Dios sa bagong kinaban?
6 Sa bagong kinaban, bebendisyonan nin Dios an saiyang banwaan kan gabos na makangangalas na kabtang kan katalingkasan na katuyohan nia para sa pamilya nin tawo. Magkakaigwa nin katalingkasan sa pan-aapi nin politikal, ekonomiko, asin falsong relihiyosong mga elemento. Magkakaigwa nin katalingkasan sa kasalan asin kagadanan, na an mga tawo may paglaom na mabuhay sagkod lamang sa daga. “An mga matanos magmamana kan daga, asin sinda mag-eerok dian sagkod lamang.”—Salmo 37:29; Mateo 5:5.
7, 8. Ano an maeeksperyensiahan sa pagkakamit liwat nin sangkap na salud sa bagong kinaban?
7 Dai mahaloy pakaponi kan bagong kinaban na iyan, an mga nag-eerok dian milagrosong ibabalik sa sangkap na salud. An Job 33:25 nagsasabi: “An saiyang laman magigin mas malomoy kisa kan sa aki; mabalik sia sa mga aldaw kan saiyang kosog sa pagkaaki.” Siring sa ipinanunuga kan Isaias 35:5, 6: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula magkukurahaw sa kaogmahan.”
8 Kamo na may mga pisikal na kamatean huli sa kagurangan o maluyang salud, imahinara an saindong sadiri sa bagong kinaban na nagmamata kada aga na makosog asin mabagsik. An saindong mga kurubot nasalidahan na nin pino, magayon na kutis—dai na kaipuhan an mga pampahid sa kublit. An saindong madiklom o butang mga mata ibinalik na sa sangkap na pakaheling—dai na kaipuhan an mga salming sa mata. Ibinalik na an lubos na pagdangog—iapon na an mga pantabang na makadangog. An pilay na mga tabay ngonyan makosog na asin bilog na—iapon na an mga sogkod, saklay, asin wheelchair. Mayo na nin helang—iapon na an gabos na bolong. Kaya, ihinuhula kan Isaias 33:24: “Mayo nin nag-eerok na masabi: ‘Naghehelang ako.’” Sinabi man nia: “Maaabot ninda an kaogmahan asin kagayagayahan, asin madulag an kamondoan asin pagtangis.”—Isaias 35:10.
9. Paano sagkod lamang na tatapuson an guerra?
9 Dai na iaatang an siisay man sa guerra. “Pinaoontok [nin Dios] an mga ralaban sagkod sa kaporoporohi kan daga. An arko saiyang binabari asin pinagpuputolputol an garod; an mga karro saiyang sinosolo sa kalayo.” (Salmo 46:9) An mga armas sa pakikilaban nungka pang itotogot kan Hade sa Kahadean nin Dios, si Cristo Jesus, na inaapod kan Isaias 9:6 na “Prinsipe nin Katoninongan.” Idinudugang kan bersikulo 7: “An kadakolan kan sa-prinsipeng pamamahala asin katoninongan magigin daing kasagkodan.”
10, 11. Ano an magigin kahulogan sa daga nin lubos na katoninongan?
10 Kanigoan na bendisyon para sa katawohan, asin sa dagang ini, na makatalingkas sa mga armas sa pakikilaban! Tara, sa presenteng panahon, an mga armas na ginamit sa nakaaging mga guerra nangagadan pa sa mga tawo. Sa sarong nasyon, an Pransia, labing 600 na mga eksperto sa paghale nin bomba an nagadan poon kan 1945 mantang hinahale an mga bomba na natada nin nakaaging mga guerra. An namamayo sa ahensia duman sa paghale nin bomba nagsabi: “May nakukua pa kaming maputok pang mga bala nin kanyon hale sa Pranko-Prusianong Guerra kan 1870. May mga danaw na pano nin nakaiilong mga granada kaidtong Guerra Mundial I. Paminsanminsan, an sarong paraoma na sakay nin traktora naliligidan an minang panlaban sa tangke kan Guerra Mundial II asin bum, tapos. Lakop an mga bagay na ini.” Kaidtong duwang taon na an nakaagi an The New York Times nagkomento: “Sa laog kan 45 taon poon kan matapos an Guerra Mundial II, [an mga grupong parahale nin bomba] hinalean an dagang [Pranses] nin 16 milyones na artillery shell, 490,000 na bomba asin 600,000 na mina sa irarom nin tubig. . . . Minilyon na acre an nakukudalan, patuhod an mga armas asin napalilibotan nin mga karatula na nagpapatanid: ‘Dai Pagkaptan. Iyan Nakagagadan!’”
11 Magigin laen na marhay an bagong kinaban! An gabos magkakaigwa nin marahay na istaran, abundang pagkakan, asin kapakipakinabang, matoninong na trabahong paggibong paraiso sa bilog na daga. (Salmo 72:16; Isaias 25:6; 65:17-25) Nungka pa na an mga tawo, asin an daga, bobombahon nin minilyon na paputok. An bagong kinaban na iyan an nasa isip ni Jesus kan sabihan nia an saro na nagpaheling saiya nin pagtubod: “Ika makakaibahan ko sa Paraiso.”—Lucas 23:43.
Panglobong Pagtotokdo Para sa Buhay
12, 13. Anong panglobong pagtotokdo an ihinula ni Jesus asin ni Isaias para sa satong panahon?
12 Kun an saro nakanonood manongod sa bagong kinaban nin Dios, nanonodan man nia na sa satong aldaw, si Jehova nagpaluwas nin lakop sa kinaban na kongregasyon na organisado para sa tunay na pagsamba. Iyan an magigin pinakasentro kan bagong kinaban, asin iyan ginagamit ngonyan nin Dios sa pagtokdo sa iba manongod sa saiyang mga katuyohan. An Kristianong organisasyon na ini naggigibo nin panglobong pagtotokdo na dai pa naheling kaidto an klase asin hiwas. Ihinula ni Jesus na ini gigibohon. Sinabi nia: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
13 Si Isaias nagtaram man manongod sa panglobong pagtotokdong ini: “Mangyayari sa huring kabtang kan mga aldaw [sa satong panahon] na an bukid kan harong ni Jehova [an saiyang pinamuraway na tunay na pagsamba] magigin marigon . . . asin an gabos na nasyon maturukad pasiring dian. Asin dakol na banwaan an maduruman asin masarabi: ‘Madia kamo, banwaan, asin magtukad kita sa bukid ni Jehova, . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.’”—Isaias 2:2, 3.
14. Paano niato mamimidbid an banwaan nin Dios ngonyan?
14 Kaya, an panglobong pagpatotoo manongod sa Kahadean nin Dios marigon na ebidensia na kita harani na sa katapusan kan maraot na palakaw na ini asin na harani na an tunay na katalingkasan. An mga nagdadalaw sa mga tawo dara an pano nin paglaom na mensahe manongod sa bagong kinaban nin Dios inaapod sa Gibo 15:14 na “sarong banwaan para sa . . . ngaran” nin Dios. Siisay an nagdadara kan ngaran ni Jehova asin nagtatao nin panglobong patotoo manongod ki Jehova asin sa saiyang Kahadean? An makasaysayan na rekord kan ika-20 siglo minasimbag: solamente an mga Saksi ni Jehova. Ngonyan sinda labi nang apat na milyon sa labing 66,000 na kongregasyon sa bilog na kinaban.—Isaias 43:10-12; Gibo 2:21.
15. Mapadapit sa politikal na mga gibo-gibo, paano niato mamimidbid an tunay na mga lingkod nin Dios?
15 An saro pang ebidensia na inootob kan mga Saksi ni Jehova an mga hula manongod sa paghuhulit kan Kahadean sinasabi sa Isaias 2:4: “Dadaragopdopon ninda an saindang mga minasbad na magin tarom nin arado asin an saindang mga budyak na magin mga sanggot. An nasyon dai mabingat nin minasbad tumang sa nasyon, asin dai na sinda mag-aadal sa pakilaban.” Kaya an mga naggigibo kan panglobong paghuhulit manongod sa Kahadean nin Dios dapat na ‘dai na mag-adal sa pakilaban.’ Sinabi ni Jesus na sinda dapat na “bakong kabtang kan kinaban.” (Juan 17:16) Ini nangangahulogan na kaipuhan sindang magin neutral sa politikal na mga gibo-gibo, na dai nakikikampi sa mga kontrobersia asin guerra kan mga nasyon. Siisay an bakong kabtang kan kinaban asin dai na nag-aadal sa pakikilaban? Liwat, an makasaysayan na rekord kan ika-20 siglo nagpapatotoo: solamente an mga Saksi ni Jehova.
16. Gurano kalubos kan panglobong pagtotokdo nin Dios?
16 An panglobong pagtotokdo kan mga Saksi ni Jehova magpapadagos minsan pakalihis na tapuson nin Dios an presenteng maraot na kinaban. Sinasabi kan Isaias 54:13: “An saimo gabos na aki magigin mga tawo na tinokdoan ni Jehova.” Magigin lubos na gayo an pagtotokdong ini kaya ihinuhula kan Isaias 11:9: “An daga mapapano kan kaaraman dapit ki Jehova kun paanong an tubig nakatatahob sa mismong kadagatan.” Kakaipuhanon an padagos na pagtotokdo bako sanang para sa mga makaliligtas sa katapusan kan daan na kinaban na ini asin para sa mga aki na tibaad mamundag sa bagong kinaban kundi siring man para sa binilyon na mabubuhay liwat sa pagbuhay liwat. Sa katapustapusi, an lambang tawo na nabubuhay sa ibabaw nin daga totokdoan na gamiton nin tama an saiyang libreng kabotan sa laog kan linderos kan mga pagboot nin Dios. An resulta? “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”—Salmo 37:11.
Dakulang mga Katalingkasan Ngonyan Pa
17. Ano an ipinagibo ni Moises sa suanoy na banwaan nin Dios?
17 Kan an suanoy na mga Israelitas palaog na sa Dagang Panuga, nagpahayag sa sainda si Moises asin nagsabi: “Tinokdoan ko kamo nin mga pagkukuyogon asin hudisyal na mga desisyon, siring sa ipinagboot sa sako ni Jehova na sakuyang Dios, tanganing siring an gibohon nindo sa tahaw kan daga na saindong padudumanan tanganing sadirihon iyan. Asin otobon nindo asin gibohon nindo iyan, huli ta ini kadonongan nindo asin pakasabot nindo sa atubangan kan mga mata nin mga banwaan na makadadangog sa gabos na pagkukuyogon na ini, asin sinda tunay na masarabi, ‘An dakulang nasyon na ini daing duwa-duwa na madonong asin may pakasabot na banwaan.’ Huli ta arin na dakulang nasyon an may mga dios na harani dian siring kan pagigin yaon ni Jehova na satuyang Dios sa gabos niatong pag-apod sa saiya?”—Deuteronomio 4:5-7.
18. Anong dakulang mga katalingkasan an minaabot ngonyan pa sa mga naglilingkod sa Dios?
18 Ngonyan an minilyon na nagsasamba ki Jehova palaog man sa dagang panuga—an bagong kinaban. Huli ta kinukuyog ninda an mga pagboot nin Dios, sia harani sa sainda asin sinda napapalaen sa gabos na ibang banwaan. Kinalda na sinda nin Dios sa falsong relihiyosong mga ideya, rasismo, salang paggamit nin droga, nasyonalismo, guerra, asin sa lakop na epidemya nin mga helang na ikinaoolakit sa pagdodorog. Dugang pa, sinararo nia sinda sa dai malalaglag na internasyonal na asosasyon nin magturugang paagi sa pagkamoot. (Juan 13:35) Dai sinda nahahadit sa ngapit kundi ‘nagkukururahaw sa kaogmahan huli sa marahay na kamugtakan kan puso.’ (Isaias 65:14) Kanigoan kadakulang mga katalingkasan an nakakamtan ninda ngonyan paagi sa paglilingkod sa Dios bilang Hade!—Gibo 5:29, 32; 2 Corinto 4:7; 1 Juan 5:3.
Pagkalda sa Iba sa Falsong mga Pagtubod
19, 20. Paano nakatatalingkas an mga tawo paagi sa katokdoan kan Biblia manongod sa kamugtakan nin mga gadan?
19 An dakol na nahulitan kan mga Saksi ni Jehova nakanonompong naman kan mga katalingkasan na ini. Halimbawa, sa kadagaan na ginigibo an pagsamba sa mga apoon, ipinaaaram nin mga Saksi ni Jehova sa iba na an mga gadan daing buhay saen pa man asin dai makadadanyar sa mga nabubuhay. Itinotokdo kan mga Saksi an Eclesiastes 9:5, na nagsasabi na “an buhay nakaaaram na sinda magagadan; alagad kun dapit sa mga gadan, mayo man lamang sinda nin pakaaram.” Ginagamit man ninda an Salmo 146:4, na nagsasabi na kun an tawo nagagadan “minabalik sia sa saiyang daga; sa aldaw na iyan an saiyang mga pag-isip napapara.” Kaya ipinaheheling kan Biblia na mayo nin impakto o inmortal na kalag na nambobolong o nagpapatakot sa mga buhay. Kun siring, dai kaipuhan na sayangon an pinagpagalan na kuwarta sa pagbayad sa mga serbisyo nin mga parasantiguwar o padi.
20 An siring na tamang kaaraman sa Biblia kinakalda an mga tawo sa falsong katokdoan manongod sa impiernong may kalayo asin purgatoryo. Kun nanonodan nin mga tawo an katotoohan kan Biblia na an gadan daing pakaaram, na garo torog nin nanok, dai na sinda nahahadit sa kun ano an nangyari sa saindang gadan na mga namomotan. Imbes, hinahalat ninda an makangangalas na panahon na isinabi ni apostol Pablo kan sia magsabi: “Magkakaigwa nin pagkabuhay liwat an mga matanos asin an mga bakong matanos.”—Gibo 24:15.
21. Sairisay an siertong makakabilang sa mga bubuhayon liwat, asin ano an posibleng magin reaksion ninda?
21 Sa pagbuhay liwat an mga gadan bubuhayon liwat sa sarong daga na sagkod lamang nang talingkas sa minanang Adamikong kagadanan. Sierto na kabilang sa mga bubuhayon liwat an mga aki na iinatang sa mga dios na Cananeo, arog ni Moloc, an mga barobatang iinatang sa mga dios na Aztec, asin an minilyon na iinatang sa dios nin guerra. Mapangangalas nanggad asin maoogma an dating mga biktimang idto nin falsong mga pagtubod! An mga binuhay na iyan puwede nang maogmang magsabi: “Saen an saimong mga sugod, O Kagadanan? Saen an saimong panlaglag, O Sheol?”—Oseas 13:14.
Hanapon si Jehova
22. Kun boot niatong mabuhay sa bagong kinaban nin Dios, ano an kaipuhan na girumdomon niato?
22 Boot daw nindong mabuhay sa matanos na bagong kinaban nin Dios, na duman may tunay na katalingkasan? Kun iyo, isapuso an mga tataramon sa 2 Cronica 15:2: “Si Jehova yaon sa saindo sagkod na kamo nasa saiya; asin kun sia hahanapon nindo, itotogot nia na sia makua nindo, alagad kun bayaan sia nindo babayaan man nia kamo.” Asin girumdomon na an saindong odok na mga paghihingoa na makanood manongod sa Dios asin mapaogma sia dai malilingawan. An Hebreo 11:6 nagsasabi na an Dios “iyo an parabalos sa mga maigot na naghahanap sa saiya.” Asin an Roma 10:11 nagsasabi: “Mayo nin nagtutubod sa saiya na mapapasopog.”
23. Taano ta maninigo niatong omawon an bagong kinaban nin Dios na may katalingkasan?
23 Natatanaw na an bagong kinaban nin Dios na may tunay na katalingkasan. Duman “an linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.” Asin “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” (Roma 8:21; Kapahayagan 21:4) Dangan an gabos na lingkod ni Jehova ititingag an saindang payo asin maogmang oomawon an bagong kinaban nin Dios na may katalingkasan paagi sa pagsabing, ‘Mabalos, Jehova, para sa tunay na katalingkasan sa katapustapusi!’
Ano an Isisimbag Nindo?
◻ Paano ipinaheling ni Jehova an saiyang kakayahan na kaldahon an saiyang banwaan?
◻ Magkakaigwa nin anong makangangalas na mga katalingkasan sa bagong kinaban nin Dios?
◻ Paano tinotokdoan ni Jehova an mga tawo para sa buhay?
◻ Ano an pirang katalingkasan na nakakamtan kan banwaan nin Dios ngonyan pa paagi sa paglilingkod ki Jehova?
[Ritrato sa pahina 10]
Ipinaheling ni Jehova an saiyang pagigin superyor sa falsong mga dios nin Egipto, na kinakalda an saiyang mga parasamba
[Mga ritrato sa pahina 12, 13]
Ngonyan, an tunay na mga lingkod nin Dios namimidbid paagi sa pag-otob sa saiyang panglobong pagtotokdo asin pagdara sa saiyang ngaran