An Saindong Gadan Nang mga Namomotan—Haen daw Sinda?

SI Alec laglag na gayo an boot. Sa laog nin sarong semana, nagadan an duwa niang amigo. An saro sainda, si Nevil, nagadan dahelan sa tama nin badil. An saro, si Tony, nagadan sa sarong aksidente sa awto. An mga hapot na dati dai nakariribok saiya ngonyan dinadamat an 14-anyos na aking lalaki na taga-Aprika del Sur. ‘Taano ta kaipuhan na magadan an mga tawo? Asin ano an nangyayari pagkagadan?’ an pigparaisip-isip nia.

Kan paduman sia sa lobong ni Nevil, si Alec odok na naglalaom na makakukua sia nin mga simbag sa mga hapot na ini. “Alagad,” nagirumdoman nia, “an padi binasa sana an sarong libro asin nagsabi na si Nevil nagduman sa langit. Dangan, sa may lolobngan, sia nagsabi na hinahalat niato an pagkabuhay liwat. Naribong ako. Kun si Nevil nasa langit, paano na sia maghahalat nin pagkabuhay liwat?”

Pagkahapon kan aldaw man sanang idto, si Alec nagduman sa lobong ni Tony. An rituwalistikong seremonya ginibo sa tataramon na dai nia masabotan. Minsan siring, an daing kontrol na mga hiro kan ibang nagtatarangis nakakombensir ki Alec na mayo man nin ikinataong karangahan. “Kan bangging idto,” an paliwanag nia, “grabe an pagkaaburido ko. Nanluluya ako asin ribaraw. Mayo nin makatao nin nakakokontentong mga simbag sa mga hapot ko. Sa kaenot-enoteng pangyayari sa buhay ko, talagang nagduda ako kun baga igwa nin Dios.”

Kada taon minilyon, arog ki Alec, an nagagadanan nin mga namomotan. “Sa bilog na kinaban,” an paliwanag kan 1992 Britannica Book of the Year, “50,418,000 an nagadan kan 1991.” Asin pira pang minilyon an nagadan magpoon kaidto? Imahinara an mga salog nin luha na pinabolos kan nagmomondong mga nabayaan! Dagdag pa sa saindang kamondoan an pagkaribaraw dahelan sa nagkakatumang na mga ideya manongod sa kagadanan.

Kaya dakol, arog ki Alec, an nadidisganar asin nagdududa kun baga igwa nin ano man na basihan para sa paglaom sa sarong buhay sa ngapit pagkagadan. Sono sa Encyclopedia of Religions, “sa gabos na panahon, an mapag-isip na mga tawo dai uminiba sa kadaklan, . . . na nagdududa kun paano an indibiduwal na kalag o buhay makaeeksister na siblag sa indibiduwal na hotok asin hawak.”

Interesante nanggad, inaako kan nasambitan na ensiklopedia na an relihiyosong teoriya dapit sa sarong inmortal na kalag na nag-eeksister na siblag sa hawak bakong suportado sa Biblia. Totoo, sa nagkapirang kabtang, an Biblia talagang nasasambitan an “kalag” nin tawo na minahale asin minabalik pa ngani sa sarong gadan na hawak, pero sa mga kamugtakan na ini an “kalag” ginagamit sa sentido nin “buhay,” na nawara o nakamtan liwat. (Genesis 35:​16-19; 1 Hade 17:​17-23) Mas parate, an terminong “kalag” ginagamit sa Biblia sa paglaladawan nin naheheling na mga linalang na may laman asin dugo, iyo, nabubuhay na mga linalang. (Genesis 1:20; 2:7) Kaya, an Biblia paorootrong nagsasabi na an kalag nagagadan. (Ezequiel 18:​4, 20; Gibo 3:23; Kapahayagan 16:3) An Tataramon nin Dios nagsasabi na oras na magadan an mga kalag, “mayo man lamang sinda nin pakaaram.”​—Eclesiastes 9:​5, 10.

Sa ibong na kampi, an Biblia igwang mga tala dapit sa nagadan na mga tawo na binubuhay liwat. Sa kaso ni Lazaro, ini nangyari pakatapos na sia apat na aldaw nang gadan. (Juan 11:​39, 43, 44) Alagad ano an mangyayari sa mga tawo na nagadan kaidto pang ginatos o rinibo nang taon an nakaagi? An linalaoman daw nindang buhay sa ngapit nagkakaipo na buhayon liwat nin Dios an iyo man sanang hawak ninda kan sinda magadan?

Dai. An siring na ideya bakong kaoyon sa nangyayari sa mga atomo na minabilog sa gadan na hawak. Pag-abot nin panahon, an iba sa iyo man sanang mga atomong ini sinusupsup nin mga tinanom na kinakakan man kan ibang linalang asin nagigin nang kabtang kan saindang hawak.

Nangangahulogan daw ini na mayo nin paglaom para sa mga tawo na haloy nang gadan? Dai. An Kaglalang kan satong mahiwason na uniberso igwa nin makangangalas, mayong sagkod na memorya. Sa saiyang sangkap na memorya, igwa sia kan kakayahan na isaisip an personalidad asin henetikong mga ugale nin siisay man na gadan na tawo na gusto niang girumdomon. Dugang pa, si Jehova Dios igwang kapangyarihan na maglalang liwat nin hawak na tawo na may eksaktong kodigo henetiko nin sarong tawo na nabuhay kaidto. Kaya man niang bugtakan iyan kan memorya asin personalidad kan saro na ginigirumdom nia, arog baga ki Abraham.

Haros duwang ribong taon pagkagadan ni Abraham, si Jesu-Cristo itinao an pag-asegurar na ini: “Na an mga gadan bubuhayon liwat minsan si Moises nagpahayag, sa kasaysayan dapit sa kilitis, kan apodon nia si Jehova na ‘an Dios ni Abraham asin Dios ni Isaac patin Dios ni Jacob.’ Sia Dios, bakong kan mga gadan, kundi kan mga buhay, huli ta sinda gabos buhay para sa saiya.” (Lucas 20:​37, 38) Apuwera ki Abraham, Isaac, asin Jacob, an minilyon na iba pang gadan na tawo buhay sa memorya nin Dios, na naghahalat kan madatong na pagkabuhay liwat. “Magkakaigwa nin pagkabuhay liwat an mga matanos asin an mga bakong matanos,” an pinatutunayan kan Biblia.​—Gibo 24:15.

Mga pirang semana pakalihis kan saiyang pagmondo, si Alec nakanompong kan mga simbag sa saiyang mga hapot. An saro sa mga Saksi ni Jehova nagsongko sa saiyang harong asin ipinaheling saiya an sinasabi kan Biblia manongod sa kagadanan asin manongod sa pagkabuhay liwat. Ini nakaranga ki Alec asin nagtao nin bagong kahulogan sa saiyang buhay.

Gusto man daw nindong makanood nin orog pa manongod sa basado sa Bibliang paglaom sa pagkabuhay liwat? Halimbawa, an kadaklan daw sa mga pagbuhay liwat mangyayari sa langit o digdi sa daga? Asin ano an kaipuhan na gibohon nin saro tanganing magkamit kan pag-oyon nin Dios asin makaeksperyensia kan kaotoban kan Saiyang mamuraway na panuga na an mga tawo puwedeng makaibanan giraray an mga gadan nang namomotan?