Bareta kan mga Parabalangibog kan Kahadean

Pakaabot sa Puerang mga Baryo sa Greenland

DAKOL nang dekada na ginagamit kan Mga Saksi ni Jehova an mga magasin na An Torrengbantayan asin Awake! sa paghuhulit kan maogmang bareta. Pinamumuraway kan mga babasahon na ini an kadonongan ni Jehova na ipinahahayag sa saiyang Tataramon, an Biblia. Binabantayan kaiyan an mga pangyayari sa kinaban na konektado sa hula kan Biblia, asin iinaaplikar kaiyan an rasonableng hatol kan Biblia sa presenteng mga problema.​—Santiago 3:17.

Kan 1994, an mga Saksi sa Greenland naggibo nin espesyal na paghihingoa na ialok an Torrengbantayan asin Awake! sa pinakadakol na tawong mapupuede. Durante kan tig-init, nag-areglo sinda na songkoon an iba sa pinakapuerang mga baryo sa Greenland. Sarong grupo nin mga parabalangibog kan Kahadean an nagbiahe sa sakayan nin labing 4,000 kilometros paamihanan sa solnopan na baybayon sagkod sa Qaanaaq (Thule), na naabot an nagkapirang komunidad sa pinakaporong amihanan kan globo. Nagpitong semana an saindang pagbiahe. Sa sirangan na baybayon, sarong mag-agom na Saksi an nakaabot sa baryo sa Ittoqqortoormiit asin sa kaenot-enote nalibot ninda iyan sa sistematikong paagi dara an maogmang bareta.

Amay kan taon na iyan, durante kan bulan nin Abril, 7,513 kopya kan Torrengbantayan asin Awake! an ikinapasakamot sa mga taga-Greenland. Nangangahulogan iyan na, sa promedyo, an kada saro sa 127 parahayag kan Kahadean nakapasakamot nin 59 magasin​—1 magasin sa kada 7 habitante. Kan bulan na idto, an Awake! nagtampok nin serye nin mga artikulo sa irarom kan tema sa tutob na “Breast Cancer​—Every Woman’s Fear.” An sarong Saksi, na nakapasakamot nin 140 magasin, nagwalat nin mga kopya kan Awake! na iyan sa sarong reporter sa telebisyon. Pakalihis nin duwang aldaw, sarong programa nin mga bareta sa telebisyon an nagtampok kan mga artikulo dapit sa kanser sa suso. An reporter ipinaheling sa kamera an magasin, na ipinaheheling an nagkapirang pahina mantang inoomaw nia an kualidad kan traduksion sa Greenlandico. Itinampok man nia an praktikal na mga suhestion na itinao kan Awake! bilang pangontrang pag-ataman sa salud.

An Saksi na enot na nakapasakamot kan mga magasin sa reporter ininterbio sa iyo man sanang programa sa telebisyon. Sinimbag nia an nagkapirang hapot manongod sa Mga Saksi ni Jehova asin nagtaram sia manongod sa mahiwas na pagwaras kan mga magasin sa bulan na idto. Nagkomento man sia dapit sa praktikal na kadonongan na yaon sa Biblia asin idinoon nia na an siring na rasonableng hatol makatatabang sato na makapanggana sa mga problema ngonyan.

An programa nagtapos paagi sa sarong interbio sa presidenta kan Greenlandic Cancer Society. Sinabi nia na dai pa sia noarin man nakaheling nin siring kagayon asin kamalaog na babasahon dapit sa temang ini sa saiyang lenguahe. Dangan inimbitaran nia an gabos na interesado sa tema dapit sa kanser sa suso na basahon an mga artikulo sa Awake! Sia nagsabi na igwa nin marahay na dahelan na magpasalamat sa Mga Saksi ni Jehova huli sa saindang inisyatiba.

Arog sa Greenland, an Mga Saksi ni Jehova sa bilog na kinaban padagos na naghuhulit kan maogmang bareta “sa gabos na linalang sa sirong nin langit.” (Colosas 1:23; Gibo 1:8) Paagi sa paggamit kan mga literatura sa Biblia, kaiba an Torrengbantayan asin Awake!, tinatabangan ninda an gabos na klase nin tawo na makapanggana sa mga problema sa presenteng aldaw patin tinatawan sinda nin paglaom sa mas marahay na ngapit.

[Mapa sa pahina 8]

(Para sa aktuwal na format, helingon an publikasyon)

Qaanaaq (Thule)

Ittoqqortoormiit

Nuuk (Godthåb)