Bareta kan mga Parabalangibog kan Kahadean

An Dating Magkaiwal Sararo Na sa Paglilingkod ki Jehova

“AN ENOT kong pakadangog manongod sa Mga Saksi ni Jehova kaidtong ako nagseserbisyo bilang armadong guardia sa Bosnia,” an paliwanag ni Branko.a

Si Branko nagguguardia sa sarong ospital kun saen binobolong an mga nalugadan. An saro sa mga doktor nag-aadal sa Biblia kaiba kan Mga Saksi ni Jehova, asin durante nin pambangging turno, ipinaliwanag nia ki Branko an dakol sa nanodan nia sa Biblia.

An mga nadangog ni Branko kan bangging iyan nakapahirong gayo sa saiya kaya tolos-tolos niang isinuko an saiyang mga armas. Huling nagmamawot na makanood pa nin orog, nakipaghelingan sia sa mga Saksi. Paghaloyhaloy, pakatapos na magbalyo sa ibang nasyon sa Europa, si Branko naghanap nin Kingdom Hall asin uminatender nin pagtiripon kan Yugoslavong kongregasyon kan Mga Saksi ni Jehova. Duman namidbid ni Branko si Slobodan.

Si Slobodan hale man sa Bosnia asin nagboluntaryo sa parehong guerra na siring ki Branko​—alagad sa ibong na lado. Si Slobodan nakilaban para sa mga Serbiano kontra sa mga Croata. Kan an duwa magkamidbidan, si Slobodan saro nang bautisadong Saksi ni Jehova. Inalok nia nin pag-adal sa Biblia si Branko, an dati niang kaiwal. Mantang an pag-adal nag-ooswag, si Branko nakanood nin orog manongod ki Jehova, asin an saiyang pagkamoot sa Dios nagtalubo. Nakapahiro ini ki Branko na idusay an saiyang buhay sa Kaglalang. Kan Oktubre 1993 sinimbolisaran nia an saiyang pagdusay paagi sa pagpabautismo sa tubig.

Paano nagin sarong Saksi ni Jehova si Slobodan? Binayaan nia an lugar nin ralaban sa Bosnia sa mas amay na panahon. Sia nakabasa nin nagkapirang publikasyon kan mga Saksi, alagad kaidto sanang an duwang Saksi sumongko sa saiyang harong sa pagpopoon nin 1992 na nagtalubo an saiyang interes sa Tataramon nin Dios. Siisay an nagsongko ki Slobodan, na nag-alok nin pag-adal sa Biblia kaiba nia? Idto si Mujo, na hale man sa Bosnia alagad nagdakula bilang sarong Muslim. Mantang nag-ooswag an pag-adal sa Biblia, si Mujo asin si Slobodan, na dating magkaiwal, nag-iibaiba sa kadikit na panahon aroaldaw tanganing magpakinosogkosogan sa pagtubod.

An guerra sa dating Yugoslavia guminadan nin ginatos na ribong tawo. Alagad si Branko, Slobodan, asin si Mujo ngonyan naglilingkod bilang pambilog na panahon na mga parahulit kan maogmang bareta na magkairiba sa sarong kongregasyon kan Mga Saksi ni Jehova. Napangganahan ninda an etniko asin rasyal na iriwal, asin ngonyan naghahanap sinda nin katoninongan mantang nagpapasakop sa Kaglalang, si Jehova.

Alagad ano an nagpangyari kan siring na mga pagbabago? An saindang pagkamoot ki Jehova, an saindang paggalang sa Biblia, asin an saindang pagigin galagang iaplikar an mga katotoohan kan Biblia sa saindang buhay. Siring sa sinasabi kan Banal na Kasuratan, “an tataramon nin Dios buhay asin mapuersa . . . asin nakamimidbid kan mga kaisipan asin pagmawot kan puso.”​—Hebreo 4:12.

[Nota sa ibaba]