Nakanompong Sinda nin Katoninongan sa Sarong Maribok na Kinaban

IPINAHEHELING kan tutob kan magasin na ini an sarong malaad na ralaban sa Bosnia asin Herzegovina. Puede daw na magkaigwa nin katoninongan sa siring na lugar? Makangangalas, an simbag iyo. Mantang an mga komunidad na Katoliko Romano, Ortodokso sa Sirangan, asin Muslim sa makaturotristeng nasyon na iyan nakikilaban para sa teritoryo, dakol na indibiduwal an naghihidaw sa katoninongan, asin may mga nakanompong na kaiyan.

An mga Djorem nag-erok sa Sarajevo, asin sinda Mga Saksi ni Jehova. Sa tahaw kan gabos na kariribokan sa siudad na iyan, nagin nang ugale ninda na songkoon an saindang kataraed tanganing ihiras sa sainda an maogmang bareta kan Kahadean nin Dios. (Mateo 24:14) Taano? Huling naaraman kan pamilyang Djorem na tunay an Kahadean na ini, na iyan natindog na sa kalangitan, asin na iyan an pinakamarahay asin solamenteng paglaom kan katawohan para sa katoninongan. An Mga Saksi ni Jehova may bilog na kompiansa sa inapod ni apostol Pablo na “maogmang bareta nin katoninongan.” (Efeso 2:17) Huli sa mga tawong arog ki Bozo asin Hena Djorem, dakol an nakanonompong nin katoninongan sa Bosnia asin Herzegovina.

Sarong Tunay na Katoninongan na Madatong

Dakol pa an masasabi manongod sa mga Djorem. Minsan siring, enot, pag-olayan niato an saro pang mag-agom na nagkaigwa nin kompiansa sa Kahadean nin Dios. An saindang ngaran Artur asin Arina. Sinda asin an saindang saradit pang aki dating nag-eerok sa sarong republika sa teritoryo kan dating Unyon Sobyet. Kan pumutok an guerra sibil, suminurog si Artur sa sarong lado. Minsan siring, dai nahaloy hinapot nia an saiyang sadiri, ‘Taano ta nakikilaban ako tumang sa mga tawong ini na dati kong kataraed?’ Huminale sia sa nasyon asin, pakalihis nin dakol na kadepisilan, nagdatong sa Estonia kaiba an saiyang pamilya na mga aki pa.

Kan nagbibisita sa St. Petersburg, si Artur nakatagbo nin Mga Saksi ni Jehova asin naghanga sa saiyang nanodan manongod sa Kahadean nin Dios. Kabotan ni Jehova na sa dai na nanggad mahahaloy an Kahadean nin Dios an magigin solamenteng pamamahala sa katawohan. (Daniel 2:44) Dangan an daga magigin matoninong na lugar, na mayo nang mga guerra sibil o internasyonal na iriwal. Si Isaias naghula manongod sa panahon na iyan: “Dai sinda magibo nin maraot o manraraot sa bilog na sakuyang banal na bukid; huli ta an daga mapapano nanggad kan kaaraman ni Jehova kun paanong an tubig nakatatahob sa mismong kadagatan.”​—Isaias 11:9.

Itinotokdo an paglaladawan kan pintor sa maabot na matoninong na dagang iyan sa sarong pantabang sa pag-adal sa Biblia na ipinaheling sa saiya nin sarong Saksi, sinabi ni Artur na dati siang nag-eerok sa sarong lugar na arog kaiyan. Minsan siring, ngonyan linalaglag iyan nin guerra sibil. Pagpuli sa Estonia, si Artur asin an saiyang pamilya dakol pang nanonodan manongod sa Kahadean nin Dios paagi sa pag-adal sa Biblia kaiba kan Mga Saksi ni Jehova.

Katoninongan sa Tahaw nin Kariribokan

An Salmo 37:37 nagsasabi: “Pagmasdan mo an daing kanawayan asin helingon mo an matanos, huli ta an ngapit kan tawong iyan magigin matoninong.” Sa katunayan, an katoninongan nin daing kanawayan asin matanos sa pagheling nin Dios bako sanang sa saiyang ngapit. Nakakamtan na nia iyan ngonyan mismo. Paano daw iyan posible? Horophoropa an eksperyensia nin sarong lalaki na an ngaran Paul.

Si Paul nag-eerok sa sarong harayong kampo nin mga dulag sa timog-solnopan na Etiopia, minsan ngani an totoo hale sia sa sarong kataed na nasyon. Sa saiyang pinaghalean na nasyon, nakatagbo sia nin saro sa Mga Saksi ni Jehova na nagtatrabaho sa sarong kompaniya nin krudo, asin tinawan sia kan lalaking ini nin sarong pantabang sa pag-adal sa Biblia, An Katotoohan na Minagiya Pasiring sa Buhay na Daing Sagkod.a An Saksi dai na noarin man natagboan liwat ni Paul, alagad maingat niang pinag-adalan an libro. Napaduman sia sa kampo nin mga dulag sa Etiopia huli sa guerra sibil, asin duman ipinakipag-olay nia sa iba an manongod sa saiyang nanodan. Inako ini nin sarong sadit na grupo bilang an katotoohan. Basado sa saindang nanodan, dai nahaloy naghuhulit na sinda sa iba duman sa kampo.

Nagsurat si Paul sa opisina prinsipal kan Watch Tower Society na nagpapatabang. An sarong ministro na sinugo hale sa Addis Ababa napangalas na manompongan an 35 katawo na naghahalat sa saiya, na andam na makanood nin dakol pa manongod sa Kahadean nin Dios. Ginibo an mga areglo na makatabang nin regular.

Paano masasabi na an mga tawong arog ki Paul igwa nin katoninongan? Bakong magian an saindang buhay, alagad may pagtubod sinda sa Dios. Kun naaapektaran kan kariribokan sa kinaban na ini, iinaaplikar ninda an hatol kan Biblia: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” Bilang resulta, yaon sa sainda an pagkakontento na bihira ngonyan. Aplikado sa sainda an mga tataramon ni apostol Pablo sa kongregasyon sa Filipos: “An katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” Tunay nanggad, nakamamate sinda nin dayupot na relasyon ki Jehova, “an Dios nin katoninongan.”​—Filipos 4:​6, 7, 9.

Katoninongan Ngonyan

An natutukaw nang Hade sa Kahadean nin Dios iyo si Jesu-Cristo, na inaapod sa Biblia na “Prinsipe nin Katoninongan.” (Isaias 9:6) Dapit sa saiya an propeta kan suanoy nagsabi: “Sia magtataram nanggad nin katoninongan sa mga nasyon; asin an saiyang pamamahala magigin paghale sa dagat sagkod sa dagat asin paghale sa Salog sagkod sa mga kasagkodan kan daga.” (Zacarias 9:10) An ipinasabong na mga tataramon na arog kaini nagkaigwa nin hararom na epekto sa buhay nin sarong lalaki na an ngaran Jose.

May panahon na si Jose nabilanggo. Sia sarong terorista asin naarestar mantang nag-aandam na paputokon an sarong kuartel nin mga pulis. An paghona nia kadahasan sana an makapupuersa sa gobyerno na pakarhayon an mga kamugtakan sa saiyang nasyon. Mantang sia nabibilanggo, an Mga Saksi ni Jehova nagpoon na pag-adalan an Biblia kaiba kan saiyang agom.

Pakaluwas ni Jose, sia nag-adal man sa Biblia, asin dai nahaloy an mga tataramon sa Salmo 85:8 nagpoon na umaplikar sa saiya: “Dadangogon ko an itataram kan tunay na Dios na si Jehova, ta sia magtataram nin katoninongan sa saiyang banwaan asin sa saiyang mga maimbod.” Minsan siring, an bersikulong iyan minatapos na may patanid: “Dai logod sinda bumalik sa pagsarig sa sadiri.” Huli kaini, an saro na nagmamawot kan katoninongan ni Jehova dai mangangahas na humiro na independiente o kontra sa Saiyang kabotan.

Ngonyan, si Jose asin an saiyang agom Kristiano nang mga ministro. Ginigiyahan ninda an iba sa Kahadean ni Jehova bilang an solusyon sa mga problema na prinobaran kaidto ni Jose na resolberan nin mga bomba na sadiri niang gibo. Sinda andam na manarig sa Biblia, na nagsasabi: “Si Jehova, sa saiyang kabtang, magtatao kan marahay.” (Salmo 85:12) Iyo nanggad, dai pa sana nahahaloy sinongko ni Jose an kuartel na plinano niang gabaon. Taano? Tanganing ipakipag-olay sa mga pamilya duman an manongod sa Kahadean nin Dios.

Matoninong na mga Tawo

Sa Salmo 37:​10, 11, an Biblia nagsasabi: “Dai na mahahaloy, asin ta an mga maraot mawawara na; asin hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” Kanigoan kamamuraway na paglaom!

Minsan siring, mangnoha na an katoninongan ni Jehova para sana sa “mga mahoyo.” An mga nagmamawot nin katoninongan tibaad kaipuhan na makanood na magin matoninong. Ini an nangyari ki Keith, na taga-New Zealand. Si Keith sinasabing “makosog an hawak asin personalidad, agresibo, asin parapakiargumento.” Saro siang miembro nin gang asin nag-istar sa sarong harong na talagang masasabing kuta, na may mga hardin na tolo an bantay na ayam tangani na daing makalaog. An saiyang agom, an ina kan saiyang anom na aki, diniborsio sia.

Kan makatagbo si Keith nin Mga Saksi ni Jehova, an maogmang bareta nagkaigwa nin hararom na epekto sa saiya. Dai nahaloy sia asin an saiyang mga aki nag-aatender na sa mga pagtiripon kaiba kan mga Saksi. Pinutolan nia an saiyang buhok na sagkod sa habayan an laba asin nagpoon siang ipakipag-olay sa saiyang dating kairiba an manongod sa Kahadean nin Dios. An iba kaini nagpoon man na mag-adal sa Biblia.

Arog kan minilyon na matanos an puso sa bilog na kinaban, pinonan ni Keith na iaplikar an mga tataramon ni apostol Pedro: “Sia na mamomoot sa buhay asin makaheheling nin marahay na mga aldaw, . . . rumayo sia sa maraot asin gumibo sia nin marahay; hanapon nia an katoninongan asin gibohon iyan.” (1 Pedro 3:​10, 11) An dating agom ni Keith nag-oyon na magpakasal liwat sa saiya, asin sia ngonyan nag-aadal nang ‘hanapon an katoninongan asin gibohon iyan.’

An katoninongan ni Jehova nagin paraligtas nin buhay para sa dakol, kabale an sarong dating atleta na namundag sa dating U.S.S.R. An lalaking ini nanggana nin mga medalya sa karawat Olimpiko, alagad sia nagin disganado saka nagdroga asin nagin parainom. Pakalihis nin pano nin pangyayaring 19 taon na kabale an tolong taon na sentensia sa kampo nin pagtrabaho sa Siberia, patagong pagbiahe sa bapor pasiring sa Canada, asin duwang beses na dikit pang pagkagadan huli sa saiyang bisyo sa droga, namibi sia sa Dios para sa tabang na makanompong nin tunay na katuyohan sa buhay. An pag-adal sa Biblia kaiba kan Mga Saksi ni Jehova na nagtataram nin Ruso nakatabang sa saiya na manompongan an simbag sa saiyang mga hapot. Ngonyan an lalaking ini, arog kan minilyon na iba pa, nakanompong nin katoninongan sa kaibanan nin Dios asin sa saiyang sadiri.

An Paglaom na Pagkabuhay Liwat

Sa katapustapusi, balikan ta si Bozo asin Hena Djorem sa Sarajevo. An mag-agom na ini may aking babae na limang taon an edad, si Magdalena. Kan nakaaging Hulyo, sindang tolo pahale sa harong tanganing makikabtang na naman sa saindang aktibidad na paghuhulit kan sinda gabos magadan sa pagputok nin bala nin kanyon. Kumusta an katoninongan na ihinuhulit ninda sa iba? An bala daw nin kanyon na guminadan sa sainda nagpapaheling na ini bakong tunay na katoninongan?

Dai nanggad! Sa palakaw na ini nin mga bagay, nangyayari an mga trahedya. An mga tawo nagagadan sa mga bomba o bala nin kanyon. An iba nagagadan sa helang o mga aksidente. Dakol an nagagadan sa kagurangan. An mga igwa kan katoninongan nin Dios bakong puera dian, alagad dai sinda nawawaran nin paglaom huli sa posibilidad kan siring na mga pangyayari.

Si Jesus nanuga sa saiyang katood na si Marta: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.” (Juan 11:25) Tinubod ini kan mga Djorem, arog kan gabos na Saksi ni Jehova. Asin an mga Djorem may pagtubod na kun sinda magadan, sinda bubuhayon liwat sa sarong daga na sa panahon na iyan magigin nang tunay na matoninong na lugar. “Papahidon [ni Jehova Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:4.

Bago sia nagadan, sinabi ni Jesus sa saiyang mga parasunod: “Itinatao ko saindo an sakong katoninongan. . . . Dai mahadit an saindong puso.” (Juan 14:27) Nakikipaggayagaya kita sa mga Djorem na nagkaigwa kan katoninongan na iyan asin siertong mas lubos na magkakamit kaiyan sa pagkabuhay liwat. Naoogma kita para duman sa gabos na nagsasamba ki Jehova, an Dios nin katoninongan. An mga siring igwa nin katoninongan nin isip. May pakipagkatoninongan sinda sa Dios. Pinatatalubo ninda an pakipagkatoninongan sa iba. Asin may kompiansa sinda sa sarong matoninong na ngapit. Iyo, nakanompong sinda nin katoninongan, minsan ngani nabubuhay sinda sa sarong maribok na kinaban. Tunay nanggad, an gabos na nagsasamba sa Dios sa espiritu asin katotoohan nagkakamit nin katoninongan. Manompongan man logod nindo an siring na katoninongan.

[Nota sa Ibaba]

[Mga retrato sa pahina 7]

Nakanompong sinda nin katoninongan sa ibong kan pamumuhay sa sarong maribok na kinaban