Sairisay an Tunay na mga Mensahero nin Katoninongan?
KAN Mayo 31, 1996, an mga pinaggigikanan nin bareta nagbalangibog kan garo baga sarong mensahe nin katoninongan. Kan nakaaging aldaw, an sarong opisyal na deklarasyon ilinuwas na nagpapatotoo na si Benjamin Netanyahu, na kaidto madali nang magin primer ministro kan Israel, “desididong marhay na ipadagos an mga pakipagnegosyar para sa katoninongan, katoninongan na may seguridad, sa pag-oltanan kan estado nin Israel asin kan gabos na kataraed kaiyan, kabale na an mga Palestino.”
An eleksion ni Netanyahu na may dakulang publisidad pinapag-isip-isip an dakol kun baga an katoninongan sa Tahaw na Sirangan tibaad labi kisa sa pangatorogan sana. Kun iyo, puede daw na arogon iyan kan ibang mga nasyon, na linilingawan an saindang mga dai pagkaintindihan?
Siempre, mas pasil na manuga nin katoninongan kisa sa maotob iyan. Nakasasabot kaini, an dakol nagduduwaduwa. Siring sa pagkasabi kaiyan kan peryodistang si Hemi Shalev, “kabanga kan publiko sa Israel nakamamate ngonyan na harani na an pagkabalukat, asin an kabanga pa naniniwala na iyan nalalaom sa sarong impierno sa daga.” Bilang sumaryo, sia nagsabi: “An iba naggagayagaya; an iba nagtatangis.”
Ini an nangyayari sa mga pagmamaigot nin tawo na magkaigwa nin katoninongan. An kapangganahan nin sarong namomoon asin kan saiyang mga parasunod nangangahulogan nin kadaogan para sa katumang na grupo. An pagkadiskontento naggigiya pasiring sa pagkadisganar, asin an pagkadisganar parateng pasiring sa pagrebelde. Baga man sa Tahaw na Sirangan, Latin Amerika, Sirangan na Europa, o saen man—an mga paghihingoa nin katawohan para sa katoninongan nakadadayang marhay.
Harani Na an Tunay na Katoninongan!
Durante kan panahon na an katoninongan sa Tahaw na Sirangan nangorognang mainit na tema nin bareta, an saro pang mensahe nin katoninongan nadangog. Ini bakong politikal na pahayag na may dakulang publisidad; ni ini man sarong tratado sa katoninongan sa pag-oltanan nin mga nasyon. Imbes, an mensaheng ini nagbalangibog nin sarong katoninongan na makakamtan paagi sana sa Kahadean nin Dios. Saen nadangog an mensaheng ini? Sa labing 1,900 na “Mga Mensahero nin Diosnon na Katoninongan” na Pandistritong Kombension na ginigibo kan Mga Saksi ni Jehova sa bilog na kinaban kan 1996/97.
Sa mga kombension na ini lininaw na daing gobyerno nin tawo na makatatao nin tunay na katoninongan asin seguridad. Taano? Huli ta ini nangangaipo nin pagtapos sa mga bagay na naghahale kan satong katoninongan sa aroaldaw. An tunay na katoninongan nangangahulogan nin pagmata kada aga na daing huma nin guerra o kadahasan. Iyan nangangahulogan na mayo nang krimen, mayo nang mga pambarat sa satong mga pinto, mayo nang takot na maglakaw sa mga tinampo, mayo na nin laglag na mga pamilya. Anong gobyerno sa daga an makagigibo kan gabos na iyan? Tunay nanggad, anong gobyerno sa daga an mangangahas ngani na manuga kaiyan?
Minsan siring, kaya asin itatao kan Kahadean nin Dios an mga bagay na ini. An Biblia nanunuga: “Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:3, 4) Kanigoan na kaginhawahan an itatao kaiyan sa nagsasakit na katawohan!
An panuga ni Jehova Dios bakong daing halaga. Sinisierto sa sato kan Biblia: “An Dios bakong tawo na magpuputik, ni aki nin tawo na magbabasol. Sinabi daw nia asin dai nia gigibohon, asin itinaram daw nia asin dai nia ootobon?” (Bilang 23:19) Iyo, an ipinanuga nin Dios maootob—sa pagbendisyon sa gabos na naninindogan sa saiyang kampi.
An mga Mensahero nin Katoninongan nin Dios
An Mga Saksi ni Jehova midbid sa saindang maigot na paghuhulit manongod sa Kahadean nin Dios. Kada taon, sinda naggagamit nin total na labing sarong bilyon na oras sa paghiras kan nakapaoogma sa puso na mensahe kan Biblia sa iba. Ini bilang kaotoban kan mga tataramon ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) An mensahe na dinadara kan mga Saksi tunay nanggad na “maogmang bareta,” huli ta ipinoproklamar kaiyan an langitnon na Kahadean nin Dios bilang an solamenteng paglaom para sa katawohan. Asin kanigoan na solidong paglaom iyan para sa ngapit!
Dawa ngonyan an Kahadean nin Dios nagpapaluwas sa mga sakop kaiyan nin sarong tunay na bogkos nin katoninongan asin pagkamoot sa tugang. Sinabi ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An Mga Saksi ni Jehova nagmamaigot na otobon an pundamental na kahagadan na ini nin tunay na Kristianismo. Bilang resulta, sinda igwa nin makangangalas na kasararoan nin magturugang na nakapagpapasaro sa mga Judio asin Arabo, mga Croata asin Serbiano, mga Hutu asin Tutsi. An katoninongan na ini na pangatorogan sana kan kadaklan sa katawohan yaon ngonyan sa minilyon na Saksi ni Jehova sa bilog na kinaban.
An pagparigon sa boot na padagos na mamuhay sono sa mga prinsipyo sa Biblia asin danay na maghulit kan maogmang bareta kan Kahadean nin Dios itinampok sa programa kan “Mga Mensahero nin Diosnon na Katoninongan” na Pandistritong Kombension. Iniimbitaran niamo kamo na basahon an masunod na report manongod sa nakapupukaw sa boot na tolong aldaw na kombension na naeeksperyensiahan nin minilyon.