An Kaligtasan ki Jehova
“An tunay na Dios para sa sato Dios nin mga pagliligtas.”—SALMO 68:20.
1, 2. (a) Taano ta masasabi niato na si Jehova an Burabod nin kaligtasan? (b) Paano nindo ipaliliwanag an Talinhaga 21:31?
SI Jehova an Paraligtas nin mga tawo na namomoot sa saiya. (Isaias 43:11) An bantog na si Hadeng David nin Israel aram ini gikan sa personal na inagihan, asin sia bilog na pusong nag-awit: “An kaligtasan ki Jehova.” (Salmo 3:8) Iyan man an mga tataramon na ginamit kan propetang si Jonas sa odok na pamibi mantang yaon sa tulak kan dakulang sira.—Jonas 2:9.
2 An aki ni David na si Salomon nakaaaram man na si Jehova an Burabod nin kaligtasan, ta sia nagsabi: “An kabayo inaandam para sa aldaw nin ralaban, alagad an kaligtasan ki Jehova.” (Talinhaga 21:31) Sa suanoy na Tahaw na Sirangan, an mga bakang kapon nagguguyod kan arado, an mga asno kinakargahan, an mga tawo nagkakabayo sa mga mula, asin an mga kabayo ginagamit sa pakikilaban. Minsan siring, bago naglaog sa Dagang Panuga an mga Israelita, ipinagboot nin Dios na an saindang hade sa ngapit ‘dai maninigong magpadakol nin kabayo para sa saiyang sadiri.’ (Deuteronomio 17:16) Dai kakaipuhanon an mga kabayo sa pakikilaban ta ililigtas ni Jehova an saiyang banwaan.
3. Anong mga hapot an maninigo niatong estudyaran?
3 An Soberanong Kagurangnan na Jehova “Dios nin mga pagliligtas.” (Salmo 68:20) Abaa kanakaparirigon sa boot na ideya! Alagad anong “mga pagliligtas” an ginibo ni Jehova? Asin siisay an saiyang ilinigtas?
Iliniligtas ni Jehova an mga Tanos
4. Paano niato naaaraman na iliniligtas ni Jehova an mga tawong diosnon?
4 An gabos na nagsusunod sa tanos na dalan bilang nagdusay na mga lingkod nin Dios puedeng maranga kan mga tataramon ni apostol Pedro: “Si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong maraot para sa aldaw nin paghokom tanganing gadanon.” Sa pagpatunay sa puntong ini, sinabi ni Pedro na an Dios “dai . . . nag-alangan sa pagkastigo sa suanoy na kinaban, alagad ilinigtas si Noe, sarong parahulit nin katanosan, kaibanan nin pito pa kan pabahaan nia an kinaban nin maraot na mga tawo.”—2 Pedro 2:5, 9.
5. Sa irarom nin anong mga kamugtakan na si Noe naglingkod bilang “sarong parahulit nin katanosan”?
5 Imahinara an saindong sadiri sa tahaw nin mga kamugtakan kan kaaldawan ni Noe. Yaon sa daga an mga demonyong nagmateryalisar. An mga aki kan suwayan na mga anghel na ini maisog sa mga tawo, asin ‘an daga pano nin kadahasan.’ (Genesis 6:1-12) Minsan siring, si Noe dai kayang daogdaogon tanganing bayaan an paglilingkod ki Jehova. Imbes, sia “sarong parahulit nin katanosan.” Sia asin an saiyang pamilya nagtogdok nin dahong, na nungka na nagdududa na an karatan hahaleon sa panahon na sinda nabubuhay. An kinaban na idto kinokondenar kan pagtubod ni Noe. (Hebreo 11:7) An mga kamugtakan na yaon ngonyan kaagid kan mga yaon kaidtong kaaldawan ni Noe, na tinatandaan ini bilang an huring mga aldaw kaining maraot na palakaw nin mga bagay. (Mateo 24:37-39; 2 Timoteo 3:1-5) Kun siring, arog ni Noe, kamo daw magigin fiel bilang parahulit nin katanosan na naglilingkod kaiba kan banwaan nin Dios mantang hinahalat nindo an pagliligtas ni Jehova?
6. Paano pinatutunayan kan 2 Pedro 2:7, 8 na iliniligtas ni Jehova an mga tanos?
6 Nagtatao pa si Pedro nin dugang na ebidensia na iliniligtas ni Jehova an mga tanos. Sinasabi kan apostol: “Ilinigtas [nin Dios] an matanos na si Lot, na napupurisaw na gayo sa pagpangana kan mga makisuway sa ley sa malaswang gawe—huli ta an matanos na tawong idto huli sa saiyang naheheling asin nadadangog mantang nag-eerok sa tahaw ninda aroaldaw nagsasakit an saiyang matanos na kalag huli sa saindang mga katampalasanan.” (2 Pedro 2:7, 8; Genesis 19:1-29) An seksuwal na inmoralidad nagin nang pamumuhay para sa minilyon sa huring mga aldaw na ini. Arog ni Lot, kamo daw ‘napupurisaw na gayo sa pagpangana sa malaswang gawe’ kan kadakol ngonyan? Kun iyo, asin kun kamo naggigibo nin katanosan, tibaad kamo makabilang sa mga ililigtas ni Jehova kun taposon na an maraot na palakaw na ini.
Iliniligtas ni Jehova an Saiyang Banwaan sa mga Nan-aapi
7. Paano pinatutunayan kan mga ginibo ni Jehova sa mga Israelita sa Egipto na saiyang iliniligtas an saiyang banwaan sa pan-aapi?
7 Sagkod na nagdadanay an daan na palakaw na ini, an mga lingkod ni Jehova makaeeksperyensia nin paglamag asin pan-aapi nin kaiwal. Alagad makapagkokompiar sinda na ililigtas sinda ni Jehova, ta ilinigtas nia an saiyang inaaping banwaan kan nakaagi. Ipamugtak ta baga na kamo sarong Israelita na nagdudusa nin pan-aapi sa kamot kan mga Egipcio kan kaaldawan ni Moises. (Exodo 1:1-14; 6:8) Tinira nin Dios an Egipto nin sunod-sunod na damat. (Exodo 8:5–10:29) Kan kuanon kan nakagagadan na ikasampulong damat an buhay kan mga panganay na Egipcio, tinogotan ni Faraon na humale an Israel alagad pagkatapos minobilisar an saiyang mga hukbo asin kaskas na linapag sinda. Minsan siring, dai nahaloy sia asin an saiyang mga soldados linaglag sa Dagat na Pula. (Exodo 14:23-28) Kaiba kamo ni Moises asin kan bilog na Israel sa pag-awit kan awit na ini: “Si Jehova lalaking parapakilaban. Jehova an saiyang ngaran. An mga karuwahe ni Faraon asin an saiyang mga puersa militar iinapon nia sa dagat, asin an mga pili sa saiyang mga parapakilaban rinulunod sa Dagat na Pula. Tinahoban sinda kan nag-uulakbong mga tubig; uminirarom sinda sa mga kairaroman siring sa gapo.” (Exodo 15:3-5) Kaagid na grabeng kapahamakan an naghahalat sa gabos na nan-aapi sa banwaan nin Dios sa huring mga aldaw na ini.
8, 9. Hale sa librong Mga Hokom, tumao nin halimbawa na nagpapatunay na iliniligtas ni Jehova an saiyang banwaan sa mga nan-aapi.
8 Sa laog nin dakol na taon pagkalaog kan mga Israelita sa Dagang Panuga, an mga hokom nagtao nin hustisya sa tahaw ninda. Kun beses nagdudusa an banwaan sa pan-aapi nin ibang nasyon, pero ginamit nin Dios an fiel na mga hokom sa pagligtas sa sainda. Minsan ngani kita man tibaad ‘nag-aagrangay huli sa mga nan-aapi asin mga nanunuklang sa sato,’ ililigtas man kita ni Jehova bilang saiyang maimbod na mga lingkod. (Hokom 2:16-18; 3:9, 15) Sa katunayan, an libro sa Biblia na Mga Hokom nagtatao sa sato nin garantiya digdi asin sa mas dakulang pagliligtas na itatao nin Dios paagi sa saiyang nombradong Hokom, si Jesu-Cristo.
9 Balikan niato an kaaldawan ni Hokom Barac. Huli sa falsong pagsamba asin pagsagwe nin Dios, an mga Israelita nakaeksperyensia nin 20 taon na maringis na pagdominar ni Hadeng Jabin nin Canaan. Si Sisara an hepe kan dakulang hukbong militar kan mga Cananeo. Alagad, “mayong maheheling na kalasag, ni garod, sa tahaw kan apat na polong ribo sa Israel,” minsan ngani an nasyon tibaad may kabilangan na mga apat na milyon. (Hokom 5:6-8) An mga Israelita may pagsolsol na nag-agrangay ki Jehova. Siring sa idinirehir nin Dios paagi sa propetisang si Debora, tinipon ni Barac an 10,000 na kalalakihan sa Bukid nin Tabor, asin dinagka ni Jehova an mga kaiwal na magduman sa kababan sa ibaba kan halangkawon na Bukid nin Tabor. Uya nag-uurog-udog paibong sa kaplanodohan asin sa marang salog nin Cison an mga hukbo saka 900 na karuwahe de guerra ni Sisara. Alagad ta an Cison buminaha nin nakasasanop huli sa makosogon na oran. Mantang si Barac asin an mga soldados nia nagmamartsa palugsad sa Bukid nin Tabor na nagpapahipli sa bagyo, naheheling ninda an panraraot kan kabangisan na binutasan ni Jehova. Sinarosaro kan mga soldados ni Barac an nasisindak, nagdudulag na mga Cananeo, asin mayo nin nakadulag. Abaang patanid ini para sa mga nan-aapi sa sato na nangangahas na makilaban tumang sa Dios!—Hokom 4:3-16; 5:19-22.
10. Taano ta makasisierto kita na ililigtas nin Dios an saiyang mga lingkod sa presenteng panahon sa gabos na nan-aapi sa sainda?
10 Ililigtas ni Jehova an saiyang mga lingkod sa presenteng panahon sa gabos nindang mapan-aping kaiwal, kun paanong ilinigtas nia an matatakton sa Dios na Israel sa mga panahon nin peligro. (Isaias 43:3; Jeremias 14:8) Si David ilinigtas nin Dios “sa kamot kan gabos niang kaiwal.” (2 Samuel 22:1-3) Kaya dawa kita inaapi o pinaglalamag bilang banwaan ni Jehova, magin mapuso kita, ta ililigtas kita kan saiyang Mesiyanikong Hade sa pan-aapi. Iyo, “an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag.” (Salmo 72:13, 14) An katubosan na iyan harani na nanggad.
Iliniligtas nin Dios an mga Nagtitiwala sa Saiya
11. Anong halimbawa nin pagsarig ki Jehova an itinao kan hoben na si David?
11 Tanganing maheling an pagliligtas ni Jehova, dapat na kita mapusong magtiwala sa saiya. Si David nagpaheling nin mapusong pagsarig sa Dios kan sia lumuwas sa pagsabat sa higanteng si Goliat. Imahinara an halangkawon na Filisteong iyan na nagtitindog sa atubangan kan hoben na si David, na nagkukurahaw: “Ika minadolok sa sako na may darang espada asin may budyak patin may garod, alagad ako minadolok sa saimo sa ngaran ni Jehova nin mga hukbo, an Dios kan posisyon para sa ralaban nin Israel, na saimong dinuduhagi. Sa aldaw na ini itatao ka ni Jehova sa sakuyang kamot, asin tunay nanggad na gagadanon taka asin pupugoton ko an saimong payo; asin tunay nanggad na itatao ko sa aldaw na ini an mga bangkay kan kampo kan mga Filisteo sa mga gamgam sa kalangitan asin sa layas na mga hayop sa daga; asin an mga tawo sa bilog na daga makaaaram na igwa nin Dios an Israel. Asin an bilog na kasararoan na ini makaiisi na si Jehova dai nagliligtas paagi sa espada o budyak, huli ta ki Jehova an ralaban.” Dai nahaloy si Goliat gadan na, asin grabe an pagkadaog kan mga Filisteo. Malinaw nanggad, ilinigtas ni Jehova an saiyang banwaan.—1 Samuel 17:45-54.
12. Taano ta tibaad makatabang na girumdomon an poderosong soldados ni David na si Eleazar?
12 Kun napapaatubang sa mga paralamag, tibaad kaipuhan na kita “magkaigwa nin kapusoan” asin mas lubos na magtiwala sa Dios. (Isaias 46:8-13; Talinhaga 3:5, 6) Tawe nin atension an pangyayaring ini sa sarong lugar na inaapod na Pas-damim. Suminibog an Israel sa mga hukbong Filisteo. Alagad dai napapondo nin takot si Eleazar, saro sa tolong pambihirang soldados na poderoso ni David. Tuminindog sia sa sarong oma nin sebada asin solo niang ginadan an mga Filisteo paagi sa espada. Sa siring ilinigtas ni Jehova an Israel “paagi sa dakulang pagliligtas.” (1 Cronica 11:12-14; 2 Samuel 23:9, 10) Mayo nin siisay man na naghahagad sa sato na daogon nin solo an sarong hukbo. Pero, tibaad kun beses kita nagsosolo asin tinatawan nin sakit kan mga kaiwal. Kita daw mapagngayongayong mananarig ki Jehova, an Dios nin mga pagliligtas? Mapatabang daw kita sa saiya tangani na dai niato ikabuyagyag sa mga paralamag an satong mga kapagtubod?
Iliniligtas ni Jehova an mga Nagdadanay sa Integridad
13. Taano ta depisil na papagdanayon kaidto an integridad sa Dios sa sampulong tribong kahadean nin Israel?
13 Tanganing maeksperyensiahan an pagliligtas ni Jehova, dapat na papagdanayon niato an integridad sa saiya ano man an mangyari. An banwaan nin Dios kan suanoy na mga panahon nakaeksperyensia nin manlaenlaen na pagbalo. Isip-isipa kun ano kutana an inatubang nindo kun kamo nabuhay sa sampulong tribong kahadean nin Israel. An ringis ni Roboam nagin dahelan na an sampulong tribo huminale sa pagsuportar sa saiya asin inorganisar an kahadean nin Israel sa amihanan. (2 Cronica 10:16, 17; 11:13, 14) Sa dakol na hade kaiyan, si Jehu an pinakamarahay, alagad dawa sia ‘dai naglakaw sa ley ni Jehova sa bilog niang puso.’ (2 Hade 10:30, 31) Minsan siring, an sampulong tribong kahadean igwa man nin mga nagdadanay sa integridad. (1 Hade 19:18) Sinda nagtubod sa Dios, asin sia napasa kaibanan ninda. Sa ibong nin mga pagbalo sa saindong pagtubod, pinapagdadanay daw nindo an integridad ki Jehova?
14. Anong pagliligtas an ginibo ni Jehova kaidtong kaaldawan ni Hadeng Ezequias, asin ano an nagbunga kan pagkongkistar nin Babilonya sa Juda?
14 An lakop na pagbasangbasang sa Ley nin Dios nagbunga nin kalamidad para sa kahadean nin Israel. Kan iyan makongkistar kan mga Asirio kan 740 B.C.E., an mga indibiduwal hale sa sampulong tribo kaiyan daing duda na nagdulag pasiring sa duwang tribong kahadean nin Juda, na duman masasamba ninda si Jehova sa saiyang templo. An apat sa 19 hade nin Juda na hale sa linahe ni David—si Asa, Josafat, Ezequias, asin Josias—pambihira sa saindang debosyon sa Dios. Kaidtong kaaldawan kan nagdadanay sa integridad na si Ezequias, an mga Asirio nag-abot tumang sa Juda na may poderosong hukbo. Bilang simbag sa mga kahagadan ni Ezequias, ginamit nin Dios an saro sanang anghel sa paggadan sa 185,000 na Asirio sa saro sanang banggi, sa siring tinatawan nin kaligtasan an mga nagsasamba sa Saiya! (Isaias 37:36-38) Sa huri, an dai pakaotob kan banwaan sa Ley asin dai paghimate sa mga patanid kan mga propeta nin Dios nagbunga kan pagkongkistar nin Babilonya sa Juda asin pagkalaglag kan kabisera kaiyan, an Jerusalem, saka kan templo kaidtong 607 B.C.E.
15. Taano ta kaipuhan an pakatagal kan mga desterradong Judio sa Babilonya, asin paano pinapangyari ni Jehova an kaligtasan sa katapustapusi?
15 Kaipuhan an pakatagal kan mga desterradong Judio tanganing mapagdanay an integridad sa Dios mantang bihag sa Babilonya sa laog nin mga 70 mamondong taon. (Salmo 137:1-6) An sarong risang gayong nagdadanay sa integridad iyo an propetang si Daniel. (Daniel 1:1-7; 9:1-3) Imahinara an saiyang kagayagayahan kan ipaotob kan 537 B.C.E. an dekreto ni Hadeng Ciro nin Persia, na tinotogotan an mga Judio na bumalik sa Juda tanganing itogdok liwat an templo! (Esdras 1:1-4) Si Daniel asin an iba pa dakol nang taon na nagtatagal, alagad sa katapustapusi naheling ninda an pagbagsak kan Babilonya asin an pagkaligtas kan banwaan ni Jehova. Ini maninigong makatabang sa sato na magpaheling nin pakatagal mantang hinahalat niato an pagkalaglag kan “Dakulang Babilonya,” an pambilog na kinaban na imperyo nin falsong relihion.—Kapahayagan 18:1-5.
Pirmeng Iliniligtas ni Jehova an Saiyang Banwaan
16. Anong kaligtasan an pinapangyari nin Dios kaidtong kaaldawan ni Reyna Ester?
16 Pirmeng iliniligtas ni Jehova an saiyang banwaan kun sinda fiel sa saiyang ngaran. (1 Samuel 12:22; Isaias 43:10-12) Balikan ta an kaaldawan ni Reyna Ester—an ikalimang siglo B.C.E. Si Aman ninombrahan ni Hadeng Assuero (Jerjes I) bilang primer ministro. Naanggot huli sa pagsayuma ni Mardoqueo na Judio na dumuko sa saiya, si Aman nagpakana na gadanon sia saka an gabos na Judio sa Imperyo nin Persia. Pinaluwas nia na sinda mga paralapas nin ley, nagtao pa sia nin pinansial na pan-agyat, asin tinogotan sia na gamiton an singsing na pantatak kan hade sa pagtatak sa sarong dokumento na nagmamanda kan pagpoho sa sainda. Mapusong ihinayag ni Ester sa hade na sia Judia asin ibinuyagyag an pakana ni Aman na an intension mangadan. Dai nahaloy si Aman nabibitay na sa mismong palo na inandam nia para sa paggadan ki Mardoqueo. Si Mardoqueo ginibong primer ministro, na may autorisasyon na togotan an mga Judio na idepensa an saindang sadiri. Nakamtan ninda an dakulaon na kapangganahan sa saindang mga kaiwal. (Ester 3:1–9:19) An pangyayaring ini maninigong magpakosog sa satong pagtubod na si Jehova magibo nin mga pagliligtas para sa saiyang makinuyog na mga lingkod sa presenteng panahon.
17. Paano an pagkuyog nagkaigwa nin kabtang sa pagkaligtas kan mga Kristianong Judio kan enot na siglo na nag-iistar sa Judea?
17 An saro pang dahelan na iliniligtas nin Dios an saiyang banwaan iyo na sinda nagkukuyog sa saiya asin sa saiyang Aki. Ibugtak nindo an saindong sadiri sa lugar kan Judiong mga disipulo ni Jesus kan enot na siglo. Sinabihan nia sinda: “Kun maheling na nindo an Jerusalem na napalilibotan nin nagkakampong mga hukbo, dangan aramon nindo na harani na an paggibo sa saiya na daing tawo. Dangan an mga nasa Judea magpoon nang dumulag pasiring sa kabukidan.” (Lucas 21:20-22) Nag-agi an mga taon, asin iniisip-isip nindo kun noarin maootob an mga tataramon na ini. Dangan nangyari an rebelyon nin mga Judio kan 66 C.E. An mga hukbong Romano sa pangengenot ni Cestio Gallo sinalikopan an Jerusalem asin uminabante sagkod sa mga lanob kan templo. Bigla na sana, an mga Romano suminibog na mayo nin malinaw na dahelan. Ano an gigibohon kan mga Kristianong Judio? Sa saiyang Ecclesiastical History (Libro III, kapitulo V, 3), sinasabi ni Eusebio na sinda nagdulag hale sa Jerusalem asin Judea. Naligtas sinda ta kinuyog ninda an makahulang patanid ni Jesus. Kamo daw arog man kaiyan kalisto na sunodon an sono sa Kasuratan na mga paggiyang itinatao paagi sa “fiel na mayordomo” na ninombrahan na mamahala sa gabos na “rogaring” ni Jesus?—Lucas 12:42-44.
Pagkaligtas Pasiring sa Buhay na Daing Katapusan
18, 19. (a) Anong kaligtasan an pinapangyari kan kagadanan ni Jesus, asin para kiisay? (b) Ano an determinadong gibohon ni apostol Pablo?
18 An paghimate sa patanid ni Jesus nagligtas kan buhay nin mga Kristianong Judio sa Judea. Alagad an kagadanan ni Jesus pinagigin posible para sa “gabos na klase nin mga tawo” an pagkaligtas pasiring sa buhay na daing sagkod. (1 Timoteo 4:10) An pangangaipo kan katawohan nin pantubos naglataw kan magkasala si Adan, sa siring nawaran kan saiya mismong buhay asin ipinabakal an rasa nin tawo sa kaoripnan sa kasalan saka kagadanan. (Roma 5:12-19) An mga atang na hayop na idinolot sa irarom kan Ley ni Moises paramas sanang pantahob sa kasalan. (Hebreo 10:1-4) Mantang si Jesus dai nagkaigwa nin amang tawo asin malinaw na ‘linindongan’ si Maria kan banal na espiritu nin Dios poon kan ini mangidam sagkod na namundag si Jesus, sia namundag na mayo nin minanang kasalan o pagkabakong sangkap. (Lucas 1:35; Juan 1:29; 1 Pedro 1:18, 19) Kan si Jesus magadan bilang sangkap na nagdadanay sa integridad, idinolot nia an saiyang sangkap na buhay tanganing tuboson asin tawan nin katalingkasan an katawohan. (Hebreo 2:14, 15) Sa siring si Cristo “nagtao kan saiyang sadiri bilang katimbang na pantubos para sa gabos.” (1 Timoteo 2:5, 6) Bakong gabos maaprobetsar sa probisyon na ini para sa kaligtasan, alagad inooyonan nin Dios an pag-aplikar kan mga pakinabang dian sa mga nag-aako kaiyan na may pagtubod.
19 Paagi sa pagpresentar sa Dios kan halaga kan saiyang atang na pantubos duman sa langit, tinubos ni Cristo an mga gikan ni Adan. (Hebreo 9:24) Sa siring si Jesus nagkaigwa nin Nobya, na kompuesto kan saiyang 144,000 na linahidan na mga parasunod na ibinangon pasiring sa langitnon na buhay. (Efeso 5:25-27; Kapahayagan 14:3, 4; 21:9) Sia nagigin man “Amang Daing Sagkod” sa mga nag-aako kan saiyang atang asin nin buhay na daing katapusan digdi sa daga. (Isaias 9:6, 7; 1 Juan 2:1, 2) Abaa kamamomoton na areglo! An pag-apresyar ni Pablo dian risang-risa sa saiyang ikaduwang ipinasabong na surat sa mga Kristiano sa Corinto, arog kan ipaheheling kan kasunod na artikulo. Sa katunayan, si Pablo determinado na dai togotan an ano man na olangon sia sa pagtabang sa mga tawo na aprobetsaran an makangangalas na probisyon ni Jehova para sa kaligtasan pasiring sa buhay na daing katapusan.
Ano an Isisimbag Nindo?
◻ Ano an prueba sa Kasuratan na iliniligtas nin Dios an saiyang tanos na banwaan?
◻ Paano niato naaaraman na iliniligtas ni Jehova an mga nagtitiwala sa saiya asin nagpapadanay kan saindang integridad?
◻ Anong probisyon para sa kaligtasan pasiring sa buhay na daing katapusan an itinao nin Dios?
[Retrato sa pahina 12]
Si David nagtiwala ki Jehova, an “Dios nin mga pagliligtas.” Iyo man daw kamo?
[Retrato sa pahina 15]
Pirmeng iliniligtas ni Jehova an saiyang banwaan, siring kan pinatunayan nia kaidtong kaaldawan ni Reyna Ester