May Nagmamakolog daw Talaga?
“An mga luha kan mga inaapi” nagin sapang masulog. Iyan luha kan mga biktima kan dai mabilang na “pan-aapi” sa bilog na kinaban. An mga nabiktima sa parate nagsasaboot na sinda ‘mayo nin pararanga’—na mayo talaga nin nagmamakolog sa sainda.—Eclesiastes 4:1.
APISAR kan sapang masulog nin luha na ini, an nagkapira dai apektado kan pagdusa kan saindang mga kapwa tawo. Tuyo nindang iniignoro an kolog kan ibang tawo, arog kan saserdote asin kan Levita sa ilustrasyon ni Jesu-Cristo manongod sa sarong lalaki na sinalakay, hinabonan, asin binayaan na haros gadan na sa gilid nin tinampo. (Lucas 10:30-32) Basta marahay man an kamugtakan ninda asin kan saindang pamilya, dai sinda nahahadit manongod sa iba. Garo man sana sinasabi ninda, “Anong labot ko?”
Dai kita maninigong mabigla kaini. Ihinula ni apostol Pablo na sa “huring mga aldaw” dakol na tawo an mawawaran nin “natural na kapadangatan.” (2 Timoteo 3:1, 3) An sarong nagmamasid nag-agrangay huli sa nagtalubong daing pagmakolog na mga aktitud. “An suanoy na pilosopiya asin tradisyon na Irlandes manongod sa pagmakolog asin paghiras sa iba,” an sabi nia, “sinasalidahan nin bagong susundon na sadiri sana an iniintindi.” Sa bilog na kinaban, an mga tawo sadiri sana an iniintindi, na haros biyo nang daing pakiaram sa mamondong kamugtakan nin iba.
Sarong Pangangaipo na May Magmakolog
Tunay nanggad na kaipuhan na may magmakolog. Halimbawa, horophoropa an manongod sa napupungaw na lalaki sa Alemania na “nanompongan na nagtutukaw sa atubangan kan saiyang telebisyon—limang taon pagkagadan nia durante kan Navidad.” An “diborsiado, baldadong parasolosolo” na ini, na pinapait an boot kan saiyang makamomondong mga eksperyensia sa buhay, dai narisang mayo sagkod na maubos an kuarta sa bangko na dian iniina an bayad kan saiyang arkila. Mayo talaga nin nagmamakolog sa saiya.
Isip-isipa man an daing maginibong mga biktima kan makapangyarihan, mahanab na mga supremong kagurangnan. Sa sarong lugar, mga 200,000 katawo (un-kuarto kan populasyon) an “nagadan huli sa pananakop asin gutom” pakatapos na madahas na kompiskaron an saindang daga. O isip-isipa an mga aki na nakaheling nin haros dai mapaniwalaan na kadahasan. Sinabi nin sarong bareta: “Nakatataranta an bilang nin mga aki sa [sarong nasyon] na nakaheling nin dakol na kabikoan—paggadan, pambubugbog, panlulugos, na kun beses ginigibo kan ibang mga hoben.” Masasabotan nindo kun taano an sarong biktima nin siring na mga inhustisya tibaad nagbobolos an luha na maghapot, “May nagmamakolog daw talaga sa sako?”
Segun sa sarong report kan Naciones Unidas, 1.3 bilyon na tawo sa nagpoprogreso pa sanang mga nasyon an kaipuhan na magdanay na buhay sa katumbas nin dai pang sarong dolyar nin E.U. kada aldaw. Sinda seguradong nag-iisip kun may nagmamakolog. Iyo man an rinibong dulag na, sabi kan sarong bareta sa The Irish Times, “napapaatubang sa masakit saka mapait na pagpipilian na magdanay sa sarong daing kuentang kampo o bakong mapagpasakat na nasyon o magprobar na bumalik sa dagang tinuboan na pinagsuruhaysuhay pa nin guerra o etnikong pagkabaranga.” Kaiba sa bareta an nakapangigirabong ehersisyo na ini: “Magpirong kamo, magbilang nin tolo, sarong aki an nagadan pa sana. Saro sa 35,000 na aki na magagadan ngonyan na aldaw huli sa malnutrisyon o helang na puedeng sumpoon.” Bakong makangangalas, dakol an nag-aagrangay huli sa kapurisawan asin kapaitan!—Ikomparar an Job 7:11.
Ini daw gabos sa katuyohan na nangyayari? Sa realistikong paagi, igwa daw nin saro na bako sanang nagmamakolog kundi may kapangyarihan man na paontokon an pagdusa asin bolongon an gabos na kakologan nin boot na naeksperyensiahan nin mga tawo?
[Pasasalamat para sa pinagkuanan kan retrato sa pahina 2]
Cover and page 32: Reuters/Nikola Solic/Archive Photos
[Pasasalamat para sa pinagkuanan kan retrato sa pahina 3]
A. Boulat/Sipa Press