Talagang May Nagmamakolog

RINIBONG tawo an nagpapaheling na sinda talagang nagmamakolog. Sinasayumahan ninda an daing simpatiya, maimot na punto de vista na mayo sindang labot sa mga problema nin iba. Imbes, ginigibo ninda an bilog nindang makakaya—kun beses isinasapeligro pa ngani an sainda mismong buhay—tanganing inaan an pagdusa. Grabe kadakulang gibohon ini, saro na pinagin komplikado nin makapangyarihan na mga puersa na dai ninda kontrolado.

An nakakokontribwir na mga bagay siring kan kahanaban, politikal na intriga, mga guerra, asin natural na mga kalamidad puedeng sudyaon dawa “an pinakamarahay asin pinakadeterminadong paghihingoa na pohoon an pagkagutom,” an sabi nin sarong nagtatrabaho sa pag-ayuda. An paghale sa pagkagutom saro sana sa dakol na problema na inaatubang kan mga tawong may pagmakolog. Linalabanan man ninda an mga bagay na siring kan helang, kadukhaan, inhustisya, asin an grabe kadakulang pagdusa na causa kan guerra. Alagad sinda daw nanggagana?

An hepe ehekutibo nin sarong ahensia sa pag-ayuda nagsabi na an mga naggigibo kan siring na ‘marahay asin determinadong mga paghihingoa’ tanganing inaan an pagkagutom asin kolog nakaaagid sa maheherakon na Samaritano na ilinadawan sa ilustrasyon ni Jesu-Cristo. (Lucas 10:29-37) Alagad ano man an gibohon ninda, sabi nia, orog sanang nagdadakol an biktima. Kaya sia naghapot: “Ano an maninigong gibohon kan marahay na Samaritano kun sia nagbibiahe sa iyo man sanang ruta aroaldaw sa laog nin dakol na taon asin nakanonompong serosemana nin ibang biktima nin parahabon sa gilid nin tinampo?”

Magigin madali na padaog sa ilinadawan bilang ‘an nakagagadan na helang na kapagalan kan kag-ataman’ asin umontok na sana sa pagkasudya kan mawot. Sa onra ninda, an mga talagang nagmamakolog dai minaontok. (Galacia 6:9, 10) Halimbawa, an sarong lalaki na nagsurat sa Jewish Telegraph sa Britania kinomendaran an Mga Saksi ni Jehova, na durante kan panahon kan Nazi sa Alemania “tinabangan an rinibong Judio na matadang buhay sa kasakitan sa Auschwitz.” “Kan kadikit an kakanon,” an sabi kan kagsurat, “ihiniras ninda an saindang tinapay sa satong [Judiong] mga tugang na lalaki asin babae!” Padagos na ginibo kan mga Saksi an makakaya ninda paagi sa mga rekurso na yaon sa sainda.

Pero, an katotoohan iyo na dai kayang taposon kan dawa guranong paghiras nin tinapay an pagdusa nin tawo. Bakong katuyohan kaini na halean nin halaga an ginibo kan maheherakon na mga tawo. An ano man na aksion na tamang nakakaina sa pagdusa kapakipakinabang. An mga Saksi na idto medyo ininaan an kolog kan mga kapwa preso, asin an Nazismo sa kahurihurihi nalaglag. Minsan siring, an palakaw kan kinaban na nagkacausa kan siring na pan-aapi nagdanay, asin kadakol pa an mga tawo na daing pagmakolog. Tunay nanggad, “may henerasyon na an mga ngipon mga espada asin an mga panga mga kutsilyong pambuno, sa pagsiba sa mga nagsasakit sa daga asin sa mga dukha hale sa katawohan.” (Talinhaga 30:14) Posibleng mag-isip kamo kun taano ta arog kaini an kamugtakan.

Taano ta May Kadukhaan Asin Pan-aapi?

Minsan, sinabi ni Jesu-Cristo: “Pirmeng nasa kaibanan nindo an mga dukha, asin noarin man na boot nindo pirme nindo sindang magigibohan nin karahayan.” (Marcos 14:7) An boot sabihon daw ni Jesus dai noarin man matatapos an kadukhaan asin pan-aapi? Arog kan ibang tawo, naniniwala daw sia na an siring na pagdusa kabtang kan plano nin Dios na tawan nin oportunidad an mga maheherakon na ipaheling kun gurano an saindang pagmakolog? Dai! Si Jesus dai naniniwala dian. Sinasabi sana nia na an kadukhaan magigin kabtang nin buhay sagkod na yaon pa an palakaw na ini nin mga bagay. Alagad aram man ini ni Jesus: Bakong orihinal na katuyohan kan saiyang langitnon na Ama na magkaigwa kan siring na kamugtakan digdi sa daga.

Linalang ni Jehova Dios an daga na magin sarong paraiso, bakong lugar na dinadamat nin kadukhaan, inhustisya, asin pan-aapi. Ipinaheling nia kun gurano an saiyang pagmakolog sa pamilya nin tawo paagi sa paggibo nin makangangalas na mga probisyon na makadadagdag sa kasiraman nin buhay. Tara, estudyaran an apod mismo sa tatamnan na nagimatan kan satong enot na mga magurang, si Adan asin si Eva! Inapod iyan na Eden, na an boot sabihon “Kasiraman.” (Genesis 2:8, 9) Dai linimitaran ni Jehova an mga tawo na magkaigwa sana kan mga pangangaipo para magdanay na buhay sa sarong daing kabuhaybuhay, mapan-aping palibot. Sa pagtatapos kan saiyang paglalang, pinagmasdan ni Jehova an saiyang ginibo asin ipinahayag na iyan “marahayon.”—Genesis 1:31.

Kun siring, taano ta lakop ngonyan sa bilog na kinaban an kadukhaan, pan-aapi, asin iba pang causa nin pagdusa? An presenteng maraot na palakaw nin mga bagay nag-eeksister huli ta an enot niatong mga magurang piniling magrebelde tumang Dios. (Genesis 3:1-5) Ibinangon kaini an hapot kun baga tama para sa Dios na maghagad nin pagkuyog sa saiyang mga linalang. Kaya tinawan ni Jehova an mga gikan ni Adan nin independensia sa limitadong panahon. May pagmakolog pa man giraray an Dios sa nangyayari sa pamilya nin tawo. Itinao nia an probisyon para sa paghale kan gabos na danyos na ibubunga kan rebelyon tumang sa saiya. Asin dai na nanggad mahahaloy, tataposon ni Jehova an kadukhaan asin pan-aapi—sa katunayan, an gabos na pagdusa. —Efeso 1:8-10.

Sarong Problema na Dai Kayang Resolberan nin Tawo

Sa nakaaging mga siglo poon kan lalangon an tawo, an katawohan orog pang ruminayo sa mga pamantayan ni Jehova. (Deuteronomio 32:4, 5) Sa padagos nindang pagsayuma sa mga ley asin prinsipyo nin Dios, an mga tawo nagralabanlaban, asin “an tawo nagsakop sa tawo sa saiyang ikararaot.” (Eclesiastes 8:9) An gabos na paghihingoa na papangyarihon an totoong makatanosan na sosyedad, na talingkas sa gabos na nandadamat sa nagdudusang katawohan, inolang kan kaimotan kan mga gustong gibohon an mga bagay sa sadiri nindang paagi imbes na magpasakop sa soberaniya nin Dios.

May problema pa—saro na tibaad ipahayag na daing saysay nin dakol bilang superstisyosong kalokohan. An parasutsut kan rebelyon tumang sa Dios dinadagka pa an mga tawo sa karatan asin kaimotan. Sia iyo si Satanas na Diablo, asin inapod sia ni Jesu-Cristo na “an namamahala sa kinaban na ini.” (Juan 12:31; 14:30; 2 Corinto 4:4; 1 Juan 5:19) Sa kapahayagan na itinao ki apostol Juan, si Satanas ipinamidbid bilang an nangingibabaw na ginigikanan nin grabeng sakit—an pangenot na responsable sa ‘paglagalag kan bilog na ineerokan na daga.’—Kapahayagan 12:9-12.

Dawa gurano pang pagmakolog kan nagkapirang tawo sa saindang mga kapwa tawo, dai ninda noarin man mahahale si Satanas na Diablo o mababago an palakaw na ini na nagpapaoswag sa padakol nang padakol na bilang nin biktima. Kun siring, ano an kaipuhan tanganing maresolberan an mga problema nin katawohan? An solusyon bako sanang saro na nagmamakolog. Kaipuhan an saro na may kabotan asin kapangyarihan na haleon si Satanas asin an saiyang bilog na bakong makatanosan na palakaw.

“Gibohon Logod an Boot Mo . . . sa Daga”

An Dios nanunuga na lalaglagon an maraot na palakaw na ini nin mga bagay. Sia igwa kapwa kan kabotan asin kapangyarihan na kaipuhan tanganing magibo iyan. (Salmo 147:5, 6; Isaias 40:25-31) Sa makahulang libro sa Biblia na Daniel, ihinula: “An Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan”—iyo, sagkod lamang. (Daniel 2:44) An nagdadanay asin matinaong langitnon na gobyernong ini an nasa isip ni Jesu-Cristo kan tokdoan nia an saiyang mga disipulo na hagadon sa Dios sa pamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.”—Mateo 6:9, 10.

Sisimbagon ni Jehova an siring na mga pamibi huli ta talagang nagmamakolog sia sa pamilya nin tawo. Segun sa makahulang mga tataramon sa Salmo 72, aautorisaran nin Dios an saiyang Aki, si Jesu-Cristo, na magtao nin nagdadanay na kaginhawahan sa mga dukha, sa mga nagsasakit nin makuri, asin sa mga inaapi na nagsusuportar sa pamamahala ni Jesus. Sa siring, an pinasabngan na salmista nag-awit: “Hokoman logod nia [kan Mesiyanikong Hade nin Dios] an mga nagmomondo sa banwaan, iligtas logod nia an mga aki kan dukha, asin ronoton logod nia an mapaglupig. . . . Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.”—Salmo 72:4, 12-14.

Sa sarong bisyon may labot sa satong aldaw, naheling ni apostol Juan “an sarong bagong langit asin sarong bagong daga,” sarong biyong bagong palakaw nin mga bagay na inestablisar nin Dios. Kanigoan na bendisyon para sa nagdudusang katawohan! Ihinuhula an gigibohon ni Jehova, si Juan nagsurat: “Nakadangog ako nin makosog na tingog hale sa trono na nagsabi: ‘Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.’ Asin an Saro na nagtutukaw sa trono nagsabi: ‘Uya! ginigibo kong bago an gabos na bagay.’ Siring man, sia nagsabi: ‘Isurat mo, huli ta an mga tataramon na ini fiel asin totoo.’”—Kapahayagan 21:1-5.

Iyo, mapaniniwalaan niato an mga tataramon na ini, huli ta iyan fiel asin totoo. Sa dai na mahahaloy hahaleon ni Jehova sa daga an kadukhaan, pagkagutom, pan-aapi, helang, asin gabos na inhustisya. Siring kan parateng sinasabi kan magasin na ini hale sa Kasuratan, abunda an ebidensia na nagpapaheling na kita nabubuhay sa panahon na an mga panugang ini maootob. An ipinanuga nin Dios na bagong kinaban harani na! (2 Pedro 3:13) Sa dai na mahahaloy, “hahalonon [ni Jehova] an kagadanan sagkod lamang” asin ‘papahidon an mga luha sa gabos na lalauogon.’—Isaias 25:8.

Sagkod na mangyari iyan, kita puedeng mag-ogma na dawa ngonyan may mga tawo na tunay na nagmamakolog. An mas dakulang dahelan para sa kaogmahan iyo na si Jehova Dios mismo talagang nagmamakolog. Hahaleon nia sa dai na mahahaloy an gabos na pan-aapi asin pagdusa.

Puede kamong magkaigwa nin absolutong tiwala sa mga panuga ni Jehova. Ginibo nanggad iyan kan saiyang lingkod na si Josue. Mayo nin ano man na pagduda, sinabihan nia an suanoy na banwaan nin Dios: “Aram nindong gayo sa bilog nindong puso asin sa bilog nindong kalag na ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.” (Josue 23:14) Kun siring, mantang yaon pa an presenteng palakaw nin mga bagay, dai nindo togotan an saindong sadiri na malunosan kan mga kasakitan na tibaad kaipuhan pa nindong atubangon. Ibugtak nindo an gabos nindong kahaditan ki Jehova, huli ta sia talagang may pagmakolog.—1 Pedro 5:7.

[Mga retrato sa pahina 7]

Sa ipinanuga nin Dios na bagong kinaban, an daga magigin talingkas sa kadukhaan, pan-aapi, helang, asin inhustisya