An Dedikasyon kan Sentro nin Edukasyon kan Watchtower—Sarong Kapiestahan Para ki Jehova

POON pa kan suanoy na mga panahon, an magayagayang mga kapiestahan kabtang na nin tunay na pagsamba. An nagkapira sa mga kapiestahan na ginibo sa suanoy na Israel naglawig nin pirang aldaw asin inatenderan nin rinibong parasamba ki Jehova. An inagurasyon kan templo ni Salomon nagpitong aldaw asin sinundan kan sarong semanang Kapiestahan nin mga Payag-payag. Nagtao ini sa mga Israelita nin oportunidad na horophoropon an makangangalas na paagi kan pagtratar sa sainda ni Jehova. Sinda nagpuruli na “naggagayagaya asin naoogma sa puso huli sa karahayan na ginibo ni Jehova.”—1 Hade 8:66.

An nangyari sa Sentro nin Edukasyon kan Watchtower sa Patterson, Nueva York, E.U.A., kan Mayo 17-22, 1999, nagpagirumdom sa mga bisita kan suanoy na maogmang mga kapiestahan na idto. Ini sarong semanang espesyal na aktibidad na nakasentro sa dedikasyon nin may 28 grupo nin mga edipisyo na dinisenyo tanganing paoswagon an lakop sa globong pagtotokdo kan Biblia. May ginibong areglo para sa gabos na 5,400 na personahe sa opisina prinsipal sa Brooklyn, Wallkill, asin Patterson na makapasyar sa gabos na pasilidad kan Patterson durante kan dai malilingawan na semanang idto. Kabilang sa mga bisita an labing 500 na dating miembro na nagtrabaho durante kan pagtogdok kan sentro nin edukasyon, mga representante hale sa 23 na sangang opisina kan Watch Tower Society, asin iba pa hale sa kaharaning mga kongregasyon—may total na kisuerra 8,100.

Nakapagtotokdo an mga Paheling sa Pagpasyar

May iinareglong espesyal na mga paheling, nakapagtotokdong mga pasale sa video, asin mga pagpasyar na mayo nin kaibang naggigiya tanganing magin pamilyar an mga bisita dapit sa sentro nin edukasyon. Sa pangenot na sala paglaog, an mga bisita naakit tolos sa sarong sadit na representasyon kan templo na nag-eksister kaidto sa Jerusalem durante kan panahon nin ministeryo ni Jesus digdi sa daga. An iba pang mga paheling nagtampok kan enot na kasaysayan kan Paadalan sa Biblia kan Watchtower sa Gilead, makasaysayan na mga kombension, mga pagtiripon kan kongregasyon, pag-oswag sa presenteng aldaw kan mga pag-adal sa Biblia sa harong—na an minilyon kaiyan ngonyan kinokonduktahan kada semana—asin an trabaho kan Departamento Legal tanganing papagdanayon na bukas an dalan para sa siring na aktibidad bilang pagkuyog sa pagboot ni Jesus.—Mateo 28:19, 20.

Sa kaharaning auditoryum, na 1,700 an komportableng makakatukaw, an mga nagbisita durante kan kapiestahan sa dedikasyon pinadalan kan 33 minutong pasale sa video na may titulong “Bakong Paagi sa Kapangyarihan—Paagi sa Sakuyang Espiritu!” Ipinaheling kan video na ini kun paano nahaman an Sentro nin Edukasyon kan Watchtower. Ihinayag kan mga interbio an mga pangyayari na malinaw na nagpaparisa kan paggiya ni Jehova sa mga bagay-bagay asin kan saiyang bendisyon sa mga paghihingoa na hamanon nin mapanggana an 15 taon na proyektong ini. Rinibo an nakikabtang sa aktuwal na pagtogdok. May panahon kan 1994 na nagkaigwa nin 526 na trabahador duman, kabale an 350 bilog na panahon na boluntaryo, 113 temporaryong trabahador, asin 63 na nagpupulipuli aroaldaw tanganing tumabang. Dakol pa an nagsuportar sa gibohon paagi sa mga donasyon. Narerealisar ninda gabos na nungka ining nangyari kun mayo an espiritu ni Jehova.—Zacarias 4:6.

Maheheling kan mga nagpasyar na an mga ginigibo duman sa sentro nin edukasyon nakasentro sa pagpalakop kan pagtotokdo nin Dios. An paheling sa palaog sa Paadalan nin Gilead sa enot na eskalon kan edipisyo kan paadalan nagtatampok kan abundang espirituwal na pamana asin kasaysayan kan paadalan. Poon sa enot na klase kaiyan kan 1943 sa orihinal na kampus kan paadalan sa South Lansing, Nueva York, an Paadalan nin Gilead nakapagsanay na nin labing 7,000 na estudyante para sa pagmimisyonero. Sa mga paheling sa ikaduwang eskalon kan edipisyo kan paadalan maheheling an Paadalan Para sa mga Miembro kan Komite kan Sanga asin an Paadalan Para sa Nagbibiaheng mga Paraataman, na pareho duman nagkaklase. Poon kan magpoon iyan kan Nobyembre 1995, an paadalan kan sanga nagtao nin mas halangkaw na gradong pagtotokdo sa 360 miembro nin Sangang Opisina hale sa 106 na nasyon.

Mantang namamasyar an mga bisita, narealisar tolos ninda na sa kadaklan na lugar, bako sanang paheling na mga retrato an naheling ninda. Nadumanan mismo ninda an laen-laen na departamento, nasongko an mga opisina asin iba pang pinagtatrabawohan, asin naheling nin kompleto an trabahong ginigibo duman. An sarong tampok na kabtang kan pagpasyar iyo an edipisyo kan Audio/Video Services. Abaa kaekselente kan mga pasilidad na ginagamit sa pagpaoswag kan pagtotokdo kan Biblia! Paagi sa serye nin nakapagtotokdong mga paheling asin halipot na mga video, natabangan an mga bista na masabotan kun paano ginigibo an mga rekording nin boses asin kun paano inaandam an mga video. May nanodan sinda manongod sa mahiwas na pagsiyasat na ginigibo sa pag-andam kan mga kagamitan asin kostium. Naheling ninda kun paano ginigibo an mga gamit sa plataporma sa pinakahababang gastos alagad tinatawan nin pambihirang atension an detalye. Naheling mismo ninda kun paano ginagamit an musika tanganing ipamate sa mga tawo na sinda aktuwal na yaon sa eksena na dinadalan ninda. Poon kan 1990 an Sosyedad nakaprodusir na nin sampulong video sa 41 tataramon, na nagtatampok nin laen-laen na tema sa Biblia, apuera kan iba pang video para sa mga naggagamit nin American Sign Language.

An dakol na nagpasyar nagduman sa Photo Lab, Art Department, Information Services, na nagtatao nin pagsasanay asin suporta dapit sa komputer, sa Service Department, na nagdidirehir sa aktibidad kan 11,242 na kongregasyon asin 572 na nagbibiaheng paraataman, asin sa Writing Correspondence, na duman mga 14,000 na hapot an inaasikaso taon-taon. Natudok an boot ninda sa pagsiyasat na ginigibo sa pag-andam kan mga surat na ipinadadara asin sa tunay na pagmakolog na ipinaheheling duman sa mga an hapot nagtatao nin ebidensia na sinda naghihingoang makapanggana sa magabat na mga problema.

An daing ontok na grupo kan mga nagpapasyar nagsongko sa Translation Services. Nasorpresa sinda na maaraman na durante kan nakaaging limang taon, 102 na tataramon pa an idinagdag sa bilang nin mga babasahon sa Biblia na ilinuluwas kan Sosyedad. Sa bilog na kinaban, an mga 80 porsiento kan Mga Saksi ni Jehova nagbabasa kan mga publikasyon kan Sosyedad sa mga tataramon na bakong Ingles. Tanganing ikatao an saindang mga kinakaipuhan, labing 1,700 na boluntaryo an nagtatrabaho sa langtad nin pagtradusir sa 100 na nasyon. Yaon sa mga paheling An Torrengbantayan sa mga tataramon sa Amerika del Sur asin Norte, Europa, Asia, asin Aprika. Maheheling kan mga bisita an New World Translation kan Biblia sa 31 tataramon na ipinublikar iyan. Naaraman ninda na an mga publikasyon kan Watch Tower makukua na ngonyan sa 332 na tataramon asin na an brosyur na Ano an Kahagadan sa Sato nin Dios? ipinublikar sa 219 kaini.

Ipinaheling sa mga bisita sa Legal Department an laen-laen na langtad nin aktibidad na nagkakaipo nin atension legal sa bilog na kinaban. Sa sarong video, naheling ninda an sarong aktuwal na pagbista sa korte kun saen an sarong abogadong Saksi nagtatao nin mga argumento sa sarong kaso na may koneksion sa pag-ineksion nin dugo. Naaraman man ninda kun ano an ginigibo tanganing mapagdanay na bukas an dalan para sa pampublikong paghuhulit kan maogmang bareta. (Filipos 1:7) Dinara an atension sa nagin desisyon kan Marso kan taon na ini, kan korte sa distrito pederal, na nagboboot sa dibisyon administratiba nin Oradell, New Jersey, E.U.A., na liwaton an mga ley kaiyan tanganing haleon an kahagadan na permiso asin kard sa Mga Saksi ni Jehova na gustong makikabtang sa saindang pampublikong ministeryo sa harong-harong sa komunidad na iyan.

Bako sana nanggad ini an naheling kan mga bisita. Siniyasat ninda an mga paheling sa konstruksion sa Precast Shop asin nagpasyar sinda sa mga pasilidad sa Wastewater Treatment, sa Powerhouse, Water-Softening Facility, asin sa kadakol na pahirahayan para sa mantension, kabilang sa iba pa. Idto sarong daing kaagid na oportunidad.

Idinoon kan Programa sa Dedikasyon an Pagtotokdo nin Dios

An aktuwal na programa sa dedikasyon ginibo kan Mierkoles, Mayo 19, poon alas 4:00 n.h. Kabale sa magayagayang mga tawo na may bilang na 6,929 an mga personahe sa opisina prinsipal, mga bisita kan Sosyedad, asin 372 na nagtiripon sa sangang opisina sa Canada, na ikinonektar paagi sa telepono.

An mga nagdadangog naogma nanggad na madangog an nakaoogmang mga tataramon nin pag-ako ni Milton G. Henschel, an presidente kan Watch Tower Society. Si Theodore Jaracz, sarong miembro kan Namamahalang Grupo asin tsirman para sa okasyon, sunod na ipinamidbid si William Malenfant. Sa pag-atubang kan “Mga Tampok na Kabtang kan Programa nin Pagtotogdok,” ininterbio nia an tolong tugang na lalaki na nagkaigwa nin importanteng kabtang sa paggibo, disenyo, asin konstruksion kan Sentro nin Edukasyon kan Watchtower. Durante kan mga interbio, sinabi na sa mga taon kan aktuwal na pagtogdok, labing 8,700 na temporaryong trabahador an nagduman sa saindang sadiring gastos tanganing magtrabaho sa proyekto. Kanigoan karahay na patotoo sa pagkasararo asin pagigin buka an palad na pinagin posible kan pagtotokdo nin Dios!

Suminunod an simposium na may titulong “Pagtotokdo nin Dios na Lakop sa Globo.” Iinatubang iyan kan apat na miembro kan Namamahalang Grupo. Idinoon ni John E. Barr na an pagtotokdo nin Dios nakabasar sa Tataramon nin Dios, an Biblia, na nag-eenkaminar sa mga Kristiano na ‘padagos na mamunga sa lambang marahay na gibo asin umoswag sa tamang kaaraman dapit sa Dios.’ (Colosas 1:10) Ipinaliwanag ni Daniel Sydlik kun paano inoorganisar an pagtotokdo nin Dios sa teokratikong paagi poon sa payo kan Kristianong kongregasyon, si Jesu-Cristo, sagkod sa lambang miembro kan pambilog na kinaban na kasararoan nin magturugang. (1 Corinto 12:12-27) Ipinaheling kan ultimong duwang kabtang kan simposium, na itinao ni Gerrit Lösch asin Carey Barber, kun paano kinukualipikar kan pagtotokdo nin Dios an mga ministro tanganing maabot an mga tawo sa gabos na lugar asin matokdoan sinda tanganing sinda man makalakaw sa dalan nin Dios.—Isaias 2:1-4; 2 Corinto 3:5.

Tanganing magin pamilyar an mga nagdadangog sa laen-laen na paadalan na nagpupunsionar sa sentro nin edukasyon na ini, ininterbio asin kinaolay an mga instruktor saka an iba pang imbuelto sa pagpunsionar kaiyan. Ipinaheling an kabtang kan lambang paadalan sa pagsagibo kan programa nin pagtotokdo nin Dios sa bilog na globo. Sinabi na an Paadalan nin Gilead nakasentro sa pag-adal kan kada libro sa Biblia, sa presenteng aldaw na kasaysayan kan banwaan ni Jehova, asin sa pag-andam para sa pagmimisyonero. An paadalan kan sanga sarong marahayon na kompletong pag-adal kan dakol na langtad nin aktibidad na dian imbuelto an mga miembro kan Komite kan Sanga. An Paadalan Para sa Nagbibiaheng mga paraataman dinisenyo bako sanang tanganing itao an mga kinakaipuhan kan nagbibiaheng mga tugang kundi sangkapan man sinda sa pagtao kan klase nin espirituwal na tabang na espesyalmenteng pakikinabangan kan mga kongregasyon.

Bilang konklusyon kan magayon na programa, itinao ni Lloyd Barry kan Namamahalang Grupo an pahayag sa dedikasyon na may temang “Pagtotogdok Kaiba an Satong Kaharohalangkaweng Kaglalang.” Sinabi nia na an Kaglalang, si Jehova, ikinaoogmang marhay an gabos niang linalang asin inaagda kita na maggayagaya kaiba nia. (Isaias 65:18) Mantang “an naggibo kan gabos na bagay iyo an Dios,” ki Jehova Dios an pinakakredito sa gabos na pagtotogdok na ini. (Hebreo 3:4) Pakapahayag kan siring na mga kaisipan, an espiker nagtao nin odok sa pusong pamibi, na idinededikar an Sentro nin Edukasyon kan Watchtower ki Jehova, an satong Kaharohalangkaweng Kaglalang.a

Daing duda na an bilog na semanang kapiestahan haloy na magigirumdoman kan mga nag-atender. Taano ta dai iareglo na sumongko sa Sentro nin Edukasyon kan Watchtower? Segurado kami na an pagdalaw asin pagpasyar dian magpaparigon sa boot nindo sa saindong mga paghihingoa na dakol pa an manodan manongod sa satong mamomoton na Kaglalang asin mamuhay kaoyon kan saiyang matanos na mga pamantayan.

[Nota sa Ibaba]

[Mga retrato sa pahina 10]

Auditoryum na pano nin tawo asin an dai magkaigong mga tawo duman sa komedor

[Mga retrato sa pahina 10]

An mga pagpasyar espesyalmenteng magayagayang kabtang