Estorya nin Buhay

An Paglilingkod ki Jehova—Sarong Onra Asin Pribilehio na Daing Kaagid

Isinaysay ni Zerah Stigers

An sakong agom, na nagin maimbod kong kaibaiba sa bilog na panahon na ministeryo, nagadan kan 1938. Huli kaiyan nabayaan akong may omboy asin 10 anyos na aking lalaki na aatamanon. Minsan ngani naghihimuyawot pa man giraray ako na maglingkod bilang bilog na panahon na ministro, paano ko magigibo iyan? Bago ko ipaliwanag kun paano, togotan nindo akong isaysay sa saindo sa halipot an manongod sa sakong buhay kan nakaagi.

DAI nahaloy pagkamundag ko kan Hulyo 27, 1907, sa Alabama, E.U.A., buminalyo an sakong mga magurang sa Georgia kaiba ako asin an tolo kong tugang. Dai nahaloy pakatapos kaiyan, nagduman kami sa Tennessee dangan duman sa harani sa Tampa, Florida. Mantang yaon duman, kan 1916, nadalan ko an slide show na “Photo-Drama of Creation” na may kaibang tanog. Nagpopoon pa sana kaidto an industriya nin pelikula, asin ikinaogmang marhay nin gabos an “Photo-Drama”!

Gustong-gusto kan sakong mga magurang na basahon An Torrengbantayan asin an iba pang publikasyon na basado sa Biblia. Minsan ngani ikinaogma ni Tatay an mga babasahon, kan panahon na iyan sia dai aktibong nakikiasosyar sa Mga Estudyante sa Biblia, na apod kaidto sa Mga Saksi ni Jehova. Minsan siring, kaming mga aki iniiba ni Nanay sa mga pagtiripon. Sa katunayan, dai nahaloy pagkabalyo mi sa Niles, Michigan, regular kaming nagbibiahe sa tren nin labing sampulong milya pasiring sa South Bend, Indiana, tanganing umatender sa mga pagtiripon.

Pag-abot nin panahon, kan Hulyo 22, 1924, nabautismohan ako bilang simbolo kan sakong pagdusay ki Jehova. Dai nahaloy pagkatapos kaiyan, inareglar ni Nanay an saiyang mga aktibidad tanganing magin colporteur, an apod kaidto sa bilog na panahon na mga ministro kan Mga Saksi ni Jehova. An marahayon na halimbawa nia asin kan iba pang colporteur itinadom sa sako an pagmawot na lumaog sa gibohon na iyan.

Pakanompong nin Sarong Kapartner

Mantang nag-aatender sa sarong dakulang kombension sa Indianapolis, Indiana, kan 1925, namidbid ko si James Stigers, na hale sa Chicago. Tolos-tolos na an nagin impresyon ko ki James iyo na sia sarong entusiastikong lingkod ni Jehova. Nakaistar ako mga 160 kilometros hale sa Chicago, kaya bakong pasil para sa samo na bisitahon an lambang saro. Kan panahon na iyan, saro sana an kongregasyon sa dakulang siudad na iyan, asin an mga pagtiripon ginigibo sa sarong inaarkilahan na kuarto sa ikaduwang iskalon. Parateng nagsusurat si James tanganing parigonon ako sa espirituwal. Ikinasal kami kan Disyembre 1926, asin pakalihis nin mga sangtaon, ipinangaki ko an samong matuang aki, si Eddie.

Dai nahaloy pagkatapos kaiyan, pinonan mi ni James an samong ministeryo bilang payunir na magkaibanan. Naglingkod kami sa walong estado—sa Michigan, Louisiana, Mississippi, South Dakota, Iowa, Nebraska, California, asin Illinois—na naeksperyensiahan an pinakanakakaogmang marhay na mga taon kan samong buhay. Naputol sana an maogmang mga panahon na idto bilang sarong pamilya kan magkahelang si James.

An pinansial na mga epekto kan paghelang ni James an nagin dahelan na bumalik kami sa Chicago kan 1936 tanganing mag-istar kaiba kan sakong panugangan na babae, na saro man na Saksi. Sa huring mga panahon kan paghelang ni James, mantang ako bados sa samong ikaduwang aki, nagtrabaho ako sa sarong kapeteria na an sueldo $1 kada aldaw. Sinegurado kan sakong namomotan na panugangan na babae na dakol kami nin kakanon, asin dai sia nag-aako ni sarong sentabo bilang kabayadan. Marahayon nanggad an pag-asikaso nia sa samo.

Si James naghelang nin mga duwang taon bago sia nagadan huli sa encephalitis, na paggatok kan hotok. Nangyari iyan kan Hulyo 1938. Durante kan saiyang paghelang, dai na nia kayang magmaneho o makikabtang sa ministeryo sa harong-harong, alagad nungka niang pinalampas an oportunidad na magpatotoo sa iba. Tanganing makatabang sa pinansial na pagsuportar sa samong pamilya, nagpondo ako sa bilog na panahon na ministeryo. Nakakua ako nin laen-laen na trabaho, na an kada saro naglawig nin kadikit sanang panahon.

An samong aki na si Bobby namundag kan Hulyo 30, 1938, walong aldaw sana pagkagadan kan saiyang ama. Minsan siring, dai ako tinogotan kan sakong panugangan na babae na magduman sa sarong ospital na dai naghahagad nin bayad alagad bakong gayong eksperyensiado an mga nagtatrabaho duman. Imbes, inareglar nia na magduman ako sa mas marahay na ospital asin atamanon kan saiyang doktor. Dugang pa, binayadan nia an gabos na gastos, na sarong kapahayagan kan Kristianong pagkamoot na inapresyar kong marhay.

Pagbalik sa Bilog na Panahon na Ministeryo

Padagos kaming nag-istar kaiba kan sakong panugangan na babae sagkod na si Bobby labi pa sanang 2 anyos, na sa panahon na iyan si Eddie 12 anyos na. Minsan ngani kaipuhan kong makibagay sa bago kong mga kamugtakan, makosog pa man giraray an pagmawot ko na maglingkod ki Jehova nin bilog na panahon. Sa kombension sa Detroit, Michigan, kan 1940, namidbid ko an sarong mag-agom na payunir na nagparigon sa sakong boot na magpasiring sa South Carolina tanganing magpayunir. Kaya nagbakal ako nin lunadan na 1935 Pontiac sa kantidad na $150 asin nag-andam tanganing bumalyo duman. Kan 1941, an taon na an Estados Unidos nagbale sa Guerra Mundial II, kami kan duwa kong aki nagbiahe patimog, asin naglaog giraray ako sa bilog na panahon na ministeryo.

Kan magbalyo kami sa South Carolina, an enot ming dinumanan iyo an Camden, sunod nagpasiring kami sa Little River, dangan sa Conway. Sa Conway, nagkaigwa ako nin sadit na harong na de rueda. Tinogotan ako nin sarong maboot na kagsadiri nin gasolinahan na magparada sa harani kan saiyang gasolinahan, makitakod sa saiyang linya nin gas asin elektrisidad, asin maggamit pa ngani kan kubeta sa gasolinahan. Durante kan Guerra Mundial II, irinarasyon an gasolina, kaya dai ako nakakakua nin gasolina. Kaya nagbakal ako nin segunda manong bisikleta. Dangan, kan 1943, kan garo baga imposible nang magpadagos sa pagpapayunir huli ta naubos na an samong kuarta, inimbitaran akong magin espesyal payunir; paagi kaiyan nakaresibi ako nin bulanan na paragastos tanganing makatabang sa samo. Sa nag-aging mga taon, dakulaon an itinabang sa sako ni Jehova!

Mayo nin ibang Saksi na nag-iistar sa Conway kan panahon na iyan, asin depisil para sa samo kan sakong mga aki na maglingkod sa ministeryo na kami sana. Kaya nagsurat ako asin naghagad nin kapartner na espesyal payunir, asin kan 1944, tinawan ako nin sarong marahayon na kapartner—si Edith Walker! Naglingkod kaming magkaibanan sa nagkapirang destino sa laog nin 16 na taon. Dangan, makamomondo na huli sa problema sa salud, kinaipuhan niang magbalik sa Ohio.

Dai Malilingawan na mga Bendisyon

Sa dakol kong maogmang rekuerdo kan mga taon na idto, dai ko noarin man malilingawan an 13 anyos na si Albertha, na nag-istar sa Conway asin nag-ataman sa saiyang lola na pilay asin duwang nguhod na tugang na lalaki. Namotan nia an mga katotoohan sa Biblia na itinokdo ko sa saiya asin gusto niang sabihon sa iba an manongod dian. Nagkaigwa man sia nin hararom na pag-apresyar sa paglilingkod bilang payunir asin nagpoon na magpayunir pagkagradwar nia sa haiskul kan 1950. Pakalihis nin labing 57 taon, sia yaon pa man giraray sa bilog na panahon na ministeryo!

Kan 1951, kaming duwa ni Edith idinestino na maglingkod nin kadikit na panahon sa Rock Hill, South Carolina, na duman kakadikit sana an Saksi. Dangan nagbalyo kami sa Elberton, Georgia, sa laog nin tolong taon. Dangan nagbuelta kami sa South Carolina, na duman ako nagdanay poon 1954 sagkod 1962. Sa Walhalla, namidbid ko an sarong may edad nang babae na an ngaran Nettie, na may diperensia sa pagdangog. Sia solong nakaistar sa sarong puerang lugar. Tanganing magibo an samong pag-adal sa Biblia, binabasa nia an sarong parapo sa publikasyon, itinotokdo ko an hapot para sa parapong iyan sa ibaba kan pahina, dangan itinotokdo nia an simbag sa parapo.

Kun may dai sia nasasabotan, isinusurat nia an saiyang hapot sa sarong kapidasong papel, asin isinusurat ko an simbag kasunod kaiyan. Pag-abot nin panahon, an pag-apresyar ni Nettie sa katotoohan sa Biblia tuminalubong marhay kaya nagpoon siang mag-atender sa mga pagtiripon kan kongregasyon saka makikabtang sa ministeryo sa harong-harong. Sia naghuhulit nin solo, alagad dai ako noarin man nagrarayo sa saiya, sa parate nasa ibong sana ako kan tinampo, na andam kun kaipuhan nia nin tabang.

Mantang ako nasa Walhalla, an sakong lumang lunadan dai na nag-andar. Nagkaigwa ako nin oportunidad na bumakal nin lunadan sa kantidad na $100, alagad mayo akong kuarta. Kinontak ko an sarong Saksi na may sadiring negosyo, asin pinautang nia ako nin $100. Dai nahaloy pagkatapos kaiyan, nakaresibi ako nin dai linalaoman na surat hale sa sakong tugang na babae na nagsasabi na naaraman pa sana kan sakong mga tugang na kan magadan an samong ama, may kuarta pa sia sa bangko. Pinag-olayan ninda kun ano an gigibohon sa kuarta, asin napagkaoyonan ninda gabos na ipadara iyan sa sako. An kantidad $100!

Pagpapayunir Kaiba kan Sakong mga Aki

Kan sinda mga aki pa, si Eddie asin Bobby kaiba ko sa gabos na panahon sa paghuhulit sa harong-harong. Kan mga panahon na idto, an mga tawo sa pangkagabsan mayo nin mga problema sa droga, asin an imoral na mga impluwensia bako pang gayong makosog arog ngonyan. An pagpapadanay na simple an samong buhay asin pagpokus sa paghuhulit nakatabang sa sako na malikayan an dakol sa mga problema na inaatubang kan mga magurang ngonyan sa pagpapadakula kan saindang mga aki tanganing maglingkod ki Jehova.

Si Eddie nag-eskuela sa Camden sagkod na matapos nia an ikawalong grado, na pagkatapos kaiyan gusto na niang magpayunir kaiba ko. Ikinaogma mi an samong paglilingkod bilang payunir na magkaibanan sa laog nin nagkapirang taon. Dangan nagkaigwa sia nin kamawotan na maglingkod sa pambilog na kinaban na opisina prinsipal kan Mga Saksi ni Jehova sa Brooklyn, Nueva York, na duman sia naglingkod poon 1947 sagkod 1957. Kan 1958 nagpakasal sinda ni Albertha, an dati kong inaadalan sa Biblia, asin sinda nagin magkapartner sa pagpapayunir. Kanigoan na kagayagayahan na kan 2004, kaming tolo magkairibang nag-adal sa Paadalan sa Paglilingkod Bilang Payunir!

Nagigirumdoman ko na sarong aldaw dakol na taon na an nakaagi, nadangog ko an sadit pang si Bobby na nakiolay ki Jehova sa pamibi na logod tabangan akong magkaigwa nin igong gasolina tanganing magamit an lunadan sa pagpasiring sa sakong regular na mga inaadalan sa Biblia. Sa bilog niang buhay, ipinaheling ni Bobby an pagkamoot sa ministeryo, asin ikinaogma nia an ministeryo bilang payunir sa laog nin nagkapirang taon. Makamomondo, si Bobby nakaeksperyensia man nin trahedya sa pamilya. Kan 1970, pakalihis sana nin 22 na bulan pagkakasal ninda, nagadan an saiyang agom huli sa pangangaki, asin nagadan man an kambal nindang omboy. Kaming duwa ni Bobby pirme nang nag-iistar na harani sa lambang saro, asin nagkaigwa kami nin dayupot na marhay na relasyon.

Nagpapayunir Pa Man Giraray!

Kan 1962, idinestino ako sa kongregasyon ko sa presente sa Lumberton, North Carolina, asin yaon pa man giraray ako digdi pakalihis nin 45 taon. Padagos akong nagmaneho kan sakong lunadan sagkod na ako labi nang 80 anyos. An saro sa mga pamilyang Saksi na nakaistar harani sa sako iniiba ako ngonyan sa mga pagtiripon kan kongregasyon asin sa paghuhulit.

Igwa ako nin walker asin silyang de rueda, alagad dai ko kaipuhan na gamiton an arin man dian, huling nakakalakaw ako na mayo nin ano man na tabang. Nagpapasalamat ako ki Jehova na ako may marahayon na salud, pero kasuarin pa sana nagkaigwa ako nin problema sa sakong mga mata. Nungka akong nagpapalta sa pagtiripon kan kongregasyon apuera sana kun ako may grabeng helang, asin padagos akong naglilingkod bilang sarong regular payunir na tinatawan nin konsiderasyon huli sa maluyang hawak.

Huling magayagayang nakapaglingkod sa ministeryo bilang payunir sa laog nin labing 70 taon, sinsero kong masasabi na tinabangan ako ni Jehova sa bilog kong buhay.a Aram ko na dai ako noarin man nagin matalion na tawo o marikason na magtrabaho, alagad aram ni Jehova kun ano an magigibo ko asin an dai ko magigibo. Nagpapasalamat akong marhay na aram niang nagmamaigot ako asin na ginamit nia ako.

Naniniwala ako na mahalaga an paglilingkod ki Jehova sa pinakalubos na mapupuede huli ta utang niato sa saiya an gabos na bagay. Sagkod na kaya ko, mayo na akong ibang gustong gibohon kundi maglingkod bilang payunir. Ini nagin marahayon nanggad na pribilehio! An sakong pamibi iyo na magamit logod ako ni Jehova sa bilog na panahon na daing sagkod.

[Nota sa Ibaba]

[Ritrato sa pahina 13]

Ginamit ming mag-agom an lunadan na ini sa gibohon bilang colporteur

[Ritrato sa pahina 14]

Kaiba ko an sakong mga aki kan 1941

[Ritrato sa pahina 15]

Kaiba ko si Eddie asin Bobby kasuarin pa sana