‘Aroaldaw na Dinadara ni Jehova an Pasan Para sa Sako’
Sa ibong kan paburubagong kamugtakan sa salud na garo baga haros dai ko na kayanon, namatian ko an mamumuton na pagsuportar kan satong namumutan na Ama sa langit sa bilog kong buhay. Asin sa labing 20 taon, nakanumpong ako nin daing kaagid na kagayagayahan sa paglilingkod ki Jehova bilang payunir.
Kan 1956, namundag ako na may spina bifida. Dai biyong nagsera an neural tube kan sakong gulod, kaya naapektaran an sakong mga nerbiyo. Huli kaini nadipisilan akong makalakaw asin nagkaigwa nin iba pang grabeng problema sa salud.
Bago ako namundag, may mga misyonerong Saksi ni Jehova na nagtukdo kan Bibliya sa sakong mga magurang. Kan ako aki pa, pipira pa sanang napapasuway na mga parahayag an nakaistar sa Usakos, Namibia, an ginikanan kong banwaan. Huli kaini, tinutukar mi an mga pag-aadalan para sa mga pagtiripon sa kongregasyon bilang pamilya. Sa edad na pito, nagpa-urostomy ako, sarong operasyon para makagibo nin artipisyal na labot sa sakong hawak tanganing makaihi ako. Sa edad na 14, nagka-epilepsy ako. Harayo sa samo an pinakaharaning eskuwelahan sa hayskul asin nangangaipo ako nin espesyal na pag-asikaso kan sakong mga magurang, kaya dai ako nakatapos nin pag-eskuwela.
Minsan siring, nagdesisyon akong pakusugon an relasyon ko ki Jehova. An dakul sa Kristiyanong mga publikasyon ta dai pa makukua sa Afrikaans, an nagimatan kong lengguwahe. Kaya nag-adal akong magbasa nin Ingles tanganing mapag-adalan an nagkapira sa mga libro niyato. Nagin akong parahayag kan Kahadian asin nabawtismuhan sa edad na 19. Durante kan suminunod na apat na taon, nagkaigwa ako nin dakul na problema sa salud asin emosyon. Huling an mga tawo sa lugar mi haraning marhay sa kada saro, an pagkatakot sa tawo an nakaulang sa sako na maigot na makikabtang sa ministeryo.
Kan ako labi nang 20 anyos, nagbalyo kami sa South Africa haling Namibia, asin sa inot na pagkakataon, nakapag-asosyar ako sa sarong kongregasyon. Makaugmahon nanggad idto! Pero, kinaipuhan ko giraray na maoperaran—colostomy na man ngunyan.
Paghaloy-haloy, nadangog ko an pahayag kan paraataman nin sirkito manungod sa temang pagpapayunir. Napahiro an puso ko sa mga sinabi niya. Aram kong dipisil para sa sako na makapagpayunir huli sa maluyang salud, pero nahiling ko kun paano ako tinabangan ni Jehova sa dakul na kadipisilan. Kaya nag-aplay ako bilang regular payunir. Alagad, huli sa problema ko sa salud, nagduwa-duwa an mga elder na aprubaran an aplikasyon ko.
Pero, nagdesisyon akong gibuhon an pinakamakakaya ko sa ministeryo. Sa tabang kan sakong ina asin nin iba pa, nahimo kong maabot an kahagadan na oras para sa sarong payunir sa laog nin anom na bulan. Napatunayan kaiyan na determinado akong magpayunir asin bakong ulang an problema ko sa salud. Nag-aplay giraray ako, asin inaprubaran na ngunyan an aplikasyon ko. Kan Setyembre 1, 1988, nagin regular payunir ako.
Bilang payunir, purupirmi kong naeeksperyensiyahan an pagsuportar ni Jehova. Imbes na magpokus sa kamugtakan ko, an pagtutukdo kan katotoohan sa mga baguhan nakaprotektar, nakapatalubo asin nakatabang sa sako na umuswag sa espirituwal. Labi-labing kagayagayahan an nakukua ko sa pagtabang sa nagkapirang indibidwal na makapagdusay asin mabawtismuhan.
Paburubago pa man giraray an kamugtakan kan sakong salud. Pero ‘aroaldaw na dinadara ni Jehova an pasan para sa sako.’ (Sal. 68:19, NW) Dai sana niya ginigibong makayanan ko an sakong mga problema kundi ginigibo niyang kawili-wili para sa sako na mabuhay!