Protektaran an Saindong Isip Laban sa mga Propaganda

Alerto si apostol Pablo sa peligrong dara kan mga propaganda ni Satanas, pero an iba niyang kapwa Kristiyano dai. Halimbawa, may nagkapira sa Corinto na minalataw na nagin sobra an tiwala sa sadiri—inisip ninda na masarig na sindang marhay sa katotoohan kaya nungka na sindang mabibiktima ni Satanas. (1 Cor. 10:12) Iyan an dahilan kaya itinao ni Pablo an patanid na ini: “Natatakot ako na, kun paanong nadaya kan halas si Eva paagi sa katusuhan kaini, tibaad maimpluwensiyahan nin maraot an saindong mga isip asin dai na kamo magin sinsero saka mabini, na iyo an dapat ipahiling nindo sa atubangan kan Cristo.”—2 Cor. 11:3.

Ipinapahiling kan mga sinabi ni Pablo na dai kita dapat na magin kampante. Tanganing maprotektaran an saimong isip laban sa mga propaganda, dapat aram mo kun gurano iyan kapeligroso asin protektaran an saimong sadiri laban sa mga iyan.

PROPAGANDA—GURANO IYAN KAPELIGROSO?

Ano an propaganda? Sa artikulong ini, nanunungod iyan sa paggamit nin mapandaya o salang impormasyon tanganing manipularon an isip asin paggawi nin mga tawo. Sabi kan iba, kapareho iyan nin “pagputik, pagbiribid nin mga impormasyon, pangloloko, pagmanipular, pagkontrol sa isip, [asin] pagraot nin kumpiyansa” saka sinasabi ninda na konektado iyan sa “mga taktikang sala, nakakaraot, asin bakong makatanusan.”—Propaganda and Persuasion.

Gurano kapeligroso an propaganda? Arog iyan sa nakakahilong gas na dai nahihiling asin mayong parong. Luway-luway na iniimpluwensiyahan kaiyan an satong isip sa paaging dai niyato naririsa. Huli kaiyan, ini an sinabi ni Vance Packard, na sarong espesyalista sa paggawi nin tawo: “Dakul sa sato an naiimpluwensiyahan na asin namamanipular, na dai ta naririsa.” Saro pang eksperto an nagsabi na huli sa propaganda, may mga lalaki asin babayi na “madalion sanang nadadara sa mangmang asin peligrosong paggawi”—arog nin ‘pag-ubos nin rasa, giyera, labi-labing pagkaanggot sa sarong rasa asin relihiyon, asin dakul pang ibang bakong lohikal na paggawi.’—Easily Led—A History of Propaganda.

Kun an mga tawo ngani nadadaya kita kan saindang propaganda, isipon na sana an kayang gibuhon ni Satanas. Puon pa sa paglalang, inaadalan na niya an paggawi nin mga tawo. “An bilog na kinaban” nasa irarom ngunyan kan saiyang kapangyarihan. Puwede niyang gamiton an ano man na kabtang kaiyan tanganing palakupon an saiyang mga kaputikan. (1 Juan 5:19; Juan 8:44) Epektibong marhay si Satanas sa ‘pagbuta kan isip kan mga tawo,’ mala ngani ta ngunyan ‘nadadaya na niya an bilog na kinaban.’ (2 Cor. 4:4; Kap. 12:9) Paano mo malalabanan an saiyang propaganda?

PAKUSUGON AN SAIMONG MGA DEPENSA

Itinao ni Jesus an simpleng paaging ini tanganing malabanan an propaganda: “[Aramon] nindo an katotoohan, asin an katotoohan mapatalingkas sa saindo.” (Juan 8:31, 32) Pero huling an katotoohan an inot na pinupuntirya kan kalaban, kaipuhan mo—arog nin sarong suldados na nasa kasagsagan nin giyera—an mapagkukuanan nin mapagtitiwalaan na impormasyon tanganing malikayan na madaya kan kalaban an isip mo. Itinao ni Jehova an impormasyon na ini. Mahihiling mo sa Bibliya an gabos na kaipuhan mo tanganing malabanan an propaganda ni Satanas.—2 Tim. 3:16, 17.

Siyempre, aram ini kan matibay na propagandista, si Satanas. Kaya ginagamit niya an saiyang sistema nin mga bagay tanganing disganaron kitang magbasa asin mag-adal nin Bibliya. Dai magpabiktima sa tusong mga pakana niya! (Efe. 6:11) ‘Sabuton nanggad nin lubos’ an katotoohan. (Efe. 3:18) Kaipuhan mong maghinguwang marhay para magibo iyan. Pero tandaan an simpleng katotoohan na sinabi kan awtor na si Noam Chomsky: “Mayo nin siisay man na malaag nin katotoohan sa isip mo. Ika mismo an mahanap kaiyan.” Kaya, ‘hanapon’ iyan paagi sa ‘maingat na pagsiyasat kan Kasuratan aroaldaw.’—Gibo 17:11.

Tandaan na habo ni Satanas na mag-isip ka nin malinaw asin masabutan mo an mga bagay-bagay. Taano? Huling an sabi nin sarong reperensiya, “magigin epektibong marhay” an propaganda “kun an mga tawo . . . dinidisganar na pag-isipan na marhay an mga bagay-bagay.” (Media and Society in the Twentieth Century) Kaya dai basta magtubod sa ano man na nadadangog mo na dai nguna iyan pinag-iisipan na marhay. (Tal. 14:15) Gamiton an itinao sa saimo nin Diyos na kakayahan na mag-isip tanganing maisapuso mo an katotoohan.—Tal. 2:10-15; Roma 12:1, 2.

MAGDANAY NA NAGKAKASARARO

Tibaad gamiton kan mga matibay mag-organisar nin pakikilaban an propaganda tanganing paluyahon an kumpiyansa kan mga kalaban asin madisganar nang makilaban. Tibaad sutsutan ninda an mga kalaban na suldados tanganing mag-iriwal an mga ini o dayaon sinda tanganing rumayo an mga ini sa panginot na hukbong nakikilaban. Uyon sa sarong Aleman na heneral, an saro daang dahilan kaya nadaog sinda kan Giyera Mundiyal I iyo na an mga tawo “nahipnotismo kan propaganda kan mga kalaban arog kan ginigibo nin halas sa sarong kuneho.” Naggagamit si Satanas nin kaagid na mga pandadaya tanganing rauton an pagkasararo kan mga Kristiyano ngunyan. Halimbawa, hinihinguwa niyang magkaigwa nin mga iriwal sa tahaw nin mga Kristiyano o sinusutsutan niya sinda na rumayo sa organisasyon ni Jehova huli sa sarong hinuhuna nindang inhustisya o salang nagibo sa sainda.

Dai magpadaya! Magpagiya sa Tataramon nin Diyos. Halimbawa, tanganing magdanay kamong nagkakasararo kan saimong mga kapagtubod, dinadagka ka kan Bibliya na padagos na ‘patawadon nin lubos an lambang saro’ asin husayon tulos an mga dai pagkakaintindihan. (Col. 3:13, 14; Mat. 5:23, 24) Pinapatanidan kita kaiyan na dai rumayo sa kongregasyon. (Tal. 18:1) Siguraduhon na andam ka na labanan an mga propaganda ni Satanas. Haputon an sadiri: ‘Ano an nangibabaw sa sako kan huring beses na makulgan ako kan sakong kapagtubod? An espiritu kan kinaban o an banal na espiritu nin Diyos?’—Gal. 5:16-26; Efe. 2:2, 3.

DAI TUGUTAN NA LUMUYA AN SAIMONG KUMPIYANSA

Kun bako nang maimbod an sarong suldados sa saiyang lider, dai na siya makikilaban na marhay. Kaya, hinihinguwa kan mga propagandista na rauton an kumpiyansa asin pagtitiwala kan mga suldados sa saindang lider. Tibaad gamiton ninda an mga propagandang arog kan: “Dai nindo mapagkakatiwalaan an saindong mga lider!” saka “Dai kamo magsunod sainda ta mapapahamak sana kamo!” Tanganing mas magin epektibo an mga pag-atakeng ini, tibaad may katusuhan nindang aprobetsaran an ano man na sala na tibaad magibo kan mga lider na iyan. Ginigibo ini ni Satanas. Dai siya nagpupundo sa paghihinguwa niyang paluyahon an saimong kumpiyansa sa mga ginagamit ni Jehova tanganing panginutan an saiyang banwaan.

Ano an pandepensa mo? Magin determinadong magdanay sa organisasyon ni Jehova asin maimbod na suportaran an mga ginagamit niya para manginot—makagibo man sinda nin sala huli sa pagigin bakong perpekto. (1 Tes. 5:12, 13) Dai “mawaran tulos kan [saimong] tultol na isip” pag napapaatubang sa garo baga nakakadanyar na mga pag-atake kan mga apostata o kan iba pang mga paradaya nin isip—dawa garo baga kapani-paniwala man an mga sinasabi ninda. (2 Tes. 2:2; Tito 1:10) Sunudon an sadol na itinao sa hoben na lalaking si Timoteo. Magdanay sa katotoohan na nanudan mo, asin dai paglingawan kun sain mo iyan nanudan. (2 Tim. 3:14, 15) Isipa man an dakul na ebidensiya na nagpapatunay na mapagtitiwalaan mo an pinakapaagihan na ginagamit ni Jehova sa laog nin haros sanggatos nang taon ngunyan tanganing panginutan kita sa dalan nin katotoohan.—Mat. 24:45-47; Heb. 13:7, 17.

DAI MATAKOT

Pero tandaan na may mga direktang propaganda man si Satanas. Kun minsan, ginagamit niya an taktika nin grabeng pananakot—“an saro sa pinakasuanoy sa gabos na klase nin propaganda.” (Easily Led—A History of Propaganda) Halimbawa, isinurat kan Britanong propesor na si Philip M. Taylor na dinominar kan mga Asiriano an saindang mga kalaban gamit an “palisiya nin grabeng pananakot na may kaibang propaganda.” Gagamiton ni Satanas an pagkatakot sa tawo, sa persekusyon, sa kagadanan, asin an iba pang klase nin salang pagkatakot tanganing purbaran na dominaron ka asin papunduhon sa paglilingkod ki Jehova.—Isa. 8:12; Jer. 42:11; Heb. 2:15.

Dai pagtugutan si Satanas na gamiton an pagkatakot tanganing paluyahon an saimong kumpiyansa o rauton an saimong integridad. Sinabi ni Jesus: “Dai kamo matakot sa mga minagadan kan hawak asin pagkatapos kaini dai na makakagibo nin ano pa man.” (Luc. 12:4) Magkaigwa nin lubos na kumpiyansa sa mga panuga ni Jehova na babantayan ka niya, na tatawan ka niya nin “puwersa na urog kisa sa ordinaryo,” asin na tatabangan ka niyang makayanan an ano man na pagpurbar na takuton ka tanganing dominaron ka.—2 Cor. 4:7-9; 1 Ped. 3:14.

Siyempre, may mga panahon na tibaad natatakot ka o malúya an saimong kumpiyansa. Pero pirming tandaan an nakakapakusog sa buot na mga sinabi ni Jehova ki Josue: ‘[Kusugi an buot mo] asin magpakakusog ka. Dai ka man mahandal, huli ta si Jehova na saimong Diyos madiyan sa saimo sain ka man paduman.’ (Jos. 1:9) Kun makamati ka nin kahaditan, magdulok tulos ki Jehova sa pamibi asin sabihon sa saiya an gabos mong ikinakahadit. Makakasigurado ka na “an katuninungan nin Diyos . . . magbabantay sa [saimong] puso asin kaisipan” tanganing magkaigwa ka kan kusog para malabanan an gabos na propaganda ni Satanas.—Fil. 4:6, 7, 13.

Pag-isipan an propagandang ginamit kan Asirianong mensahero, an Rabsake, laban sa banwaan nin Diyos. Garo man sana sinabi niya, ‘Mayong siisay man na makakaprotektar sa saindo laban sa Asiria. Dawa an Diyos nindong si Jehova dai kamo maililigtas.’ Kusog buot pa kaining sinabi: ‘Si Jehova mismo an nagsabi samo na laglagon an dagang ini.’ Ano an sinabi ni Jehova dapit diyan? ‘Dai ka matakot kan mga tataramon na saimong nadangog na iyo an mga ipinanglanghad sa sakuya kan mga uripon na lalaki kan hadi kan Asiria.’ (2 Ha. 18:22-25; 19:6) Pagkatapos, nagsugo siya nin sarong anghel tanganing gadanon an 185,000 na Asiriano sa laog sana nin sarong banggi!—2 Ha. 19:35.

MAGIN MADUNONG—PIRMING MAGDANGOG KI JEHOVA

Nakahiling ka na daw nin sarong pelikula na diyan may sarong karakter na hiling-hiling mong dinadaya asin minamanipular? Garo baga gusto mong sabihon: ‘Dai ka magtubod diyan! Pighahambugan ka ninda!’ Ngunyan, imahinara an mga anghel na ikinukurahaw an mensaheng iyan sa saimo: “Dai ka magpadaya sa mga kaputikan ni Satanas!”

Kaya, dai magdangog sa mga propaganda ni Satanas. (Tal. 26:24, 25) Magdangog ki Jehova asin magtiwala ka sa saiya sa gabos mong ginigibo. (Tal. 3:5-7) Namumutan asin dinadagka ka niya: ‘Magmadunong ka aki ko asin paugmaha an sakong puso.’ (Tal. 27:11) Kun gigibuhon mo ini, mapoprotektaran mo an saimong isip laban sa mga propaganda ni Satanas!