An Mamundong Katotoohan kan Kagadanan

IMAHINARON na naghihiling ka nin sarong pelikula manungod sa sarong sikat na tawo, tibaad sarong musikero na hinahangaan mo. Inot na ipinahiling an mga eksena kan aki pa siya, kan nag-aadal siyang magtugtog, asin an daing katapusan na pagpraktis niya. Tapos mahihiling mong nagtutugtog na siya sa mga concert, nagbibiyahe sa manlain-lain na nasyon, asin nagin sikat sa bilog na kinaban. Dai nahaloy, mahihiling mong gurang na siya, dangan sa katapusan kan pelikula—nagadan siya.

An pelikulang ini totoong istorya kan sarong tawo na gadan na ngunyan. Baga man an bida sa pelikula sarong musikero, siyentista, atleta, o iba pang sikat na tawo, pareho sana an magigin istorya. Posibleng dakul na bagay an nagibo niya, pero naisip mo na daw kun gurano pa kadakul an magigibo niya kun dai siya naggurang asin nagadan?

Nakakamundo kun iisipon, pero iyan an mangyayari sa sato gabos. (Parahulit 9:5) Ano man na paghihinguwa an gibuhon ta, dai ta madudulagan an paggurang asin kagadanan. Bako sana iyan, an buhay ta puwedeng biglang matapos huli sa aksidente o sa malalang hilang. Arog kan ilinaladawan sa Bibliya, garo kita alupuop “na minatunga nin dikit na panahon dangan nawawara.”—Santiago 4:14.

Para sa iba, an buhay garo mayong kasiguraduhan asin daing katuyuhan kaya sinusunod ninda an kaisipan na “magkarakan kita asin mag-irinom, ta sa aga magagadan na kita.” (1 Corinto 15:32) Pero bako daw na an pamumuhay sa arog kaiyan na paagi garo na man sana pag-ako kan mamundong katotoohan dapit sa kagadanan? Maabot an panahon—asin lalo na pag napapaatubang sa masakit na sitwasyon—tibaad maihapot mo, ‘Arog na sana daw kaini an buhay?’ Sain mo makukua an simbag?

Dakul sa ngunyan an nag-aasa sa siyensiya. Nakatabang an pag-uswag kan siyensiya asin medisina para mapalawig nin dikit an satong buhay. Asin may mga siyentista man na naghihinguwang mas mapalawig pa an buhay nin tawo. Ano man an magin resulta kan saindang paghihinguwa, yaon pa man giraray an hapot: Taano ta naggugurang kita asin nagagadan? May paglaom pa daw na madaog an satong kaiwal na kagadanan? Pag-uulayan iyan sa masunod na mga artikulo asin sisimbagon an hapot na, Arog na sana daw kaini an buhay?