Pag-aatubang kan Maogmang Bareta—Gumamit nin Epektibong mga Introduksion
1 Dakula an karahayan na magigibo sa satong ministeryo kun kita nag-andam nin epektibong mga introduksion. Kun dai niato makukua an atension kan kagharong sa kapinonan, tibaad dai kita makapukaw nin igong interes tanganing makadalaw liwat na may pasohan na makapoon nin pag-adal sa Biblia. Paano daw niato magigibong mas epektibo an satong mga introduksion?
AN KATUYOHAN NIN MGA INTRODUKSION
2 Primero, kaipuhan na malinaw sa satong isip an katuyohan nin mga introduksion. An School Guidebook nagsasabi: “An introduksion . . . maninigong makapukaw nin interes sa tema. Iyan kaipuhan na makaapod sa atension kan mga nagdadangog sa saindo asin andamon sinda na tawan nin paborableng paghorophorop an masunod.” Idinugang kan libro: “An saro sa pinakamarahay na paagi na mapukaw an interes . . . iyo an paghihingoa na iayon sa orolay an nagdadangog sa saindo.” (Helingon an pahina 113, par. 1, 2.) Paano niato magigibo ini sa ministeryo?
3 An mga introduksion na nasa pahina 9-15 kan librong Reasoning inandam na nasa isip an nasa itaas. Analisaron an mga ini. Mangnoha kun paano iyan nakapupukaw nin interes asin dinadara an atension kan mga kagharong sa mga temang pinag-oolayan. An sarong tugang na babae nagsabi na sa paggamit nin laen-laen na introduksion, nagin mas maogma an saiyang paglilingkod sa langtad asin nagin siang mapaggirumdom na makipag-olay sa mga tawo. Mapadapit sa mga suhestion sa librong Reasoning, sia nagsabi: “An mga iyan talagang epektibo.”
4 Anong mga introduksion an naheling nindong epektibo para sa presenteng Topikong Mapag-oolayan? Prinobaran na daw nindo an mga nalilista sa irarom kan “Bible/God” sa pahina 10 kan librong Reasoning? An saro kaiyan magagamit nin arog kaini: “Naoogma akong manompongan kamo digdi sa saindong harong. Dinadarahan ko nin nakapakokosog na punto hale sa Biblia an sakong pagtaraed. Naisip-isip na daw nindo kun ano an dahelan na an relihiyon magkaigwa nin tunay na halaga sa Dios?” An saro pang introduksion puwedeng arog kaini: “Dinadagka mi an mga tawo na basahon an saindang Biblia. An mga simbag na itinatao kaiyan sa mahahalagang hapot parateng nakasosorpresa sa mga tawo. Halimbawa, helinga kun paano ipinaliliwanag kan 2 Timoteo 3: 1, 2, asin 5 kun taano ta dai inaako nin Dios an nagkapira sa mga pagsamba na ginigibo nin relihiyosong mga tawo.”
5 Tibaad mas gusto nindong gumamit nin ibang introduksion apuwera sa mga nasa librong Reasoning. Minsan siring, maririsa nindo na pinakamarahay na arogon an mga introduksion sa librong Reasoning. Iyan nag-aatubang nin mga isyu na may labot sa mga tawo. Iinaayon kaiyan sa orolay an kagharong. Iyan halipot sana asin diretso sa punto. Kaya dakula an pakinabang sa maingat na pagsiyasat sa mga introduksion sa librong Reasoning dawa pa kun beses an saindong teritoryo tibaad mangaipo nin mga introduksion na mayo sa libro.
6 Sa ibong na kampi, an iba direktang binasa an angay na mga introduksion sa saindang librong Reasoning sa pakikipag-olay, nangorogna sa mga tawo na garo baga sibot. Paagi kaini sinda nagin dirediretso an pagtaram asin direkta sa punto, asin nakua an atension kan kagharong. Parate sindang pinadadagos tanganing ipagpadagos an orolay.
7 Boot niatong girumdomon kun gurano kahalaga kan enot niatong mga tataramon sa ministeryo sa langtad. Dakulaon an nasasarig sa pagigin epektibo kaiyan. Kapareho ni Salomon, maninigo man kitang humanap nin kawiliwiling mga tataramon sa satong pag-andam na gumamit nin epektibong mga introduksion sa satong pagharongharong. An librong Reasoning matabang sato sa paghanap na ini.—Ecl. 12: 9, 10.