Gamiton sa Epektibong Paagi an mga Artikulong May Espesyal na Katuyohan
1 Sa bilog na kinaban, poon kan 1979 sagkod 1987, an produksion nin magasin luminangkaw magpoon sa 394,899,446 sagkod sa 585,369,060, haros 50-porsientong paglangkaw. Asin labing 1,135,585,000 na kopya kan The Watchtower asin Awake! an inimprenta sa nakaaging duwang taon. Alagad an hapot, Magagamit daw niato nin mas epektibo pa an satong mga magasin?
2 Tanganing matabangan kamong gibohon ini, patienot na ipaiisi kan An Satong Ministeryo sa Kahadean an mga artikulong may espesyal na katuyohan o mga artikulo na tibaad pagkainteresan nin sarong partikular na grupo sa saindong teritoryo. Itatao an mga suhestion sa kun siisay an tibaad magusto digdi. Kun gusto nin mga parahayag nin dugang na kopya, ini maninigong pedidohon tolos.
3 Halimbawa, an Setyembre 8 Awake! may temang “Parents—You Have Homework Too!” An mga artikulo seguradong magugustohan nin lambang maestro asin administrador sa eskuwelahan ta idinodoon kaiyan an mga paninimbagan nin mga magurang na makikooperar sa eskuwelahan sa pag-edukar sa saindang mga aki.
4 An Oktubre 8 Awake! magkakaigwa nin halabang paliwanag sa helang na AIDS, na pagkakainteresan nin dakol, kaiba an mga nasa medikal na propesyon. Asin an Oktubre 22 na Awake! nagpapaliwanag manongod sa isyu nin diborsio asin poder sa aki. Tibaad boot nindong walatan nin sarong kopya an kada abogado asin parakonseho sa pamilya sa saindong teritoryo.