Ipagpadagos na Daing Ontok an Satong Ministeryo
1 Marikas na nagliliwat an kamugtakan kan kinaban na ini mantang kita orog na naghahaloy sa panahon kan katapusan. (1 Cor. 7:31) Bilang kaotoban kan hula sa Biblia, nangyayari an nakatatanyog sa kinaban na mga pangyayari. Mantang hinohorophorop niato an nangyayari kapwa sa kinaban na nasa palibot niato asin sa laog kan teokratikong organisasyon, nasasabotan niato kun gurano kaapretado na ihulit niato an “maogmang bareta” kan Kahadean.—Mar. 13:10.
2 Si Jesu-Cristo an nagboot na gumibo nin mga disipulo. (Mat. 28:19, 20) Isinaboot kan mga disipulo ni Jesus an saiyang mga tataramon, asin dawa napapaatubang sa makosog na pagtumang, “nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:42) Kanigoan karahay na halimbawa an itinao ninda sa sato!
3 Sa pagbasa niato kan 1990 Yearbook, naheheling niato na binendisyonan ni Jehova an satong ministeryo paagi sa pagpangyari nin marahay na mga pag-oswag sa bagong mga disipulo. Sa nagkapirang nasyon pambihira nanggad an mga pag-oswag na irineport. (Isa. 60:22) Alagad kumusta man an satong lokal na teritoryo? Asin kumusta man an satong indibiduwal na ministeryo? Ipinagpapadagos daw niatong daing ontok an satong indibiduwal na paghihingoa sa ministeryo?
AN SATONG INDIBIDUWAL NA KABTANG
4 Siyempre, bakong gabos na teritoryo parareho mabunga. (Ikomparar an Mateo 13:23.) Dakol an tumang sa nagkapirang lugar, asin sa iba man an kadaklan na tawo indiperente asin dai nagdadangog sa mensahe kan Kahadean. Sa iba man na lugar, kadakol kan trabahador sa oma kaya kakadikit na kan teritoryo. Alagad ano man na klase an teritoryo, dai dapat na lumuya an satong kaigotan. Si apostol Pablo nagsurat, “Dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.” (Gal. 6:9) Ano an makatatabang sato na ipagpadagos na daing ontok an satong ministeryo?
5 Makapagdadanay kitang aktibo asin magigin mapanggana an satong ministeryo kun kita magkokompiar ki Jehova asin magsasarig sa saiyang kosog na tumabang sa sato. Perming isaisip na si Jehova an nagpapagin mabunga sa langtad. (1 Cor. 3:6) Bilang simbag sa mga pamibi niato para sa tabang, si Jehova nagtatao nin hatol, praktikal na pagtotokdo, asin abundang suplay nin mga babasahon sa Biblia para sa personal niatong gamit asin sa pagtabang sa iba na mamidbid sia. Lubos daw niatong inaaprobetsaran an mga probisyon na ini?
PAPAGDANAYON AN TAMANG KAISIPAN
6 Kun negatibo an satong kaisipan, iyan puwedeng magin dakulang olang sa mabungang ministeryo. An kaisipan na iyan maririsa sa tono kan satong boses, sa satong panlauog, asin sa kakulangan nin maigot na pag-andam para sa paglilingkod sa langtad. Isinugo kita na maghulit asin magtokdo, asin dai kita sinabihan na tapos na an gibohon. An pagmawot niato na magin makinuyog asin mapagpasakop sa banal na paggiya maninigong magpahiro sato na ipagpadagos na daing ontok an satong ministeryo.
7 Padagos kitang makikabtang sa kagayagayahan kan ministeryo ngonyan asin halaton an daing sagkod na mga bendisyon kaiba kan banwaan nin Dios kun ipaheheling niato an satong pagtubod asin pagkamoot paagi sa pakikikabtang sa ministeryo nin daing ontok.