Magpatotoo sa Katotoohan
1 Nagpahayag si Jesus: “Ako namundag dahel kaini, asin dahel kaini ako napadigdi sa kinaban, tanganing ako magpatotoo sa katotoohan.”—Juan 18:37.
2 Paagi kan saiyang maigot na paghuhulit, tinawan nin onra ni Jesus an ngaran ni Jehova. Nagpaheling man sia nin tunay na pagkamoot sa mga tawo. Nagsurat si Mateo manongod ki Jesus: “Kan maheling nia an kadaklan naherak sia sainda, huli ta sinda maniwang asin nagkakaralagalag siring sa mga karnero na mayong pastor.” (Mat. 9:35, 36) Siring ki Jesus, an satong debosyon ki Jehova asin pagkamoot sa iba maninigong magpahiro sato na maghulit.
AN SATONG MAHALAGANG ASIGNASYON
3 An satong pagkamoot ki Jehova asin sa mga tawo magpapahiro sato na aprobetsaran an lambang oportunidad na magtokdo nin katotoohan manongod ki Jehova. (Sal. 96:2, 3; 145:10-13) Alagad, an mga kapurisawan sa buhay puwedeng madali sanang makaolang sato sa gibohon niatong pagpatotoo. Kaya kaipuhan na nakapokus kita sa pagkasibot sa pagpatotoo sa katotoohan asin dai malingling kan ibang bagay. (Mat. 24:14; 28:19, 20) An pagigin sibot sarong proteksion para sa sato asin ini magpapangyari nin daing sagkod na mga pakinabang sa mga naghihinanyog sa sato.—1 Cor. 15:58.
4 Puwede daw kamong maglingkod bilang regular o auxiliary payunir? Taano ta dai konsideraron an saindong mga kamugtakan tanganing maheling kun puwede nindong pahiwason an saindong paglilingkod sa paaging ini? Nagretiro na daw kamo sa sekular na trabaho? Taano ta dai gamiton nin orog na lubos an saindong panahon sa paghuhulit? Dakol na hobenes sa eskuwelahan an regular na nag-aauxiliary payunir asin narealisar na ini nakagiginhawa kapwa sa espirituwal asin pisikal na paagi.
5 An epektibong pagpatotoo sa katotoohan nangangaipo nin maingat na pag-iskedyul kan satong panahon. (Efe. 5:15, 16) An pag-auxiliary payunir nangangaipo sa promedyo nin duwang oras sana kada aldaw. Pinili kan ibang magmata na mas amay nin sarong oras tanganing makaluwas sinda sa paglilingkod bago maglaog sa eskuwela o sa trabaho. Dakol na kongregasyon an nakatabang sa mga auxiliary payunir paagi sa pag-areglo nin pagpatotoo kun banggi. Siring man, puwede kamong mapakosog asin mag-ako nin nakatatabang na mga suhestion paagi sa pakikipag-olay sa iba na nagin mapanggana sa pag-iskedyul kan saindang panahon tanganing mag-auxiliary payunir.
6 An mga naglilingkod ki Jehova na may kaimbodan nag-aako nin abunda nanggad na mga bendisyon. Naoogma siang akoon an ano man na itinotogot kan satong mga kamugtakan na gibohon niato mantang nagpapatotoo kita sa katotoohan.—Heb. 6:10.