Pag-aatubang kan Maogmang Bareta—Paagi sa Pakikipag-olay sa mga Tawo
1 An pakikipag-olay “pakikipagribayan nin mga sentimiento, obserbasyon, opinyon, o mga ideya.” Alagad paano kamo makapopoon nin pakikipag-olay manongod sa Biblia sa mga tawo na tumang o sibot sa saindang sadiring mga gibohon? Si Jesus naghapot tanganing mapalabot an mga nagdadangog saiya.—Juan 4:9-15, 41, 42.
2 Maninigo kitang mamibi sa Dios tanganing tabangan kita na manompongan an sadiosan an pusong mga tawo asin mabukasan an paagi para sa sato sa pakikipag-olay sainda. An pagpatotoo nagigin mas pasil kun minamansay niato an lambang kagharong bilang sarong potensial na lingkod ni Jehova. Sa siring ikahihiras niato an katotoohan sa maogma, sinserong paagi na makaaakit sa mga interesadong tawo.
GAMITON AN YAON SA SATO
3 An librong Reasoning nag-aalok nin dakol na mararahay na introduksion sa pahina 9-15. An kadaklan kaiyan epektibong naggagamit nin mga hapot. Kun an kagharong magsimbag sa hapot, magalang na maghinanyog asin konsideraron an saiyang opinyon kun masimbag kamo.—Col. 4:6.
4 Siyempre, kun naghahapot kamo, dai nindo aram kun paano masimbag an kagharong. Kaya magin andam na ibagay an saindong pag-oolay. Magmaigot na pagdanayon an pag-oolay paagi sa pagtao nin dugang na impormasyon hale sa Biblia may koneksion sa saiyang kinawiwilihan asin paagi sa dugang na mga hapot.
MAG-ANDAM NIN PATIENOT
5 Pumili nin mga introduksion sa librong Reasoning na magigin pinakaepektibo sa saindong partikular na teritoryo. Ibagay an saro sa mga ini sa presenteng Topikong Mapag-oolayan. Magpoon sa mga bagay na kinaiinteresan kan kagharong, iatubang sa halipot an problema, dangan itao an solusyon kan Biblia. Kun magkomento sia, likayan an pagkritisar sa saiyang sinabi. Hanapon an mga puntong pagkakaoyonan asin komentohan an mga ini. Magpokus sa positibong mga bagay siring sa mga bendisyon kan Kahadean bilang an solusyon kan Biblia sa mga problema nin tawo.
6 Kun maheling nindong bakong rasonable an tawo, dai magpirit na akoon nia an sinabi nindo. Imbes magtapos paagi sa makikatood na komento, na minahaleng bukas an dalan para sa masunod na oportunidad na makipag-olay sa saiya.—Tal. 12:8, 18.
7 An ibang tawo mas gustong makipag-olay kun manompongan nindo sinda sa impormal na paagi. Dai magduwaduwang magpoon nin pakikipag-olay sa mga tawo na nanompongan nindo sa tinampo o nagpapahayahay sa saindang natad. Kun nagpopoon kamo nin pakikipag-olay, pagmaigotan na gibohon ining maogmang eksperyensia kan kagharong. Sagkod sa maninigo saindo, magwalat sa tawo nin mas paborableng kaisipan sa Dios, sa saiyang Tataramon, asin sa saiyang mga lingkod. Sa paaging ini an kagharong tibaad magin mas madaling mag-ako sa masunod na pagsongko nin Saksi.