Hapot

● Taano ta mahalagang tapuson nin lubos an pag-adal sa duwang libro sa bagong mga disipulo maski ngani nabautismohan na sinda bago matapos an ikaduwang libro?

An mga bagohan nangangaipo nin tabang tanganing makaabot sa tamang kaaraman kan katotoohan. (Col. 1:9, 10) Igwa kita nin pribilehiyo na tabangan sinda na magkaigwa nin mahusay na pakasabot sa pangenot na mga doktrina kan Biblia, sa moral na mga pamantayan kan Biblia, asin sa konektadong mga bagay. Ini makatatabang sainda na marigon na maestablisar sa katotoohan tanganing mapangganahan an ano man na pagbalo na tibaad mangyari sa ngapit.

An mga estudyante nangangaipong magin maygurang sa pakasabot. (1 Cor. 14:20) Tanganing magin maygurang na tawo sa espirituwal, an personal na pag-adal nin Biblia kairiba nin paratokdo makatatabang. Kaya an kadonongan nagtotokdo na an saiyang kinokonduktahan sa pag-adal nin Biblia sa harong maninigong magpadagos sagkod na makompleto an pag-adal sa duwang libro.

PAKATAPOS NIN BAUTISMO

Sinabi ni Jesus na maninigo kitang gumibo nin mga disipulo​—bautismohan asin tokdoan sinda. (Mat. 28:​19, 20) An kadaklan sa pagtotokdo ginigibo pakatapos nin bautismo. An kaaraman sa saro sanang libro parateng bakong igo tanganing malubos an saiyang espirituwal na pagpatood. Kaipuhan an dugang na instruksion tanganing ibagay sia sa ministeryo asin masangkapan sia tanganing madaog an mga pangigipit na nangyayari sa mga naglilingkod ki Jehova ngonyan. An enot na publikasyon na pinag-adalan nagtatao nin pakasabot sa mga pundamental. An ikaduwang publikasyon nagkokobre sa Kristianong mga kuwalidad. An mga publikasyon na ini puwedeng an librong Mabuhay Sagkod Lamang asin dangan arin man sa librong United in Worship o librong Tunay na Katoninongan. An pagpadagos sa pag-adal sagkod na matapos an ikaduwang libro nagtatao nin mahusay na edukasyon sa mga katuyohan ni Jehova siring man sa saiyang halangkaw na Kristianong mga pamantayan. Makatatabang ini sa bagohan na magin marigon na nakagamot sa pagtubod. (Col. 2:7) Para sa dugang na impormasyon sa pagreport kan siring na mga pag-adal, helingon an “Hapot” sa Enero, 1988 An Satong Ministeryo sa Kahadean.

Siyempre, pakatapos nin bautismo an mga bagohan maninigong laoman na magkaigwa nin espirituwal na pag-oswag. (Heb. 6:​1-3) Sa kadaklan na kamugtakan dai naghahaloy an pagtapos sa ikaduwang libro. An bagong persona sa siring natatawan nin marigon na pundasyon.