Iareglo Na Ngonyan na Umatender sa “Mga Mamomoton sa Katalingkasan” na Pandistritong Kombension sa 1991
1 Huli sa mga kamugtakan ngonyan sa kinaban, bakong makangangalas na sa dakol na kadagaan an mga tawo nagmamawot nin orog na katalingkasan. Alagad ta saen daw manonompongan an tunay na katalingkasan? Si Jesu-Cristo nagsabi: “Kun kamo magdanay sa sakong tataramon, kamo tunay na sakong mga disipulo, asin mamimidbid nindo an katotoohan, asin bubutasan kamo kan katotoohan.” (Juan 8:31, 32) An katalingkasan na ini bakong an limitadong katalingkasan na linalaoman nin mga tawo kun isinisikwal ninda an sarong klase nin gobyerno apabor sa iba. Imbes, iyan sa mismong kairairaromi kan mga problema nin tawo. An sinasabi ni Jesus katalingkasan sa kaoripnan sa kasalan. (Helingon an Juan 8:24, 34-36.) Kaya, kun an saro nagigin tunay na disipulo ni Jesu-Cristo, iyan nagbubunga nin risang pagbago kan saiyang buhay, pagkatalingkas.
2 TOLONG ALDAW NA KOMBENSION: An serye kan “Mga Mamomoton sa Katalingkasan” na Pandistritong mga Kombension sa 1991 mapoon digdi sa Pilipinas sa Disyembre 13-15, 1991. An enot na sesyon mapoon sa alas 8:50 n.a. sa Biyernes, asin an kombension matatapos mga alas 4 n.h. sa Domingo. Iaatubang sa kada sesyon an maingat an pagkapiling impormasyon na kaipuhan sa satong espirituwal na salud. Itatampok nin laen-laen na tema kun paano mapapasatuya an katalingkasan na sinasabi sa Roma 8:21. An nakapupukaw na impormasyon ipaliliwanag asin iaatubang sa mga pahayag, demonstrasyon, interbio, asin sarong drama.
3 Gibohon nindong desisyon na dai magpalta minsan sa sarong sesyon. Tibaad hagadon kaini an personal na mga pagsasakripisyo asin pagliliwat sa saindong iskedyul. Tibaad kaipuhan na kamo gumibo nin espesyal na pakiareglo sa saindong among. An dakol isinasakripisyo pa ngani an pinansial na mga bentaha tanganing makaatender sa gabos na sesyon. Tunay na bibendisyonan ni Jehova an mga ipinamimibi nin odok an bagay na iyan asin ginigibo an maigot na paghihingoa na makaatender.—Luc. 13:24.
4 UMABOT NIN AMAY: An mga Saksi ni Jehova midbid sa saindang mga paghihingoa na magin masasarigan asin nasa oras. (Luc. 16:10) Ini mahalaga man sa pag-atender sa pandistritong kombension. Umabot nin amay kada aldaw, asin tumukaw na bago pumoon an programa. Kakaipuhanon kaini an pagtao nin bastanteng oras sa pag-asikaso sa mga nagkakaipo nin atension, arog baga kan pagparada kan saindong sakayan asin paghanap nin tukawan para sa saindong pamilya.
5 An pag-atender sa pandistritong kombension nagtatao sato nin marahay na oportunidad na magkaigwa nin nakaoogmang asosasyon. Alagad an pagsongko sa mga katood sagkod sa matangang banggi makaoolang sa satong mga paghihingoa na umabot nin nasa oras pagkaaga. Dakulang kahaditan asin pagkabigo an puwedeng ibunga nin pagigin huri asin paghihidale sa aga. Tanganing malikayan ini, kapakipakinabang na matorog nin igo asin magin andam para sa amay na paghale pagkaaga. Linilikayan kaini an pag-abot na nagpopoon na an programa, na nakaiistorbo asin tibaad ikauyam kan mga nagtutukaw na. An pag-abot nin amay matogot saindo na makiestoryahan sa saindong mga tugang. An Kristianong pagkamoot asin konsiderasyon, kaiba an paggalang ki Jehova asin sa espirituwal na mga bagay na saiyang itinatao, maninigong magmotibar sato na umabot nin tama sa oras kada aldaw.
6 MAGHINANYOG NIN ODOK: An paghinanyog nangangahulogan na talagang pag-atento paagi kapwa sa satong isip asin puso. Kaipuhan na kita maghinanyog asin “dangogon an tataramon ni Jehova.” (Jer. 2:4) Sa Isaias 55:2 pinagbotan ni Jehova an Israel: “Maghinanyog kamo nin odok sa sako.” An terminong “odok” tinawan nin kahulogan na “itinatao na may pinipirit o galagang atension.” Kun kita atento, kita galagang “maghihinanyog asin mag-aako nin dagdag na pakanood.” (Tal. 1:5) An paghinanyog asin pakanood sa pandistritong kombension sa parate nagkakaipo nin orog na paghihingoa kisa sa Kingdom Hall. Taano? Kita mas haloy na nagtutukaw, asin mas dakol an istorbo huli sa darakulang kadaklan na nag-atender. Kun kita bakong atento, malilihisan niato an masiram na espirituwal na pagkakan na itinagama. (1 Ped. 2:2) Ano daw an magigibo? Nakaoogmang mamasdan na an dakol na delegado sa kombension nagkukua nin nota sa oras kan programa. Minsan ngani an ibang pahayag sa pandistritong kombension maluwas sa mga publikasyon pag-abot nin panahon, an iba dai. An gabos dinadagka na kumua nin haralipot na nota sa panahon kan pandistritong kombension ta iyan marahay na paagi na ikapako an saindong atension sa sinasabi.
7 An nota dai man kaipuhan na halabaon o komplikado. Parate na igo na an saro o duwang frase para sa sarong mayor na punto. Minsan mga aki orog na makikinabang sa mga pahayag asin matatabangan na mag-atento kun sinda tatawan nin notebook asin panurat tanganing ikasurat ninda an pangenot na mga punto kan espiker asin pangenot na mga teksto o bagong mga ideya na tibaad iatubang. Nanompongan nin kamagurangan na kapakipakinabang an pagkaigwa nin aregladong nota sa pangengenot sa kawiliwiling repaso sa programa kan kombension sa Pagtiripon sa Paglilingkod pakalihis kan pandistritong kombension. Saro pa, tibaad boot nindang gamiton sa saindang pagtotokdo asin pagpapastor an dakol na puntong iinatubang sa kombension.
8 MAGKASARARO SA AWIT ASIN PAMIBI: Kaiba sa satong pagsamba an pagtaong onra ki Jehova paagi sa pag-awit nin mga pag-omaw sa saiya, arog kan ginibo ni Jesus asin kan saiyang mga apostol. (Mar. 14:26) An tataramon ni Pablo sa 1 Corinto 14:15 minalataw na nagpaparisa na an pag-awit regular na kabtang kan Kristianong pagsamba. (Helingon man An Satong Ministeryo sa Kahadean kan Abril, 1991, pahina 7.) An pandistritong mga kombension nagtatao sato nin pambihirang oportunidad na makasaro kan rinibo niatong tugang sa pag-omaw ki Jehova sa pag-awit asin pamibi. Minsan siring, an iba nagpaheling nin kakulangan nin paggalang sa mahahalagang kabtang na ini kan satong pagsamba. Paano? Paagi sa dai man kutana dapat na pag-abot sa kombension sa oras o pakatapos kan pambukas na awit asin pamibi. Pagkatapos kan programa, an iba minahale na sa saindang tukawan mantang nag-aawit o bago an pamibi. Sa pambihirang mga okasyon tibaad may marahay na dahelan na gibohon ini. Minsan siring, ikinapaheheling daw an tamang paggalang sa lamesa ni Jehova kun an iba pinalilihis an oportunidad na sararong umawit asin mamibi tangani sanang makasakay na sa saindang kotse o makakakan nin amay?—Mat. 6:33.
9 Kaipuhan na mag-ingat na sa paghanap nin personal na kapasilan, dai niato itogot na an kinabanon na kaisipan na ako nguna o mga ugale arog baga kan kahanaban o kapasloan makaolang sa satong espirituwal na pag-oswag. Sa nakaaagi pa sanang mga taon, an dakol niatong tugang sa Sirangan na Europa sa katapustapusi nagkamit kan katalingkasan na umawit asin mamibi. Kun paanong sinda naogma nin makuri na makaawit asin makapamibi sa darakulang kabilangan, ipaheling man logod niato an kaparehong espiritu nin pag-apresyar sa banal na mga bagay ngonyan asin nungka na basangbasangon an satong mga oportunidad na umawit asin mamibi nin iriba.
10 AN SATONG UGALENG KRISTIANO: Huli sa satong Kristianong ugale asin itsura sa mga kombension nagkaigwa kita nin marahay na reputasyon bilang mga Saksi ni Jehova. Ini huli ta seryoso kita sa satong pagsamba ki Jehova asin dai niato ibinibilang na eskursion sana an pag-atender sa kombension. Kun nag-aatender sa siring na espesyal na mga okasyon, maninigo niatong papagdanayon an Kristianong dignidad asin espirituwal na kaisipan paagi sa paggawe bilang mga ministro sa gabos na panahon.—1 Cor. 10:31-33.
11 Kun ini dai niato magibo, apektado niato an kaogmahan nin iba, na nasisingkog pa ngani an mga bagohan. Pinasasalamatan daw niato minsan an saradit na kabootan na ipinaheheling sa sato? Kaipuhan na risahon niato an ibang nasa palibot niato asin magpaheling nin paggalang saka konsiderasyon. Maninigong masabotan nin gabos na kun may programa, iyan panahon na maghinanyog, bakong mamasyar o mag-estoryahan.—Deut. 31:12.
12 An saro pang lugar na an satong ugaleng Kristiano makapamumuraway ki Jehova Dios iyo an satong ugale sa mga nagpapadagos sa sato. Kun kita nagdagos sa motel, maninigo kitang magpaheling nin apresasyon asin konsiderasyon sa mga nagtatrabaho sa motel, na magalang asin dai pakasakit. (Gal. 6:10) An ibang Saksi naghale sa motel asin binayaan an saindang kuwarto na makanuson. An kalinigan asin konsiderasyon maninigong ipaheling bako sanang sa satong gubing asin gawe-gawe kundi pati sa pagtratar niato sa mga rogaring nin iba. Kun an mga opisyales kan istadyum may kabootan na tinogotan kitang gamiton an sarong kabtang kaiyan na dadagusan, kun siring an lugar na ginagamit niato maninigong perming areglado asin malinig, asin maninigong linigan niato an mga kuwarto asin bayaan iyan na nasa marahay na kamugtakan pakalihis kan kombension. Iyo, sa nagdadangadang na mga pandistritong kombension, kita gabos maninigong magdesisyon na gumawe sa paaging ‘masamnohan niato an katokdoan kan satong Paraligtas, an Dios, sa gabos na bagay.’—Tito 2:10.
13 Sa ibang kombension narisa kan nakaaging taon na kadakol na basura an iwinalat sa assembly hall. Dakol na kapidasong papel, patos nin dulse, bote, asin iba pang lalagan, an iwinalat na sana sa mga tukawan. Ini tunay na dai nagpapaheling nin paggalang sa ngaran ni Jehova ni konsiderasyon man sa mga naasignaran na maglinig paghale niato. Seguradohon na puroton an ano man na maheling niatong basura asin iapon iyan sa tamang mga basurahan, o kun kulang ini, ipuli iyan tanganing duman iapon.
14 Sa kombension an satong isip maninigong nakasentro sa espirituwal na mga bagay. Kun siring dai niato igagalang an lamesa ni Jehova kun gagamiton niato an okasyon sa pagnenegosyo o paghanap nin kuwarta, na inaaprobetsaran an dakulang kadaklan nin mga tugang na nag-atender. Liwat boot niamong ipagirumdom sa gabos na dai itotogot an pagtinda nin personal na mga bagay sa laog kan kombension, asin mga bagay sana kan Sosyedad an puwede sa bookroom o iba pang departamento kan kombension.
15 Kaoyon kaiyan, an mga departamento nin refreshment sirrado sa oras kan gabos na sesyon kan kombension, kaya kaipuhan na kumua kan kaipuhan nindo sa pag-oltanan nin mga sesyon. Paagi kaini an gabos makakapaghinanyog kan sinasabi hale sa plataporma, pati an mga nagtatrabaho sa mga departamento nin refreshment.
16 PARA SA MGA MAGURANG: An mga aki asin tin-edyer imbitado asin linalaoman na umatender sa “Mga Mamomoton sa Katalingkasan” na Pandistritong Kombension. An katalingkasan na iinoopresir kan kinaban puwedeng gumiya sa saindang espirituwal na kagadanan, kun paanong iwinara ni Adan an katalingkasan na itinao sa katawohan kan kapinonan. An mamomoton na organisasyon ni Jehova nagtao sato gabos kan tamang pangangatanosan sa bagay na ini. Napakokosog kita na maheling an mga aki na nakanood na mag-atento sa gabos na Kristianong pagtiripon asin interesado nanggad sa programa kan kombension. (Sal. 148:12, 13) Alagad iyan dependeng gayo sa halimbawa asin pag-asikaso kan mga magurang. An dakol na aki tinokdoan na kumua nin mga nota. Kun dai pa nindo tinotokdoan an saindong mga aki kun paano makua nin nota, taano ta dai gamiton an panahon na natatada bago an saindong kombension sa paggibo kaiyan? Minsan an saraditon pa puwede nang sadolon na isurat an mga teksto asin konektadong pangenot na mga tataramon na nadadangog ninda sa espiker. An ibang magurang iinareglo na repasohon an pangenot na mga punto kan programa sa aldaw na iyan pakapuli o mantang nagbibiyahe papuli.
17 Siyempre, an kadaklan na magurang nakasasabot na an natural na hilig nin mga aki magkawat. Kulang sinda nin kabatidan sa buhay, asin bako pa sindang maygurang. Kun siring, kaipuhan sindang tokdoan kun noarin dapat na maghinanyog asin kun paano magawe sa mga pagtiripon. Ini nagkakaipo nin marahay na pag-asikaso kan mga magurang. An ibang magurang nagin pabaya sa bagay na ini. Kun beses, minsan ngani an mga magurang tibaad nagpapaheling nin maninigong paggalang ki Jehova sa oras nin pamibi, an saindang mga aki nagkakawat asin nakaiistorbo sa iba. Maninigong aram nin mga magurang kun ano an ginigibo kan saindang mga aki minsan sa oras nin mga pamibi. Saro pa, ano an ginigibo ninda kun sinda minahale sa saindang tukawan sa oras kan programa? Pinababayaan daw na daing pag-asikaso an mga aki sa oras o pakalihis kan programa kan kombension?—Tal. 29:15.
18 Sa nagkapirang kaso an mga aki pinabayaan sa mga banggi, kun an mga magurang namamanggi o may ibang ginigibo. Ini bakong tama. An ibang aki nagin suwayan asin tumangan pa ngani sa may edad nang mga tugang na nagprobar na itanos sinda sa maboot na paagi. An siring na pagkasuwayan parateng bunga nin pagkonsinte asin kakulangan nin disiplina sa harong. Tunay na iyan maninigong itanos. An gabos na Kristianong magurang maninigong asikasohon nin igo an saindang mga aki sa gabos na panahon mantang sinda ‘pinadadakula ninda sa disiplina asin pagtatanos nin isip ni Jehova.’—Efe. 6:4.
19 INAAPRESYAR AN SAINDONG LUBOS NA KOOPERASYON: Dakulang pagpaplano an ginibo tanganing masierto na may bastanteng tukawan, literatura, kakanon, asin iba pang probisyon para sa gabos na nag-aatender sa kombension. Tanganing masierto na epektibo an mga areglong ini, an kada kongregasyon iinasignar sa sarong kombension. Kaipuhan an lubos nindong kooperasyon tanganing malikayan an pagsurusuan. Siyempre, tibaad may mga kamugtakan na huli kaiyan an nagkapira kaipuhan na umatender nin kombension sa ibang lugar. Minsan siring, an kadaklan maninigong makaatender sa kombension sa lugar na asignado sa sainda.—1 Cor. 13:5; Fil. 2:4.
20 Hinahagad an lubos nindong kooperasyon sa pagreserba nin tukawan. Tabi girumdomon na AN MGA TUKAWAN IKARERESERBA SANA PARA SA MGA MIEMBRO KAN SAINDONG PAMILYA ASIN SA SIISAY MAN NA KAIBA NINDO SA BIYAHE SA SAINDONG KOTSE. Tabi dai magreserba nin tukawan para sa iba. Kun beses, mayo man nin partikular na rinireserbahan nin tukawan. Ini bakong mamomoton asin nakadadaya sa mga attendant asin iba pang naghahanap nin tukawan. Kaoyon sa hatol kan Biblia, maninigo na kita maghingoa na magpaheling nin pagkamoot sa tugang asin lubos na magkooperar sa aprobadong areglo sa pagreserba nin tukawan. Mayo nin maninigong kumua nin mga tukawan na sobra sa kinakaipuhan kan saiyang pamilya o mga kalunad sa kotse.—2 Ped. 1:7.
21 Dai itinotogot an pagreserba nin tukawan sa banggi para sa masunod na aldaw. An mga minaabot nin amay sa aga maninigong kuyogon nin estrikto an mga giyang nasa enotan manongod sa pagreserba nin tukawan. An mga attendant maninigong amay pa nasa mga lugar nang asignado sa sainda tanganing mabantayan an ginigibo, tanganing malikayan an pag-abuso sa giyang itinao kan Sosyedad sa pagreserba nin tukawan. Tabi lubos na makikooperar sa mga attendant mantang inootob ninda an saindang mga asignasyon sa kapakinabangan kan gabos na nag-atender.
22 Isinusuherir na gamiton an marahay na paghusgar sa pagdara sa kombension nin personal na mga bagay. An iba nagdara nin darakulang kasangkapan na dai ikabugtak sa mga tukawan kaya ibinugtak sa mga agihan o haraning mga tukawan. Huli kaini nawaran nin tukawan an iba, asin kun beses nakakapiot sa mga agihan. Kaipuhan na magpaheling kita nin konsiderasyon sa siring na mga bagay.
23 Tunay na inaapresyar kan banwaan ni Jehova an pakapagtiripon sa magagayon na pasilidad tanganing makinabang sa inandam na espirituwal na programa. Inaapresyar man niato an dakol na serbisyo asin mga kapasilan na itinagama sa siring na katiriponan. Sa dakulang pangangataman asin gastos kan Sosyedad, ginigibo an mga areglo para sa bastanteng tukawan, pag-instalar nin mamahalon na mga sound system, pagkaigwa nin Food Service Department, asin pag-asikaso sa iba pang mga areglo asin serbisyo na minagibo sa pag-atender sa kombension na maogma asin nakarerepresko sa espirituwal.
24 An mga gastos na ini nababayadan kan saindong boluntad na mga kontribusyon sa pagsuportar sa lakop sa kinaban na gibohon kan Sosyedad. Tanganing kombenyente sa saindo, an may klarong tandang mga kahon sa kontribusyon ilalakop sa lugar kan kombension. An gabos na kontribusyon pinasasalamatan na gayo, asin an Sosyedad boot na patienot na magpasalamat sa saindo para sa saindong matinao asin sararong pagsuportar sa intereses kan Kahadean sa paaging ini. Kami nagsasarig na an gabos mapahihirong mamatean an saindang indibiduwal na paninimbagan sa bagay na ini asin lubos na makooperar paagi sa pakikikabtang sono sa itinotogot kan saindang kamugtakan.—Luc. 6:38.
25 UMATENDER SA “MGA MAMOMOTON SA KATALINGKASAN” NA PANDISTRITONG KOMBENSION! Paagi sa pag-atender sa “Mga Mamomoton sa Katalingkasan” na Pandistritong Kombension asin paghinanyog nin maingat sa programa, madudugangan an satong pag-apresyar sa katalingkasan na minaabot paagi ki Cristo asin sa tamang paggamit sa Kristianong katalingkasan. Gibohon na ngonyan an saindong mga plano na magin presente para sa pambukas na awit asin umatender sa gabos na sesyon sagkod sa pantapos na pamibi sa Domingong hapon.
[Kahon sa pahina 6]
Mga Pagirumdom sa Pandistritong Kombension
DADAGUSAN: Mapadara kami nin suplay nin mga pormang Room Request sa kada kongregasyon. An mga nagkakaipo nin dadagusan sa mga kombension maninigong pumirma sa saro sa mga pormang ini asin itao iyan sa sekretaryo kan saindong kongregasyon. Iyan ririsahon asin pipirmahan nia, dangan ipadadara sa Watch Tower Convention sa saro kan mga adres na nasa ibaba.
BAUTISMO: An mga kandidato sa bautismo maninigong maghingoa na nagtutukaw na sa sinabing lugar bago pumoon an programa sa Sabadong aga. An mabining pankarigos asin tuwalya maninigong darahon kan kada saro na nagpaplanong pabautismo. Pakatapos kan pahayag sa bautismo asin pamibi kan espiker, an tsirman kan sesyon matao nin halipot na instruksion sa mga kandidato sa bautismo dangan mapakanta. Sa pagpopoon kan ultimong berso, gigiyahan kan mga attendant an mga kandidato sa bautismo sa lugar nin pagbautismo o sa mga lunadan na magdadara sa sainda duman, mantang tinatapos kan ibang presente an pagkanta. Mantang an bautismo bilang simbolo nin pagdusay sarong dayupot asin personal na bagay sa pag-oltanan kan indibiduwal asin ni Jehova, mayo nin probisyon para sa inaapod na magkaparehang mga bautismo, kun saen an duwa o mas dakol pang kandidato sa bautismo magkukurugusan o magkakaraputan nin kamot mantang binabautismohan.
ESPESYAL NA MGA MITING: May gigibohon na pakipagmiting sa gabos na regular asin espesyal payunir saka mga nagbibiyaheng paraataman sa alas 11:15 n.a. sa Biyernes, mantang an pakipagmiting sa gabos na kamagurangan asin ministeryal na mga lingkod gigibohon sa alas 11:15 n.a. sa Sabado. An mga lugar kan mga miting na ini ipaiisi sa plataporma.
PIONEER IDENTIFICATION: An gabos na regular asin espesyal payunir, saka nagbibiyaheng mga paraataman, kaipuhan na darahon sa kombension an saindang Identification and Assignment card (S-202). An mga payunir na nasa lista poon kan Hulyo 1, 1991 o bago pa kan petsang iyan puwedeng umako nin halagang ₱80.00 na tiket sa kombension basta ipresentar an saindang ID card sa sarong kombension na iyan sana. Ingatan an card na garo kuwarta. Dai iyan masasalidahan sa kombension.
PAGBOBOLUNTARYO: An tabang nin mga boluntaryo kaipuhan para sa pulidong pag-andar kan pandistritong kombension. Minsan kun puwede kamong magtrabaho para sa kabtang sana kan kombension, an saindong paglilingkod pasasalamatan. Kun puwede kamong makatabang, tabi magreport sa Volunteer Service Department pag-abot nindo sa kombension. An kaakian na dai pang 16 anyos an edad puwede man na makakontribuwir sa kapangganahan kan kombension, alagad hinahagad na sinda magtrabaho kaiba nin magurang o iba pang responsableng adulto.
LAPEL CARDS: Tabi isulot an may espesyal na disenyong lapel card sa kombension asin mantang nagbibiyahe paduman asin hale sa lugar kan kombension. Parateng ginigibo kaining posible sa sato na magtao nin marahay na patotoo mantang nagbibiyahe. An lapel cards maninigong kuanon paagi sa kongregasyon, mantang an mga ini dai makukua sa mga kombension. (Pasabot sa sekretaryo: An lapel card maninigong pedidohon sa Special Order Blank for Forms. Kun ini dai nagibo, magpadara na ngonyan kan regular na S-14 na pedido para kaini.)
PATANID: Saen man kamo umatender, bantayan an saindong mga dara-dara sa gabos na oras. Kun kamo may kotse, seguradohon na iyan barat asin dai magwalat nin ano man na mahalaga sa napaparadang kotse. Siring man, mag-ingat kamo sa mga parahabon asin mandurukot na perming yaon sa darakulang katiriponan. Kabale digdi an dai pagwalat nin ano man na may halaga sa tukawan na mayo nin nagbabantay. Tabi mag-ingat.