Areglo nin Pag-adal sa Libro kan Kongregasyon
Kabtang 2: An Pangangaipong Mag-andam Asin Makikabtang
1 Dakula an balos sa saro na nakakanompong nin kadonongan asin pakamansay. (Tal. 3:13, 14, 16-18) An espirituwal na kadonongan nagpapangyari sa Kristiano na gamiton an kaaraman gikan sa Tataramon nin Dios sa aktibong pagsamba, sa pagresolber sa pan-aroaldaw na mga problema, asin sa paggibo nin mga desisyon manongod sa saiyang mga pasohan sa buhay.
2 An Pag-adal sa Libro kan Kongregasyon sinadya sa pagtabang sato na tumalubo an kadonongan asin espirituwal na pakasabot. An regular na pag-atender maninigo na magin mahalagang kabtang kan satong personal na programa sa pagkua nin kadonongan.—Tal. 4:7-9.
LUBOS NA MAG-ANDAM
3 An nagkapira kan enot na siglo dai naghingoang makanood kan katotoohan asin makadungan sa nag-ooswag na liwanag. Sinda nagdanay na mga omboy dian ki Cristo asin dai tatao sa tataramon. (Heb. 5:11-13) Sinadol ni Pablo an kongregasyon na “magpadagos sa pagkamaygurang.” (Heb. 6:1) An hinahagad kaini bako sanang kaswal na paghinanyog sa iba na nagpapaliwanag kan katotoohan. Kaipuhan an paghorophorop asin pagsiyasat tanganing mapukaw an satong “malinaw na pag-isip,” asin kaipuhan kitang maghingoang gayo.—2 Ped. 3:1, 2; Luc. 13:24.
4 An lubos na pag-andam para sa pag-adal sa libro nakadudugang sa satong pakasabot asin pag-apresyar sa leksion. Pero ini nangangahulogan nin bako sanang pagbasa sa mga parapo asin dali-daling paglinya sa mga simbag. Kaipuhan na horophoropon niato an kahulogan kaiyan asin an halaga kaiyan sa sato personalmente. Basahon an sitadong mga teksto asin isipon kun ano an koneksion kaiyan sa mga parapo.
5 Tibaad magabat na trabaho an personal na pag-adal, pero pinalataw ni Pablo an mga pakinabang sa siring kaigot na pag-adal, na sinasabi: “An matagas na kakanon para sa mga maygurang, duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin sala.” (Heb. 5:14) An siring na pag-adal nakatatabang sato na tumalubo sa pagkamaygurang, tanganing makagibo kita nin tamang mga desisyon sa buhay.
MAKIKABTANG
6 Maninigo kitang magmaigot na makikabtang sa kada pagtiripon. Taano? An satong mga komento nagpapahayag kan satong pagtubod asin iyan nakadadagka saka nakapakokosog sa satong mga tugang. (Roma 10:10; Heb. 10:23-25) An aktibong pakikikabtang nakatatabang man sa satong espirituwal na pagtalubo. Kun an mga may kabatidan, mga aki, asin bagong mga interesado gabos suweltong nagkokomento, an grupo nagkakamit nin laen-laen na mga kapahayagan, na nakapagtotokdo asin nakagiginhawa sa gabos.
7 Kun kita maigot na mag-aandam para sa Pag-adal sa Libro kan Kongregasyon, regular na mag-aatender, asin suweltong makikikabtang, magigin mapanggana an satong paghanap nin kadonongan asin ‘makukua niato an mismong kaaraman dapit sa Dios.’—Tal. 2:4, 5.