Ano an Sasabihon Nindo Pagbalik Nindo?
1 An pagigin epektibo sa satong ministeryo nangangaipo nin pag-andam tanganing pagbalik ta sa mga nagpaheling nin interes kan enot, mahihimo tang pukawon liwat an saindang interes asin ipadagos an satong pag-orolay. Paano niato ini magigibo?
2 Mantang an tunay na mga Kristiano odok sa boot na interesado sa iba, puwede nindong sambiton nguna an bagay na nanodan nindo manongod sa kagharong kan nakaaging pagdalaw.
Sa tawong nagpahayag kan saiyang kahaditan manongod sa krimen, puwede nindong sabihon:
◼ “Kan huri kitang nag-olay nasabi nindo na nahahadit kamo sa pag-oswag nin krimen. Sa paghona nindo an pagkakaigwa daw nin orog na pulis makareresolber sa problema?”
Kun an tawo nagpahayag nin kahaditan huli sa mga pangyayari sa kinaban kasuarin sana, puwede nindong sabihon:
◼ “Kan huri kitang nag-olay nagtao kamo nin nakaiinteres na punto manongod sa kakulangan nin katoninongan sa kinaban. Sa paghona daw nindo an mga lider sa kinaban an makapangyayari nin bagong areglo sa kinaban?”
Sa tawong napupurisaw kan kapasloan nin iba, puwede nindong sabihon:
◼ “Kan huri kitang nag-olay nagpahayag kamo nin sarong ekselenteng punto manongod sa kapasloan na naheheling niato sa mga tawo sa pankagabsan. Ano sa paghona nindo an pagmansay nin Dios sa paslong mga tawo? [Pasimbagon.] Ini an sinasabi kan Biblia sa Efeso 5:5.”
3Kabilang sa iba pang ekspresyon na epektibong ginamit:
3◼ “Naogma akong gayo sa huri niatong pag-oolay, kaya siniyasat ko an halipot na mensaheng ini tanganing ipaheling saindo kun paano minamansay ni Jehova an kamugtakan kan mga daing istaran. Risahon an Isaias 65:21-23.”
3◼ “Inaapresyar ko an saindong komento na an katawohan nangangaipo nin mas marhay na gobyerno.”
3◼ “Nakaiinteres an hapot nindo kun baga an gabos na relihiyon nag-aako kan pag-oyon nin Dios.”
3An mga introduksion na arog kaini nagpapaheling na inaapresyar ta an satong nakaaging pakikipag-olay asin na interesado kita sa pakikipag-olay liwat sa kagharong.
4 Bago kamo dumalaw liwat, horophoropon kun ano an sasabihon nindo. Ibagay an saindong presentasyon sa kada tawo.
5 Kun sibot an tawong dinadalaw nindo, puwede pa man kitang magin epektibo paagi sa pagsabing:
◼ “Aram kong puwede kamong makaolay sa nagkapira sanang minuto, alagad uya an sarong bagay na puwede nindong isipon mantang tinatapos nindo an saindong gibohon. [Basahon an Mateo 5:3.]”
O puwede nindong sabihon:
◼ “Nagsurat ako nin tolong teksto para sa saindo. Mantang bako ini an marahay na panahon nin pag-oolay, iwawalat ko ini, asin pagbalik ko, boot kong ipakipag-olay iyan saindo sa laog nin limang minutos.”
6 Negatibong mga Pagdolok na Maninigong Likayan: An mga hapot na tibaad magpangyari nin negatibong simbag o na tibaad mapasopog an kagharong parateng dai nagbubunga nin marahay na resulta. Kaiba digdi an: “Nabasa daw nindo an materyal na iwinalat ko sa saindo?” “Igwa daw kamo nin ano man na hapot?” “Nagigirumdoman daw nindo ako?” “Nagsongko ako tanganing maghapot kun interesado pa kamo sa pakikipag-olay manongod sa mga katuyohan nin Dios para sa dagang ini.”
7 Magigin galaga kita sa pagdalaw sa mga indibiduwal na nagpaheling nin interes kan enot kun patienot na nag-andam kita tanganing magtao sainda nin tabang na tunay nanggad na makahulogan.