Hapot

◼ Gurano an puwedeng magin pakikakabtang nin saradit na aki nin Kristianong mga magurang sa paglilingkod sa langtad bago sinda ibilang na dai pa bautisadong mga parahayag?

Mawot nin Kristianong mga magurang na an saindang mga aki tumalubo pasiring sa pagigin maygurang, dusay na mga lingkod ni Jehova. (1 Sam. 2:​18, 26; Luc. 2:40) Minsan sa amay pang marhay na edad, an mga aki sa Kristianong mga pamilya kaipuhan na makatao nin malinaw na mga kapahayagan sa pagdepensa kan saindang pagtubod. An espirituwal na pagtalubo kan kaakian napadadali mantang iniibanan ninda an saindang mga magurang sa paglilingkod sa langtad poon sa pagkaomboy. Pero mahalaga para sa mga hobenes na mapahiro gikan sa puso tanganing ikaogma ninda an paglilingkod sa langtad, magmawot na magin dai pa bautisadong mga parahayag, asin padagos na makikabtang sa gibohon na paghuhulit. Kaipuhan an maingat na pagsasanay nin mga magurang. (1 Tim. 4:6; 2 Tim. 2:15) An ibang kuwalipikadong parahayag puwedeng tumabang paminsanminsan kun itinotogot nin mga magurang.​—Helingon an Our Ministry, pahina 99-100.

Mantang minaiba an mga aki sa saindang mga magurang sa gibohon na pagharongharong, nakanonood sinda na gumibo sa ministeryo. Alagad dai sinda ibibilang na dai pa bautisadong mga parahayag sagkod na napatalubo na ninda an sadiring kakayahan asin abilidad. Makadidesisyon an mga magurang kun gurano an magigin kabtang kan aki sa pagtao nin patotoo mantang sinda magkaibang naggigibo. An mga aki na bako pang dai pa bautisadong mga parahayag dai dapat na dumalaw na sinda sana o umiba sa ibang aki sa paglilingkod sa langtad. Puwedeng andamon kan mga magurang an saindang mga aki para sa paglilingkod sa langtad asin togotan sinda na makikabtang sa laen-laen na paagi, arog baga sa pagbasa nin kasuratan, pag-alok nin tract o magasin, o pagpaheling sa kagharong nin ilustrasyon sa saro sa mga publikasyon. Mientras na nagdadakula an aki, puwede na siang makikabtang nin orog pa sa pag-orolay.

Paagi sa tamang pagsasanay, nakanonood an hoben na mga aki na apresyaron an pagigin magabat kan ministeryo mantang nagkukuyog sinda sa paggiya kan saindang mga magurang asin minagawe sa marahay na paagi. Dai dapat pabayaan kan mga magurang an saindang mga aki na bako pang dai pa bautisadong mga parahayag sa pagtiripon para sa paglilingkod, na linalaoman an iba na atamanon sinda. An may pagmakolog na mga magurang aram an saindang personal na paninimbagan na pamahalaan an aktibidad kan saindang mga aki. Siyempre, an ibang responsableng parahayag tibaad boot na tumabang sa pagsasanay sa saradit na mga aki sa kongregasyon na nagpapaheling nin tunay na interes sa paglilingkod ki Jehova sa ministeryo.