Puwede daw Kamong Gumibo nin Orog Pa sa Pagtaong Onra ki Jehova?
1 Iyan sarong mahalagang hapot na dapat horophoropon niato gabos. Bilang maimbod na mga paraarog sa satong Kagurangnan, si Jesu-Cristo, tinatawan niato nin onra an satong Dios ngonyan paagi sa pagpahayag sa publiko kan saiyang ngaran. Ini sarong paninimbagan na kaipuhan niatong isaabaga kun boot niatong kamtan an pag-oyon nin Dios. (Mar. 13:10; Luc. 4:18; Gibo 4:20; Heb. 13:15) Kanigoan kadai ikaladawan na pribilehiyo—iyo, onra—na darahon ining maogmang bareta sa natatada pang mga nagkawararak na “karnero” na puwede pang magin kabtang kan unibersal na toril ni Jehova!—Juan 10:16.
2 Puwede daw na kamo asin an saindong mga aki gumibo nin orog pa sa pagtaong onra ki Jehova paagi sa pagdugang kan saindong gibohon sa ministeryo? Sa nagdadakol na bilang sa bilog na kinaban, an saindong mga tugang na lalaki asin babae naglalaog sa paglilingkod bilang payunir. Kan Abril 1992, an peak na 34,313 sa Pilipinas nasa paglilingkod bilang espesyal, regular asin auxiliary payunir. Personal na daw nindong hinorophorop nin marhay an pagpayunir? Dinadagka daw nindo an saindong mga aki na pag-aaboton an karera na pambilog na panahon na ministeryo?
3 Taano ta dai analisaron an saindong personal na saboot sa paglilingkod bilang payunir? Kun nasasambitan an bagay na ini, an konklusyon daw tolos nindo iyo na an saindong kamugtakan dai minatogot saindo na maglingkod bilang payunir na ministro? Totoo na an pagpapayunir bakong posible sa gabos. An Makakasuratan na paninimbagan asin iba pang limitasyon nakaoolang sa dakol na maglingkod nin bilog na panahon. (1 Tim. 5:8) Pero iyan daw may pagngayongayo nindong hinorophorop kasuarin pa sana? Pinag-orolayan na daw nindo iyan bilang pamilya tanganing maheling kun baga may kisuerra sarong miembro na makakapayunir? An Agosto 1, 1983 na isyu kan An Torrengbantayan (sa Ingles, Nobyembre 15, 1982) igwa kaining nakapupukaw sa isip na sinabi sa pahina 15 (pahina 23 sa Ingles): “Tunay na maninigong mapagngayongayong konsideraron nin lambang Kristianong ministro kun baga puwede siang magpayunir o dai. An sarong mag-agom sa South Africa na kinse anyos nang payunir nagsabi: ‘Taano ta nagpapayunir kami? May ikakapangatanosan daw kami ki Jehova kun dai kami magpayunir?’ An dakol na bakong payunir puwedeng ihapot an konektadong hapot: ‘Ako daw may ikakapangatanosan ki Jehova sa bagay na ako bakong payunir?’”
4 An saro pang artikulo sa Watchtower sa bagay na iyan may pagdoon na nagkomento kaini: “Kada saro sa sato maninigong magin sadiosan sa saiyang sadiri. Sinasabi daw nindo, ‘An espiritu nagmamawot na gayo, alagad an laman maluya’? Pero talaga daw na nagmamawot an espiritu? Likayan niato na gamiton an kaluyahan kan laman na sarahotan sa pagkadaing kamawotan kan espiritu.”—w78-E 8/15 p. 23.
5 An mga Magurang na Boot Umoswag an Saindang mga Aki: Sinisierto sato kan Talinhaga 15:20: “An madonong na aki iyo an nagpapaogma sa ama.” An diosnon na mga magurang dai mapagdududahan na naoogma kun an saindang mga aking lalaki asin babae pinag-aaabot an buhay na dedikado sa paglilingkod ki Jehova. Alagad, an saindong mga aki dai automatikong pipilion an madonong na dalan. An pan-akit kaining kinaban makosogon nanggad. Mga magurang, an mga pamantayan sa buhay kan saindong mga aki minomolde nanggad kan saindo. Kun permi nindong positibong sinasabi an dapit sa mga pakinabang nin bilog na panahon na paglilingkod, kun dinadagka nindo an saindong mga aki na makiibaiba sa debotadong mga payunir, kun kamo tunay na kombensido na an bilog na panahon na ministeryo iyo an pinakaonradong karera na puwedeng laogan kan saindong mga aki, an positibong kaisipan na ini daing duwa-duwa na magkakaigwa nin makosog na epekto sa saindong mga aki. Tabangan sinda na apresyaron an halaga nin pagkaigwa nin marahay na ngaran ki Jehova imbes na sa mga tawo.
6 Mga hobenes, an Talinhaga 22:1 nagdodoon kan pagpili na dapat nindong gibohon: “An ngaran orog na pipilion kisa abundang kayamanan; an marahay na boot orog pa karahay kisa pirak asin bulawan.” Anong klaseng ngaran an gigibohon nindo para sa saindong sadiri? Isip-isipa an mga lalaki asin babae na nababasa niato sa Biblia na naggibo nin ngaran ki Jehova paagi sa dedikadong paglilingkod. Yaon si Lucas, an namomotan na doktor, asin si Enoc, na naglakaw kaibanan kan tunay na Dios. Si Samuel inako an pinakamarahay na edukasyon na makukua, na pinonan an saiyang paglilingkod sa templo ni Jehova sa amay na edad. Sa paghona daw nindo an maimbod na mga lingkod na ini nagbasol sa saindang pinili? Taano man? Gabos sinda namuhay nin maogma, mabunga, asin kawiliwili. Asin sinda nagkamit kan daing sagkod na marahay na boot ni Jehova!—Sal. 110:3; 148:12, 13; Tal. 20:29a; 1 Tim. 4:8b.
7 Kun an mga aki marahay an buhay, an saindang mga magurang makapag-oorgolyo. An saindang ipinundar sa pagsasanay, pagdidisiplina, asin pagtotokdo kaining “mana hale ki Jehova” nababalosan nin doble-doble. (Sal. 127:3) Ano an orog na makapaoorgolyo sa siisay man na magurang kisa aking lalaki o babae na ginigibo an bilog niang makakaya sa pagtaong onra ki Jehova? Dakol na mga hobenes sa modernong panahon an nagsusunod sa mga gira ni Lucas, Enoc, asin Samuel, siring kan iiniilustrar nin sarong surat: “Ako 16 anyos. Nagpoon akong magregular payunir . . . siyam na bulan pakapabautismo, asin magpoon kaidto nag-aako ako nin mga bendisyon gikan ki Jehova. . . . An pagpayunir nakatatabang man sa eskuwelahan. Kaidto, tinutuya ako kan sakong mga kaklase huli sa pagigin sarong Saksi. Ngonyan, huli ta orog pa akong naggigibo nin personal na pag-adal, kaya ko nang ‘makasimbag sa nagduduhagi sako.’”
8 Edukasyon Tanganing Sangkapan an Saro sa Ministeryo: Sa bagay na ini puwedeng konsideraron niato an dapit sa sekular na edukasyon. Ini bagay na an timbang na punto-de-vista nangorognang kaipuhan. An Nobyembre 1, 1992 na Torrengbantayan itinampok an artikulong “Edukasyon na May Katuyohan.” Sa subtemang “Igong Edukasyon,” itinampok an puntong ini: “An mga Kristiano maninigong kayang sustentohan an sadiri, dawa kun sinda bilog na panahon na mga ministrong payunir. (2 Tesalonica 3:10-12) . . . Guranong edukasyon an kaipuhan nin sarong hoben na Kristiano tanganing ikagalang an mga prinsipyong ini sa Biblia asin maotob an saiyang Kristianong mga obligasyon? . . . Ano an [suweldong] masasabing ‘bastante’ para sa mga nagmamawot na magin mga ministrong payunir kan maogmang bareta? An mga siring sa pankagabsan nagkakaipo nin trabahong por ora tanganing malikayan na dai ‘makapagabat’ sa saindang mga tugang o sa saindang pamilya.—1 Tesalonica 2:9.”
9 Kun an dugang pang edukasyon ipinamumugtak na kaipuhan kan nagpaplanong magpayunir tanganing makatabang saiya na aboton an pambilog na panahon na paglilingkod, an Nobyembre 1, 1992 na Torrengbantayan nagrerekomendar: “Marahay kun an hoben na Saksi, sagkod sa mapupuwede, kuanon ini mantang nag-iistar sa harong, sa siring ikinapadadagos an normal na Kristianong mga ugale sa pag-adal, pag-atender sa pagtiripon, asin paghuhulit.”
10 Hale sa Aprika uya an eksperyensia nin sarong 22 anyos na hoben na nag-adal sa bokasyonal na eskuwelahan, maski na an saiyang puso nasa payunir na paglilingkod. Mantang nasa bokasyonal na eskuwelahan, nagpalista sia bilang auxiliary payunir. Tinutuyatuya sia kan saiyang kairiba, na sinasabing dai sia makapapasar sa saiyang mga eksaminasyon. An saiyang simbag sa sainda perming: “Hanapon nguna an Kahadean nin Dios asin an saiyang katanosan.” Dinidisiplina an sadiri, nagmamata sia nin amay pang marhay kada aga asin duwang oras na nag-aandam para sa klase dangan nakikakabtang sa paglilingkod sa langtad pagkahapon pakatapos nin klase. An bilog na eskuwelahan napangalas kan an hoben na ini nakatersera sa sarong espesyal na eksaminasyon sa pagpili kan tolong pinakamataling estudyante para sa sarong espesyal na premyo nin pag-isponsor. An estudyante na nakasegunda sarong interesado na inaadalan sa Biblia kaining satong tugang na payunir sa eskuwelahan. An estudyante na nakaprimera saro pang mahigos na hoben na Saksi sa eskuwelahan.
11 An Kamagurangan Ginigibo an Saindang Kabtang: An mga magurang sa kongregasyon, na ipinag-oorgolyo an gibohon kan mga payunir, nagtatao nin makosog na pagdagka sa maigot na mga ministrong ini. An mga magurang naoogmang gibohon ini ta aram ninda na an mahigos, mabungang mga payunir bendisyon sa arin man na kongregasyon. Pakapaglingkod nin mga sarong taon bilang regular payunir, an mga ini nakakuwalipikar sa dugang pang pagsasanay sa Paadalan sa Payunir na Paglilingkod. An kurso napakahalagang instrumento sa pagpaoswag sa pagigin epektibo kan mga payunir. Minsan ngani an mga payunir nangengenot sa gibohon, sinda man nangangaipo nin mamomoton na pagpakosog, asin an mga magurang maninigong alisto na panigoan an pangangaipong ini.—1 Ped. 5:1-3.
12 Paano an mga magurang puwedeng tumao nin pagpakosog sa gibohon na pagpayunir? An marahay na pagpopoon paagi sa pagsiyasat sa panapanahon kun sairisay an puwedeng makaabot sa pribilehiyong ini. An mga magurang puwedeng kaolayon an mga indibiduwal na paborableng gayo an kamugtakan na magpayunir, kaiba na an mga nag-o-auxiliary payunir nin regular, an mga retirado, mga agom na babae, asin mga estudyante. Mantang mayo nin maninigong makamate na inoobligar na magpalista, an mga nagmamawot pero nag-aalangan tibaad, paagi sa kadikit na praktikal na pagdagka, makarealisar na kaya ninda an pagpapayunir.
13 Sa pagdagka sa mga nagmamawot na lumaog, maninigong girumdomon nin mga magurang na dai kaipuhan na an aplikante mag-auxiliary payunir sa nagkapirang bulan bago magpalista bilang regular payunir. (suplemento sa km-BI 9/86 par. 24-6) Siyempre, an mga magurang bobooton na rasonableng makasierto na an aplikante nasa kamugtakan na maaabot an kahagadan na oras.
14 Pakarepaso sa aplikasyon kan Komite sa Paglilingkod kan Kongregasyon asin maingat na rinepaso kan sekretaryo tanganing masierto na an mga hapot nasimbag, maninigong ipadara tolos iyan sa Sosyedad.
15 An sekretaryo maninigong dayaday na iniimpormaran an mga magurang sa ano man na problema na naeeksperyensiahan kan mga payunir. Nangorognang mahalaga ini sa mga kongregasyon na dakol an payunir. Dugang pa sa pagrepaso kan aktibidad kan mga payunir sa katapusan kan taon nin paglilingkod, na hinahagad sa Congregation Analysis Report (S-10), an sekretaryo maninigong imbitaran an paraataman sa paglilingkod na magmiting sinda nin amay sa Marso tanganing helingon kun siisay an tibaad dai nakaaabot sa kahagadan na oras asin nangangaipo nin personal na tabang. (Helingon an Mga Paisi sa Marso 1993 na An Satong Ministeryo sa Kahadean.) Kun itinatao an tabang na daing pag-atraso, an payunir tibaad makakompleto nin oras sa taon nin paglilingkod.
16 An dakol na bagong payunir hoben pa asin medyo bagohan sa katotoohan. An saindang espiritu nin pagigin andam sa boot siertong nakapaoogma sa sato! Pero an mga bagohan na ini nagkakaipo pa nin pagsasanay na mapaoswag an kakayahan sa pagharongharong, epektibong mga pagdalaw liwat, asin pagtokdo sa mga inaadalan sa Biblia. Kun dai nakakamit an pagsasanay na ini, an bagohan tibaad manluya pakatapos nin mga sarong taon dangan pumondo na sa payunir na paglilingkod huli sa dai pagkamit nin mararahay na resulta sa ministeryo. An alistong mga magurang puwedeng marisa an saradit na problema o an pagluya sa aktibidad. Kun natatawan tolos nin atension asin natatabangan an payunir sa saiyang problema, maoogma sia sa dakol na taon nin mabungang paglilingkod.
17 Puwede daw Kamong Manira sa Hararayong Katubigan? An pirang disipulo ni Jesus parasira. Kun beses, pakalihis nin bilog na banggi nin paninira, an saindang mga hikot mayo pa nin laog. (Juan 21:3) Sa ibang lugar sa nasyon na ini na an ‘paninira sa mga tawo’ nagpapadagos sa laog nin mga taon, an pirang payunir tibaad magsabing kakadikit na sana an “sira” na natatada sa “katubigan” kan saindang kongregasyon. (Mat. 4:19) Al kontraryo, dai daw kita naoogma na makabasa nin mga report hale sa ibang kadagaan na an mga payunir asin parahayag nagkokondukta nin dakol na pag-adal sa Biblia? An kagayagayahan na namamatean nin mga payunir sa mga lugar na ini risang marhay. (w92-BI 9/1 p. 17 par. 15 [w92-E 9/1 p. 20 par. 15]) Kaya kun an pirang mahihigos na payunir nasa kamugtakan na kayang gastosan an pagpasiring sa ibang nasyon na igwa nin orog na pangangaipo, maninigong ipakipag-olay ninda ini sa sangang opisina bago magduman.
18 Sa primero, an iba tibaad nagpoon na magpayunir ta aram nindang ini an tamang gibohon pero nagduda kun magigin mapanggana sinda dian. Tibaad nagpalista sinda na may pagduwaduwa o pag-alangan. Sa primero, tibaad kakadikit kan saindang bunga sa langtad. Alagad pag-abot nin panahon an saindang kakayahan nag-oswag, asin may ebidensia kan bendisyon ni Jehova sa saindang gibohon. Kaya an saindang kagayagayahan asin kompiansa nagtalubo. Para sa iba, an pagpayunir nagin tangga pa ngani sa paglilingkod sa Bethel, pagmimisyonero, Paadalan sa Ministeryal na Pagtotokdo, asin pati sa nagbibiyaheng paglilingkod.
19 Tibaad bakong posible saindo na bumalyo sa ibang lugar o magin misyonero sa ibang nasyon, pero igwa pa nin mga oportunidad na manira sa iba pang katubigan sa laog kan nasyon na ini kun an saindong presenteng teritoryo bakong gayong mabunga. An siring na pagbalyo puwedeng mangaipo nin pagliliwat sa saindong pamumuhay, pero an espirituwal na mga balos magigin dakulaon nanggad.—Mat. 6:19-21.
20 O kaya kun itinotogot nin saindong kamugtakan, tibaad kaya nindong tumabang sa sarong haraning kongregasyon sa sadiri nindong sirkito. Kun kuwalipikado kamo, an saindong paraataman sa sirkito maoogmang tumao nin mga suhestion dapit sa mga kongregasyon sa sirkito na makikinabang sa ibang payunir.
21 An ibang payunir asin parahayag nakatatabang sa mga pangangaipo sa saindang sadiring lugar mantang nag-iistar sa harong. Tibaad may aram sindang ibang tataramon. Naheheling daw nindo na an dakol na tawo sa saindong teritoryo nagtataram nin ibang tataramon? Igwa daw nin mga tawo na nangangaipong umako nin mensahe kan Kahadean gikan sa saro na tatao nin pagtaram sa senyas? An mga tatao nin ibang tataramon puwedeng magin dakulang tabang na mapaabotan nin mensahe kan Kahadean an gabos na klase nin tawo. Minsan ngani ini puwedeng magin tunay na angat, ini puwede man na magtao nin dakulang balos.—1 Tim. 2:4; Tito 2:11.
22 Kun ginigibo nindo ngonyan an bilog nindong makakaya na tawan nin onra si Jehova, mag-ogma sa saindong presenteng mga pribilehiyo sa paglilingkod. Kun namamatean nindong kaya nindong gumibo nin orog pa, ipamibi nindo iyan ki Jehova. Realistikong analisaron kun anong mga pagliliwat an itinotogot sa saindo kan kamugtakan nindo. Ipakipag-olay an saindong mga plano sa sarong magurang na igwa nin espiritu nin pagpapayunir o sa paraataman sa sirkito. Kun ginibo nindo an mapagngayongayo, praktikal na desisyon, gibohon tolos, na nagsasarig sa panuga ni Jehova na tawan nin onra an mga nagtatao nin onra sa saiya.—Heb. 13:5, 6; 1 Sam. 2:30.