Mga Kahagadan Kapwa sa Bagohan Asin Eksperyensiadong Ministro
1 An salmista naghapot: “O Jehova, siisay an magigin bisita sa saimong tolda? Siisay an mag-eerok sa saimong banal na bukid?” Si David nagsimbag: “Sia na naglalakaw na daing sala asin naggigibo nin katanosan asin nagtataram nin katotoohan.” (Sal. 15:1, 2) An mga kahagadan na iyan dai nagbago. An gabos ngonyan na minadatong sa pagsamba sa Kristianong kongregasyon kaipuhan na bayaan an inmoral na mga gibo asin pagburat. Mayo nin lugar sa tahaw kan banwaan ni Jehova para sa mga parapakiiwalon, aranggoton, o nagtataram nin pandadaya. Baga man bagohan o eksperyensiadong mga ministro, kaipuhan kitang magmaimbod sa pagsunod sa halangkaw na mga pamantayan na nakasurat sa Tataramon nin Dios.—Gal. 5:19-21.
2 Dakol na bagohan an nakiaasosyar sa organisasyon ni Jehova. Liniwat ninda an saindang pag-isip tanganing ikaoyon an saindang pamumuhay sa mga kahagadan nin Dios. An sarong solterito sa Amerika del Sur nagdakula na mayo nin paggiya nin magurang asin nakapatalubo nin grabeng mga problema sa personalidad. Kan sia 18 anyos na, naadikto sia sa droga asin napreso na huli sa paghabon tanganing masuportaran an bisyo. Paagi sa pag-adal sa Biblia, pinondo nia an pakiibaiba sa dati niang mga kairiba, nakanompong nin bagong mga katood sa tahaw kan mga Saksi ni Jehova, asin sa katapustapusi idinusay an saiyang buhay sa Dios.
3 Sa siring na paagi, kaipuhan kitang magin determinado na paoyonan an Dios sa gabos niatong gawe, “sa tunay na katanosan asin kaimbodan.” (Efe. 4:24) Igwa kitang obligasyon na ‘haleon an daan na pagkatawo asin an mga gibo kaini’ asin na “isolog [niato] an bagong pagkatawo, na binabago paagi sa tamang kaaraman” kun boot niatong magdanay sa garo-bukid na organisasyon nin Dios.—Col. 3:9, 10.
4 An Tataramon nin Dios, Sarong Mapuwersang Impluwensia: An personalidad ni Jehova siring kan ihinayag sato paagi sa Biblia mapuwersang makaaapektar sa satong pag-isip asin sa satong paghiro sa positibong paagi. (Roma 12:2) An Saiyang Tataramon igwa nin puwersa na liwaton an mga kaisipan asin siyasaton an mga puso. (Heb. 4:12) Tinotokdoan kita kan Biblia na an kabotan ni Jehova naghahagad sato na kita mamuhay na matanos sa moral, lubos na makikabtang sa pampublikong ministeryo, asin dai pagpabayaan an Kristianong mga pagtiripon.
5 Sa delikadong mga panahon na ini an nag-oorog na mga pangigipit puwedeng makaimpluwensia sa sarong Kristiano na balgahon an mga pagboot nin Dios. Kun pinapabayaan an personal na pag-adal, pampamilyang pag-aradal, Kristianong mga pagtiripon, o an ministeryo, minsan an dating makosog na Kristiano puwedeng maparayo sa pagtubod, tibaad maholog sa salang gawe. Kaya ngani sinuratan ni Pablo si Timoteo: “Permi mong atenderan an saimo man sana asin an saimong pagtotokdo” asin, “Permi mong horophoropon an isinasabi ko.”—1 Tim. 4:16; 2 Tim. 2:7.
6 Kita gabos, kaipuhan na magdanay na malinaw na nakasentro sa mga kahagadan nin Dios, magin lubos na timbang sa ministeryo, asin papagdanayon na marigon an satong paglaom kun boot niatong maligtas. (1 Ped. 1:13-16) An aroaldaw na paggibo kan matanos na mga kahagadan nin Dios lubos na kinakaipuhan.
7 Magin determinadong tumalubo sa pagtubod asin umoswag sa pagkamabunga sa ministeryo sa langtad. (Roma 1:12) Papagdanayon an saindong mga kaisipan sa tamang mga bagay paagi sa pagigin regular sa personal na pag-adal, pampamilyang pag-aradal, asin pag-atender sa mga pagtiripon. (Fil. 4:8) An saindong paghihingoa na paogmahon an Dios paagi sa pamumuhay nin oyon sa saiyang mga kahagadan dai malilingawan.—Col. 3:23, 24.