Galagang Humanap nin mga Pag-adal sa Biblia
1 Nauubos na an panahon para sa daan na kinaban na ini. (2 Tim. 3:1-5) Ano an kahulogan kaini? Nangangahulogan ini na an buhay nin mga tawo namemeligro. Alagad nasa kapangyarihan niato na tabangan an iba na makaligtas. (Tal. 3:27) Sa katuyohan na ini maninigo kitang galagang magmaigot na makapoon asin makakondukta nin mga pag-adal sa Biblia.
2 Kadakol na an nahaman kan satong basado sa Biblia na mga literatura. Pero an pinakakaipuhan kan mga tawo iyo an personal na pagtabang paagi sa regular na pag-adal sa Biblia sa harong. Paano niato sinda puwedeng matabangan na apresyaron iyan?
3 Puwede kitang maghapot nin mga bagay na may labot sa mga tawo. An mga hapot na iyan puwedeng nakasentro sa kun taano an moral ta grabe an pagraot, kun taano an pamilya ta bakong gayong marigon, kun taano an kadahasan asin krimen ta siring kamakatatakot, kun taano an mamomoton na Dios ta tinotogotan an presenteng mga kamugtakan. Magin alisto sa mga isyu na pinagkakainteresan nin mga tawo sa saindong teritoryo. Itokdo an malinaw na mga simbag kan Biblia sa mga hapot na ini. Ipaheling kun paano an mga literatura puwedeng makatabang sainda na manodan an sinasabi kan Biblia manongod sa mga isyung ini na nakaaapektar sa sato gabos.
4 Pagmaigotan na darahon an kagharong sa pag-orolay. Magin alisto na mansayon kun ano an napapalabot saiya. Isentro an saindong pag-orolay sa saiyang mga pinagkakainteresan. Darahon an atension sa impormasyon na yaon sa satong mga publikasyon na nagpapaliwanag kan solusyon kan Biblia sa mga problema nin katawohan. Bago humale, magpalataw nin saro o duwang hapot na mapukaw kan saiyang pag-antisipar para sa sunod nindong pagsongko. Sa pagdalaw liwat nindo, pagirumdomon sia kan mga hapot na ini, dangan gamiton an mga literatura sa pagtabang saiya na maheling an mga simbag kan Biblia.
5 An satong pagpoon nin mga pag-adal sa Biblia asin regular na pagkondukta kaiyan makakapabago sa buhay nin mga tawo. Kaipuhan tang magpaheling nin tunay na interes sa mga nakakaolay niato sa langtad o sa impormal na mga kamugtakan. Nagkakaipo nin pag-andam na mapukaw an saindang interes. Kaipuhan an pagpasensia sa pagdalaw liwat sagkod na madara nindo sinda sa regular na paagi nin espirituwal na pagpapakakan. Kinakaipuhan an mamomoton na interes sa mga tawo mismo. Kaipuhan na booton niato na tabangan sinda na maligtas sa nagdadangadang na kalaglagan. An satong gibohon na pag-adal sa Biblia maninigong gibohon na tema nin regular asin odok sa boot na pamibi.—1 Tes. 5:17.
6 Nakapakokosog nanggad na maheling na haros sarong milyon katawo an nagin bautisadong mga disipulo kan nakaaging tolong taon. (Mat. 28:19, 20) Nagkokondukta na kita ngonyan nin mga apat may kabangang milyon na pag-adal sa Biblia kada bulan. Kumusta man kamo? Odok sa boot na daw kamong nagmamaigot sa pakikikabtang sa gibohon na pag-adal sa Biblia sa harong? Girumdomon, an satong buhay asin an sa iba man minadepende sa satong kaimbodan sa bagay na ini.—Eze. 3:17-19.