Pagdalaw Liwat Tanganing Pukawon an Interes sa Biblia
1 Kun minsan nakanonompong kita nin mga tawo sa paglilingkod sa langtad na nagpapaheling nin interes sa maogmang bareta pero sibot na marhay na makipag-olay sa sato kun kita minadalaw. Pinagmamaigotan daw niato na dumalaw liwat sa ibang panahon tanganing ihiras an katotoohan sa sainda? O tibaad igwa kita nin interesanteng pakipag-olay sa kagharong, alagad dai sia nag-aako nin ano man na babasahon. Minadalaw daw kita liwat tanganing dugang pang makipag-olay sa saiya?
2 Mahalaga na kultibaron an gabos na interes na tibaad manompongan niato. Naggigibo daw kita nin mga pagdalaw liwat sa mga nag-aako sana nin babasahon? Kun iyo, puwedeng nalilihisan niato an ibang interesado. Siertong habo niatong husgaran na an saro bakong angay huli sana ta sia dai nag-ako nin babasahon. (Ikomparar an Roma 14:4.) Tibaad pakadalaw niato, tibaad mag-isip-isip an kagharong dapit sa sinabi niato asin sa siring magin mas kaangay-angay kun kita dumalaw liwat.
3 Kun minadalaw liwat sa saro na sibot, puwede nindong sabihon:
◼ “Naoogma akong maheling kamo giraray. Kan huri kong pagdigdi, dai kita nakapag-olay huli ta mayo kamo nin panahon. Naheheling ko na sibot kamong tawo, asin madali sana ako. Posibleng nahahadit kamo manongod sa marahay na salud para sa saindong sadiri asin para sa mga namomotan nindo. Bueno, aram daw nindo na nanuga an Dios na tatapuson an gabos na helang? [Pasimbagon.] Mangnoha an punto sa parapo 4 kaining brochure na may titulong ‘Uya! Ginigibo Kong Bago an Gabos na Bagay.’” Kun itinotogot nin panahon, basahon an parapo dangan pag-olayan an saro sa mga teksto sa ibaba kan pahina 4 na naglaladawan kan mga kamugtakan sa bagong kinaban. Kun naghihinanyog an kagharong, tibaad puwede nindong ponan an pag-adal sa Biblia sa harong.
4 Kun minadalaw liwat sa saro na nag-ako nin tract, puwede kamong magsabi nin arog kaini:
◼ “Kan huri ko kamong maheling, nag-ako kamo nin kopya kan tract na ini na may titulong Siisay an Tunay na Namomoon sa Kinaban? Nadedepisilan daw kamong akoon na si Satanas an namomoon sa kinaban na ini? [Pasimbagon.] Mangnoha an enot na parapo sa pahina 6.” Basahon an parapo, dangan maghapot: “Taano daw ta boot ni Satanas na dayaon kita?” Pakasimbag kan kagharong, magkaibang pag-olayan an ikaapat na parapo sa pahina 3. Puwede kamong magpadagos na lubos na pinag-oolayan an tract, o tibaad boot nindong iintrodusir an brochure na An Dios daw Talagang May Pagmakolog sa Sato? asin pag-olayan an parapo 8 sa pahina 13.
5 Igwa nin marahay na dahelan na magin positibo asin kultibaron an interes na nanonompongan niato sa satong paghuhulit minsan ngani iyan ipinahayag sa limitadong paagi.
6 Kun kamo nagkaigwa nin magayon na pakipag-olay sa saro na tibaad ngani kadikiton an interes, dai pagpabayaan an pagdalaw liwat tanganing kultibaron an interes. Tibaad iyan magresulta sa pagpopoon nin pag-adal sa Biblia asin pagbugtak sa saro sa dalan nin buhay.—1 Tim. 4:16.