Kun Paano Kukultibaron an Interes
1 Sono sa sarong diksionaryo an “kultibaron” nangangahulogan na andamon para sa o paoswagon an pagtalubo. Pero puwede man iyan mangahulogan na paoswagon paagi sa pagtrabaho, pangataman, o pag-adal. An paggibo nin mga disipulo mahalagang katuyohan kan satong ministeryo. (Mat. 28:19, 20) Kaya kaipuhan kitang magmahigos tanganing kultibaron an interes na nanonompongan niato sa paglilingkod sa langtad.
2 Sa parate kaipuhan an paorootrong pagdalaw tanganing paoswagon an espirituwal na pagtalubo nin mga sadiosan an puso. Maninigo na an mabungang mga pagdalaw liwat gumiya sa regular na pag-adal sa Biblia.
3 Minadalaw daw kamo liwat duman sana sa mga nagkua nin babasahon? An sarong payunir na dai perming nakapasasakamot nin dakol na babasahon sa enot na mga pagdalaw minabuwelta sa gabos na makikatood. Nagtatao an marahay na pag-orolay sa Kasuratan nin marahay na basihan para sa pagdalaw liwat.
4 Gamiton an mga Tract Tanganing Makapoon nin mga Pag-adal sa Biblia sa Pagdalaw Liwat: An manlaenlaen na tema kan satong mga tract angay sa satong aldaw. Idinodoon kaiyan an pangangaipo na kumua nin kaaraman sa Biblia asin iaplikar iyan.
Puwede nindong sabihon:
◼ “Kan enot napag-olayan niato kun taano ta makasasarig kita sa Biblia. Anong klaseng ngapit daw an sinasabi kan Biblia?” Ponan na basahon an ikaduwang parapo sa pahina 3 kan tract na Life in a Peaceful New World. Basahon an mga kasuratan. Tapuson paagi sa pag-orolay sa materyal sa temang “How It Is Possible for You” sa pahina 5.
5 Sa kaagid na paagi, puwede nindong gamiton an tract na What Hope for Dead Loved Ones?
Puwede kamong magsabi:
◼ “Arog kan napag-olayan na niato sa halipot kaidto, kadakol an kulang nin pagtitiwala sa Dios. Halimbawa, ihinahapot ninda, ‘Kun makapangyarihan nanggad an Dios, taano ta tinotogotan niang magadan an mga tawo?’ Makatatabang an tract na ini na masimbag an hapot na iyan.” Buksan an kabtang poon sa ikaapat na parapo sa pahina 2. Maghapot pakatapos kan kada parapo, asin basahon an mga kasuratan na dai kinotar.
6 Pagpapadagos kan Pag-adal: Paagi sa pagsunod sa mga metodo na isinuherir digdi, nagpopoon na kamo nin pag-adal sa Biblia sa harong. Tanganing ikapadagos na regular an pag-orolay, hapoton an kagharong: “Narisa daw nindo na nasimbag ta an kadakol na hapot sa pira sanang minutos? Sa masunod na semana puwede kitang gumamit nin dugang pang panahon na makapag-olay dapit sa paglaom sa pagkabuhay liwat.” Puwede kamong gumamit nin saro sana sa mga hapot na sinambit sa mga artikulong ini sa kada panahon na dumalaw kamo. Sa angay na panahon, puwede nindong ibalyo sa sarong brochure o ponan an pag-adal sa librong Mabuhay Sagkod Lamang.
7 Nakakokontento nanggad na magkondukta nin pag-adal sa Biblia kaiba nin saro na tunay na naghahanap sa katotoohan! Bendisyonan logod kita nin mabungang ministeryo paagi sa pag-aplikar kan mga suhestion na itinao kun paano kukultibaron an interes na satong nanompongan.