Pataluboon an Interes sa Kahadean nin Dios na May Katoninongan
1 Durante kan bulan na ini nin Pebrero, itatampok niato an librong Puwede Kamong Mabuhay Sagkod Lamang sa Paraiso Digdi sa Daga. An satong katuyohan maninigo na tabangan an sadiosan an puso na mga tawo na makapatalubo nin pag-apresyar sa Kahadean nin Dios asin sa gigibohon kaiyan. An mga hapot sa punto-de-vista makatatabang sato sa katuyohan na ini.
2 Pakatapos nin makikatood na pataratara, puwede tang sabihon an arog kaini:
◼ “An nakakukubhan na mga pagliliwat sa gobyerno nangyayari sa bilog na daga, asin an pasohan na katoninongan parateng nasasambitan. Sa paghona daw nindo makakamtan pa an tunay na katoninongan? [Pakomentohon.] Minsan ngani dakol an naglalaom sa tawong mga poon na magdara nin katoninongan, mangnoha kun paano nanunuga an Dios na magdara nin katoninongan sa Salmo 46:9. [Basahon.] Anong mga pagliliwat sa paghona nindo an dadarahon kan paghiro nin Dios? [Dangogon an simbag kan kagharong, dangan ipaheling an tract na Life in a Peaceful New World.] Naiimahinar daw nindo an ilinaladawan digdi?” Pag-olayan an impormasyon sa irarom kan subtemang “Life in God’s New World.” Dangan puwede tang ihapot: “Sa paghona daw nindo an gobyerno nin Dios makapangyayari kan mga pagliliwat na ini?” Buksan an Kapitulo 13 kan librong Mabuhay Sagkod Lamang asin pag-olayan an enot na duwang parapo. Ialok an libro asin areglohon an pagdalaw liwat.
3 O puwede niatong sabihon:
◼ “Grabe an kahaditan dapit sa mga problema na kaipuhan na atubangon niato gabos sa aroaldaw. Sa paghona daw nindo igwa pa nin paglaom na makaginhawa sa mga problemang ini? [Pakomentohon.] Tibaad may mga naghohona na an Dios indiperente sa satong kamugtakan. Pero mangnoha an ipinanunuga nia sa Kapahayagan 21:3, 4.” Basahon an mga bersikulo. Sa puntong ini puwedeng itampok an librong Mabuhay Sagkod Lamang, an presenteng magasin, o an tract na An Kinaban daw na Ini Magdadanay? Kun iinaalok an tract, puwedeng pag-olayan an materyal sa pahina 2 asin 3 sa irarom kan temang “An Kaaabtan kan Kinaban na Ini.” Kun ipinaheheling an interes, puwede nindong ialok an librong Mabuhay Sagkod Lamang. Kun ialok nindo an brochure na An Dios daw Talagang May Pagmakolog sa Sato?, puwedeng palatawon an hapot na: “Taano daw ta tinogotan nin Dios an kasakitan?” Itokdo an kabtang 6 sa brochure, asin iareglo na pag-olayan ini sa masunod na pagdalaw.
4 Tibaad booton nindong itampok an sarong artikulo sa saro kan presenteng mga magasin paagi sa pagkomento sa espisipikong punto sa piniling artikulo.
Kun nagpapahayag nin interes an kagharong, iintrodusir an magasin, tibaad paagi sa pagsabing:
◼ “An artikulong ini ipinaliliwanag nin mas detalyado an manongod sa tema. [Basahon an dati nang piniling saro o duwang sentence.] Ipinaliliwanag kan artikulo an dugang pang punto na makapakokosog saindo asin sa saindong pamilya. Mantang garo baga interesado kamo sa temang ini, maoogma kaming iwalat saindo an luwas na ini asin an kaibanan kaiyan na magasin.”
5 An mga tawo ngonyan parateng nariribaraw kun saen madolok para sa mga simbag sa mga problema na napaaatubang sa katawohan. Igwa kita kan pribilehiyo na ihiras sainda an malinaw na paglaom para sa ngapit. (Gibo 17:27) Kun siring, maigot logod niatong darahon an atension kan mga tawo sa Kahadean nin Dios, an tunay na gikanan nin katoninongan.