Madudugangan daw Nindo an Saindong Pag-omaw ki Jehova Durante kan Abril?

¹ Si David igwa nin odok sa pusong pagmawot na omawon si Jehova, kaya sinabi nia: “Oomawon kong gayo si Jehova paagi sa sakong ngoso, asin sa tahaw nin dakol na banwaan oomawon ko sia.” (Sal. 109:30) An Abril magayon na panahon na ‘magdugang sa gabos na pag-omaw sa saiya’ paagi sa pagdagdag sa satong kabtang sa ministeryo. (Sal. 71:14) Nagpaplano daw kamong gibohon ini paagi sa pag-iba sa bilang kan mga auxiliary payunir?

² Planohon Na Ngonyan: “An mga plano kan mahigos siertong pasiring sa pakinabang,” an sabi kan Talinhaga 21:5. Ini nangangahulogan nin pagdolok ki Jehova manongod sa bagay paagi sa pamibi, na ibinubugtak siang enot sa saindong mga plano. (Tal. 3:​5, 6) Sunod siyasaton an saindong iskedyul tanganing maheling kun saen puwedeng gumibo nin mga pagliliwat tanganing makagamit nin duwang oras kada aldaw sa ministeryo. An ‘pagtubos kan panahon’ sa ibang aktibidad nagtotogot saindo na idusay an mas dakol na oras sa paghuhulit.​—Efe. 5:16.

³ Makikomunikar Asin Makikooperar: Si apostol Pablo nasambitan an nagkapira na “nakapagpapakosog na tabang” sa saiya sa pag-otob kan saiyang ministeryo. (Col. 4:11) Ipakipag-olay an saindong mga plano sa iba na boot na magpalista sa Abril. An saindang pagsuportar asin pakiibaiba makatatao nin espirituwal na mga pakinabang. An paraataman sa paglilingkod makatatabang saindo kun igwa kamo nin mga hapot dapit sa mga areglo sa paglilingkod.

⁴ An kooperasyon sa laog kan pamilya makatatabang sa ibang miembro na mag-auxiliary payunir. An iskedyul sa mga gibohon sa harong tibaad kaipuhan na temporaryong liwaton. An pampamilyang pag-orolay manongod sa mga pangangaipong ini makatatabang sa pag-otob kan saindong katuyohan. An marahay na komunikasyon asin kooperasyon iyo an mga liyabe sa kapangganahan.

⁵ Papagdanayon an Positibong Kaisipan: Dai tolos magsabing dai nindo kayang mag-auxiliary payunir huli sa bakong marahay na mga kamugtakan. An mga hobenes sa eskuwelahan, retirado, agom na babae na may mga aki, payo kan pamilya na bilog na panahon na nagtatrabaho, gabos nakaauxiliary payunir kan Abril. Minaoyon sinda sa salmista na “sa kabtang kan mga matanos angay an pag-omaw,” asin nagin andam sinda na gumibo nin ekstrang paghihingoa na gumamit nin 60 oras sa ministeryo. (Sal. 33:1) Kun dai kamo nakapalista, taano ta dai makikabtang sa kagayagayahan paagi sa pagdugang sa saindong aktibidad bilang parahayag?

⁶ Para sa dakol, an pag-auxiliary payunir sa Abril nagin tangga sa paglilingkod bilang regular payunir. Sa pakadugang sa saindang aktibidad, naheling nindang mas madali na magpalista bilang regular payunir.

⁷ An Abril magayon na panahon para sa nadugangan na teokratikong aktibidad, huli sa marahay na kamugtakan nin panahon asin mga bakasyon sa eskuwelahan. Sa parate makagigibo kita nin mas dakol na pagpatotoo sa amay na aga asin mga banggi. Iyo, an pag-auxiliary payunir sa Abril sarong marahay na paagi na madugangan an pag-omaw ki Jehova.