Mga Paagi na Mapaoswag an Satong Paghuhulit kan Kahadean
1 An satong paghuhulit orog na apretado ngonyan kisa kasuarin pa man. Kun baga an mga tawo mabubuhay o magagadan madepende sa saindang reaksion sa maogmang bareta. (1 Ped. 4:5, 6, 17; Kap. 14:6, 7) Kun siring maninigo kitang perming magmaigot na mapaoswag an satong paghuhulit kan Kahadean. Ano an nagkapirang paagi na gumibo nin pag-oswag?
2 Mag-andam nin Marhay: Ginagamit an presenteng luwas kan An Satong Ministeryo sa Kahadean, pumili nin pag-aatubang na makakaakit sa mga tawo sa saindong teritoryo. O tibaad boot nindong andamon an saindo mismong pag-aatubang, na ginagamit an Kasuratan na nanompongan nindong epektibo. Kakaipuhanon nindo an introduksion na nakakapukaw nin interes. (Helingon an librong Reasoning, pahina 9-15.) Tibaad nagpaplano kamong hapoton o hagadan nin komento an kagharong manongod sa sarong lokal na bareta. Kun nasa isip na nindo an saindong pag-aatubang, ensayohon iyan kaiba nin sarong miembro nin pamilya o saro pang parahayag na makakatao saindo nin mga suhestion para sa pag-oswag.
3 Makipag-olay sa mga Tawo: An satong katuyohan iyo na ipaabot an mahalagang mensahe. Magigibo ini paagi sa pakikipag-olay sa mga tawo. Kun minapalataw nin pagkontra an kagharong o nagtatao nin opinyon, maingat na maghinanyog sa saiyang sasabihon. An saiyang mga komento matabang saindo na magtao nin Makakasuratan na simbag. (1 Ped. 3:15) Kun an saiyang punto-de-vista dai nakakaoyon sa Biblia, puwede nindong sabihon: “Dakol na tawo an nakakamate nin siring kan saindong namamatean. Alagad, igwa nin saro pang paagi na masabotan an tema.” Dangan basahon an angay na teksto, asin hagadon an saiyang komento.
4 Magkaigwa nin Madaling Ibagay na Iskedyul: An pagigin andam na marhay magigin kakadikit an halaga kun dai kamo makapakipag-olay sa mga tawo. Sa nagkapirang lugar ngonyan kakadikit sanang kagharong an nasa harong kun kita nagsosongko. Kun totoo iyan sa saindong teritoryo, hingoahon na liwaton an saindong iskedyul tanganing makadalaw kamo kun mas dakol na tawo an nasa harong. Tibaad an pinakamarahay na panahon na sumongko iyo an mga Sabado asin Domingo; an iba puwedeng mas pasil na makaolay sa amay na mga banggi. An mga tawo mas relaks sa pankagabsan asin mas andam na makipag-olay sa siring na mga panahon.
5 Analisaron an Pagkaepektibo kan Saindong Pag-aatubang: Pakahale sa kada pinto, hapota an sadiri: ‘Naabot ko daw an puso kan kagharong? Pinakosog ko daw sia na magtaram asin nagdangog daw ako sa saiyang sinabi? Nagsimbag daw ako sa mataktikang paagi? Ginamit ko daw an pinakamarahay na pag-aatubang?’ Puwedeng magin nakakatabang na gumibo kaiba nin sarong eksperyensiadong parahayag o payunir paminsanminsan asin maghinanyog nin maingat sa saiyang mga pag-aatubang tanganing mapaoswag an saindo mismong pagkaepektibo sa ministeryo.
6 Kun kamo eksperto sa saindong gibohon, makakapaghiras kamo kan mga katotoohan kan Kahadean na ‘ililigtas an saindo man sana asin idtong naghihinanyog sa saindo.’—1 Tim. 4:16; Tal. 22:29.