Hapot
◼ Anong pag-iingat an kaipuhan kun kita naghuhulit sa peligrosong teritoryo?
1 Paorog nang paorog na nakadadangog kita nin mga bareta manongod sa kadahasan, paghipa, asin sosyal na kariribokan, espesyalmente sa mga siudad. Minsan ngani kita nakamamate nin paghadit, aram niato na minsan sa mga lugar nin kariribokan, igwa nin sinserong mga tawo na minaako sa mensahe kan Kahadean. Kaya kaipuhan kitang magin mapuso, na nagtitiwala sa mapagbantay na pangangataman ni Jehova.—Tal. 29:25; 1 Tes. 2:2.
2 Kun kita minaduman sa sarong peligrosong lugar, linalaoman kita ni Jehova na magin maingat asin gamiton an marahay na paghusgar. Magin alisto. “Mapagmansay an saro na nakaheling kan kapahamakan asin nagtago, alagad an daing kabatiran nag-agi asin kaipuhan na magtios kan padusa.” (Tal. 22:3) Inaapresyar kan eksperyensiadong mga parahayag an kadonongan nin paghuhulit na padis-padis o na grupo-grupo an nagkapirang parahayag, kun kaipuhan. (Ecl. 4:9, 12) An hanap kan mga kriminal sa parate mga nagsosolo asin sa siring madaling mabiktima.
3 Mag-ingat sa pag-ako nin imbitasyon na lumaog sa sarong harong o apartment. Dai makidiskutiran sa mga nagpaparisa nin panhuhuma o pan-aangat. Magin listo na ipamidbid an sadiri na saro sa Mga Saksi ni Jehova. An nagkapirang parahayag perming igwang kapot na Biblia o sarong Torrengbantayan o Awake! bilang midbidan.
4 Magbantay sa mga indibiduwal na naglalagawlagaw sa palibot. Dai magsulot nin mamahalon na mga alahas. Kun kinakaipuhan nindong magluwas na madiklom na, likayan na maglakaw sa mga kalyeng madiklom kun saen dikit an tawo. Kun kamo biktima nin panhihipa, dai makilaban kun kuarta o mga rogaring sana nindo an gusto ninda; orog na mahalaga an saindong buhay kisa sa ano pa man na materyal na bagay na sadiri nindo.—Mar. 8:36.
5 An nangengenot na mga tugang na lalaki dapat na magin alisto, na sinusubaybayan an mga parahayag sa teritoryo. Pinakamarahay na papagdanayon na magkairiba an grupo sa sarong lugar tanganing perming harani an iba. Kun pumoon an ano man na kariribokan sa kataraning na lugar, dapat na humale tolos-tolos an grupo sa teritoryo.
6 Kun kita alisto asin maingat, puedeng padagos na maabot niato minsan an mga tawong nasa peligrosong mga lugar na “nag-aaragagha asin nag-aagrangay huli sa gabos na makababaldeng bagay na ginigibo.”—Ezeq. 9:4.