“Lubos na Magpatotoo”—Paagi sa Paghuhulit sa mga Edipisyong Apartment
1. Ano an kaiba sa ‘lubos na pagpatotoo sa maogmang bareta’?
1 Arog ni apostol Pablo, an kamawotan niato iyo na “lubos na magpatotoo sa maogmang bareta.” (Gibo 20:24) Sa dakol na siudad asin banwaan sa Pilipinas ngonyan, kaiba digdi an paghuhulit sa mga nakaistar sa mga edipisyong apartment. Kun beses, puedeng depisil na makalaog sa siring na mga pasilidad.
2. Taano ta kaipuhan sa paghuhulit sa mga apartment an pagkamataktika asin marahay na paghusgar?
2 Huli sa peligro na magkaigwa nin krimen asin kadahasan, dakol na edipisyong apartment an nakabarat asin may guardia o surveillance camera. (2 Tim. 3:1, 2) An namamahala dian tibaad may regulasyon na dai puedeng lumaog an mga indibiduwal na daing permiso. Tibaad sabihan ninda kita na maghale, nangorogna kun nagrereklamo an saro sa mga nakaistar dian. Kun siring, mahalaga an pagkamataktika asin pagkaigwa nin marahay na paghusgar.
3. Noarin an pinakamarahay na maghulit sa mga apartment, asin taano?
3 Kun Noarin Maghuhulit: Arog kan sa iba pang klase nin teritoryo, pinakamarahay na maghulit sa mga apartment sa panahon na posibleng marhay na yaon an mga residente. Naaabotan nin dakol na parahayag an mga residente kun amay na banggi saka kun hapon nin Sabado asin Domingo. Kun amayon na maghuhulit sa mga apartment, nangorogna kun katapusan nin semana, an mga residente tibaad magreklamo sa namamahala dian.
4, 5. Paano kita puedeng makalaog sa nagkapirang apartment na nakabarat an laogan?
4 Paglaog: Dai maninigong kontakon nin mga parahayag an namamahala o an siisay man na iba pang nagtatrabaho para sa apartment bago pumoon sa ministeryo. Kun may intercom sa luwas kan nakabarat na edipisyo, puede niatong gamiton iyan sa paghanap nin saro na mapalaog sa sato tanganing makaolay sia. Depende sa klase nin mga apartment, tibaad puede na niatong dumanan an iba pang mga pinto sa edipisyo pakatapos na kaolayon an tawong nagpalaog sa sato. Minsan siring, sa ibang mga kamugtakan, sarong kadonongan na lumuwas sa edipisyo asin gamiton an intercom tanganing kaolayon an sunod na residente. Maninigo kitang gumamit nin marahay na paghusgar sa pagdesisyon kun pirang nakaistar an kakaolayon niato sa paaging ini sa panahon man sanang iyan.
5 Tibaad mas gusto nin nagkapirang nakaistar na sabihon nindo sa sainda paagi sa intercom an katuyohan kan saindong pagdalaw. Kun siring kaiyan, magpamidbid sa makikatood na paagi. Gamiton an ngaran kan kagharong kun nakalista iyan sa may intercom. Sa deretso sa puntong paagi, sambiton an temang gusto nindong ipakipag-olay. Nagin mapanggana an nagkapira paagi sa pagbasa nin introduksion nin direkta sa librong Reasoning.
6. Ano an maninigo niatong gibohon kun naghuhulit sa mga edipisyo na may guardia?
6 Kun may guardia an edipisyo asin sia dai magtogot na kaolayon niato an mga nasa apartment, puede kitang maghingoang magpatotoo sa saiya. Dakol na guardia an gustong magbasa kan satong mga babasahon. Puedeng makapoon pa ngani kita nin pag-adal sa Biblia asin gibohon iyan sa lobby. Kun togotan kita kan guardia na dalawon an sarong espesipikong nakaistar na nagpaheling nin interes, sa parate pinakamarahay na dai na magtuktok sa ibang mga pinto sa edipisyo.
7. Ano an maninigo tang girumdomon mapadapit sa bag na gagamiton niato sa paghuhulit?
7 Itsura Asin Marahay na Ugale: Magigin risang-risa kita kun madara kita nin darakulang portpolyo. Kun siring, puede niatong probaran na gumamit nin mas sadit na bag o dai na ngani magdara nin bag. Ibinubugtak nin nagkapirang parahayag an itatampok na mga babasahon sa sarong mahimpis na folder asin kapot-kapot o nasa bulsa an saindang Biblia.
8. Paano maninigong organisaron an grupo para sa paghuhulit sa mga apartment?
8 Pinakamarahay na dai magtiripontipon sa darakulang grupo, nangorogna sa mga lobby o paradahan, huling ini makakaapod nin dai kinakaipuhan na atension. Maninigo na angay na magmaan kun naghuhulit sa mga apartment na nasa mga lugar na dakol an krimen. (Tal. 22:3) Halimbawa, an duwa o tolong padis na parahayag puedeng maghulit sa iyo man sanang eskalon sa distansia na nadadangog ninda an lambang saro, na tibaad nagsasarosalida sa pagtuktok sa mga pinto mientras na naghahalat an iba.
9. Paano kita puedeng magpaheling nin paggalang, asin taano ta mahalaga ini?
9 Kun palaog sa edipisyong apartment, siertohon na malinig an saindong sapatos asin serahan an pinto kan laogan. Paagi sa pagpaheling nin siring na paggalang, naiinaan niato an mga dahelan na magreklamo an mga nakaistar dian. Kun nasa laog na, dumiretso na tolos sa elebeytor o sa eskalon na duman maghuhulit imbes na maghaloy sa may laogan. Makakatabang ini na mahale an pagsuspetsa nin mga nagmamasid.
10. Sa mga pasilyo, paano niato malilikayan na makaribok na dai man kaipuhan?
10 Sa dakol na edipisyong apartment, nadadangog sa mga pasilyo an ribok. Kun siring, magtaram na madadangog sana kan kagharong. Kun nakikipag-olay sa ibang mga parahayag, papagdanayon na maluya an boses nindo, alagad magtaram sa kalmado asin tama sanang tono nin boses tanganing dai makapukaw nin pagsuspetsa. Tanganing an mga nakaistar dai man gayong madisturbo, an nagkapirang parahayag nagtutuktok sa sarong pinto sa sarong poro kan pasilyo, dangan sa ibong naman na pinto sa ibong na poro kan pasilyo sagkod na mahulitan an eskalon na iyan, imbes na magtuktok sa sunod-sunod na pinto kan pasilyo. Dugang pa, an pagtuktok sa pinto sa makosog o garo may autoridad na paagi tibaad magin dahelan na matakot an mga nasa laog.
11. Anong mga suhestion an puedeng makatabang kun nagtutuktok kita sa sarong pinto na may sadit na labot na siripan?
11 Kun an pinto may sadit na labot na siripan, tumindog kamo asin an saindong kaibanan sa paagi na maheheling kamo kan siisay man na nagsisirip dian. Humeling nin direkta sa labot na iyan, asin kun marisa nindo na may nagsisirip dian, maogma siang taratarahon asin ponan an saindong presentasyon. Kun sia maghapot nin, ‘Siisay iyan?’ tibaad pinakamarahay na sabihon an saindong ngaran asin an ngaran kan kaibanan nindo. Dangan tibaad magigin mas komportable na an kagharong na bukasan an pinto. Kun dai, puede pa man giraray nindong sabihon an saindong presentasyon sa may pinto.
12. Paano niato malilikayan an mga problema kun nagwawalat nin mga babasahon sa mga apartment na mayong tawo?
12 Mga Apartment na Mayong Tawo: An mga babasahon na isinalipit sa pinto madali sanang mahulog sa salog asin magin basura. Kun siring, an ano man na babasahon na iwawalat sa mga apartment na mayong tawo maninigong ibugtak sa lugar na dai iyan maheheling nin mga nag-aagi.
13. Ano an maninigo niatong gibohon kun makanompong kita nin anggot na kagharong?
13 Anggot na mga Kagharong: Kun makanompong kita nin anggot na kagharong na tibaad andam na apodon an namamahala, pinakamarahay na humale sa eskalon na iyan asin bumalik sa ibang panahon. Sa ibang mga kamugtakan, sarong kadonongan na humale na sa edipisyo tanganing makalikay sa posibleng komprontasyon sa namamahala. Dawa kun dai espesipikong magsabi an kagharong na dai na sia pagdalawon sa masunod, mas marahay na isurat an numero kan apartment asin an impormasyon na dai na iyan dadalawon dangan iiba ini sa kard kan teritoryo. Siring kan ibang mga harong na dai na dadalawon, an mga adres na ini maninigong dumanan sa panapanahon tanganing aramon kun ano na an saboot kan kagharong.
14, 15. Ano an maninigo niatong gibohon kun sabihan kita nin sarong representante kan apartment na maghale?
14 Kun Sabihan Kamo na Maghale: Mantang naghuhulit sa edipisyo, kun an namamahala, mga guardia, tawohan sa pagmantener, o siisay man na iba pang representante kan apartment magsabi sa saindo na maghale kamo, sarong kadonongan na sumunod tolos-tolos. Sagkod na mapupuede, gusto niatong makalikay sa komprontasyon na maresulta sa panghuhuma na magibo sinda nin legal na aksion asin maapod nin mga pulis. Sa kadaklan na kamugtakan, an mga nagtatrabaho sa apartment mayo man nin diskriminasyon tumang sa Mga Saksi ni Jehova kundi ginigibo sana ninda an saindang trabaho.
15 Kun beses, kun sabihan kamo nin sarong representante kan edipisyo na maghale, tibaad puede nindong ipaliwanag sa maboot asin mataktikang paagi an dahelan kan saindong pagdalaw. (1 Ped. 3:15) Iginagalang niato an saiyang paninimbagan na papagdanayon na maogma an mga residente asin pirmeng magkaigwa nin seguridad sa edipisyo. Tibaad togotan nia kamong magdanay sa edipisyo. Alagad kun dai, magalang na humale. Kun itinotogot nin mga kamugtakan, puede kamong humagad nin permiso na regular na magwalat nin mga babasahon sa lobby. (Col. 4:6) Maninigong sabihon tolos sa paraataman sa paglilingkod an mapadapit sa siring na mga pangyayari.
16. Ano an maninigo niatong gibohon kun padagos na magkaproblema sa pagmamaigot tang maghulit sa sarong edipisyong apartment o grupo nin mga edipisyong apartment?
16 Pakalihis nin rasonableng lawig nin panahon, tibaad puedeng mataktikang probaran nin mga parahayag na maghulit sa edipisyong apartment na iyan. Kun dai mahulitan nin mga parahayag an mga apartment na iyan, puedeng maghingoang kontakon sa iba pang paagi an mga nakaistar, arog baga nin pagpapatotoo paagi sa telepono o pagsurat. An nagkapirang parahayag naghuhulit sa tinampo sa atubangan o sa harani sa edipisyong apartment sa mga oras nin aga asin banggi na an kadaklan na tawo malaog sa trabaho asin mapuli.
17. Taano ta mahalaga an paghuhulit sa mga apartment?
17 Madali na an katapusan kan maraot na sistemang ini. Solamente an mga nag-aapod sa ngaran ni Jehova an maliligtas. “Minsan siring, paano sinda mag-aapod sa saiya na dai ninda tinutubod? Paano man sinda matubod sa saiya na dai ninda nadangog?” (Roma 10:13, 14) Dakol na “may tamang inklinasyon sa buhay na daing katapusan” nakaistar sa mga apartment. (Gibo 13:48) Paagi sa pagkamataktika asin pagkaigwa nin marahay na paghusgar, mapapaabotan niato sinda kan maogmang bareta.