Personal na Pag-adal—Sarong Mahalagang Bagay
1 Anong mga bagay an mahalagang marhay? Maninigo kitang magin puka manongod sa paggibo asin pagpadanay nin dayupot na relasyon ki Jehova. An personal na pag-adal igwa nin dakulang kabtang sa pagpatalubo nin siring na pagkadayupot. Ngonyan, bakong dakol sa sato an nakakagamit nin haralawig na peryodo nin panahon sa personal na pag-adal. Alagad, kun dai ta regular na binabasa an Tataramon nin Dios, puwede kitang magin maluyang gayo na labanan an espiritu kan kinaban asin an makalaman na mga horot kaiyan.
2 Magkaigwa nin Pagmawot sa Tataramon: Kan enot niatong manodan an dapit sa mga katuyohan nin Dios, posibleng galaga kitang kumua nin orog pang kaaraman. Minsan siring, pakalihis nin sarong peryodo nin panahon, an satong pagkagutom sa espirituwal na kakanon tibaad nainaan na. Tibaad kinakaipuhan na magkaigwa nin “pagmawot” sa espirituwal na kakanon. (1 Ped. 2:2) Paano niato mapapatalubo an siring na pagmawot?
3 An parong nin sarong paboritong kakanon magpapagana sa sato. An haralipot na peryodo nin pag-adal puwedeng makaapektar sa sato sa espirituwal sa kaagid na paagi. An pagkakamit nin pirang espirituwal na punto puwedeng makapaorog sa satong apetito para sa mas hararom na mga katotoohan.
4 Gumibo nin Sarong Rutina na Pinakamarahay Para Saindo: An iba itinatagama an bilog na banggi tanganing personal na mag-adal, mantang an iba mas gusto an mas haralipot asin parateng mga peryodo nin pag-adal. Kun naheheling nindo na mas nakakakonsentrar kamo sa amay na aga, puwede kamong magdesisyon na mag-adal bago mamahaw. Kun mas alisto kamo sa banggi, puwede kamong mag-adal bago magtorog sa banggi. An mahalaga iyo na magin regular asin magdanay sa rutina na pinakaangay sa saindong mga pangangaipo.
5 Kun pinakokosog na personal na mag-adal nin orog pa, tibaad tolos kitang magsabi na pano na an satong iskedyul. Alagad, dapat kitang magin sadiosan sa pagsiyasat kun paano niato ginagamit an satong panahon. Dakol na oras daw an nauubos kada aldaw sa pagdalan nin telebisyon? An sadiosan na pagsiyasat sa satong iskedyul posibleng maghayag nin oras kada aldaw na puwedeng gamiton sa personal na pag-adal.—Efe. 5:15, 16.
6 Angay na tawan niato nin dai nababangang atension an pag-adal sa Tataramon nin Dios. Kun may tendensia kitang mag-adal mientras na nagkakakan, naghihinanyog sa radyo, o nagdadalan nin telebisyon, posibleng dai niato masabotan an hinihingoa niatong manodan. (1 Tim. 4:15) Kaya kaipuhan na haleon an mga nakalilingling.—Helingon an School Guidebook, pahina 33-4.
7 Mahalaga an aroaldaw na pag-adal sa sadol kan Biblia huli ta iyan an paagi na inaako niato an paggiya gikan ki Jehova. Aprobetsaran an lambang oportunidad, gurano man kahalipot, na basahon, repasohon, o horophoropon an manongod sa espirituwal na mga bagay.—Deut. 6:6-8; Col. 1:9, 10.