Perming Dakol na Gigibohon
1 Para sa banwaan ni Jehova, perming igwa nin ‘dakol na gigibohon sa gibohon kan Kagurangnan.’ (1 Cor. 15:58) Igwa nin semanal na mga pagtiripon na dapat andamon asin atenderan. Pinakokosog kita na makikabtang sa ministeryo sa langtad kada semana. Kaipuhan na magtagama nin panahon para sa personal asin pampamilyang pag-adal. Igwa nin dakol na asignasyon sa kongregasyon an mga magurang asin ministeryal na lingkod. Kun beses hinahagad sato na tumabang sa mga nangangaipo. Dugang pa, igwa kita nin mga obligasyon may koneksion sa satong pamilya, trabaho, asin eskuwelahan.
2 Paminsanminsan, an iba sa sato tibaad nahahadit sa gabos na kaipuhan niatong gibohon. Alagad, an pinakasibot na mga tawo puwedeng kabilang sa mga pinakamaogma kun napagdadanay an pagkatimbang asin tamang pagmansay.—Ecl. 3:12, 13.
3 Si apostol Pablo saro na nagkaigwa nin dakol na gigibohon. Nagpagal sia nin labi kisa sa ibang apostol. Nagmahigos sia bilang sarong ebanghelisador, mantang dai pinababayaan an saiyang mga responsibilidad bilang sarong pastor kan aripompon. Apuwera kan gabos na ini, inasikaso nia an saiyang personal na mga pangangaipo paagi sa pagtrabaho bilang sarong paragibo nin tolda. (Gibo 20:20, 21, 31, 34, 35) Sa ibong kan sibot niang iskedyul, perming galaga si Pablo na gumibo nin orog pa sa paglilingkod ki Jehova.—Ikomparar an Roma 1:13-15.
4 Pinagdanay ni Pablo an saiyang pagkatimbang asin maogmang puso paagi sa pagsarig ki Jehova para sa kosog. (Fil. 4:13) Aram nia na dai lilingawan nin Dios an saiyang gibo. (Heb. 6:10) An kagayagayahan nin pagtabang sa gabos na mamidbid si Jehova nakapakosog sa saiya. (1 Tes. 2:19, 20) An asegurasyon manongod sa saiyang paglaom na basado sa Biblia pinahiro sia na magdanay na mahigos.—Heb. 6:11.
5 Maninigo man na konsideraron ta an mararahay na ibinubunga kan satong mga pagpapagal. An satong pakikikabtang sa mga pagtiripon nagpaparigon asin nagpapakosog sa iba. (Heb. 10:24, 25) An satong mga paghihingoa na mapaabotan an iba kan maogmang bareta nakakakontribuwir sa pag-oswag kan kongregasyon mantang an mga bagohan nakikiasosyar sa sato. (Juan 15:8) An pagtabang sa iba na nangangaipo nagpapalakop sa kongregasyon nin sarong dayupot, arog-pamilyang espiritu. (Sant. 1:27) Saro pa, maninigong nungka niatong lingawan na an pagigin sibot sa mararahay na gibo nakaoogmang gayo ki Jehova Dios. Naniniwala kita na sarong dakulang pribilehiyo na maglingkod saiya. Para sa sato mayo nang mas marahay na dalan nin buhay!
6 Igwa nin dagdag na pakinabang sa pagkakaigwa nin dakol na gigibohon. Kun sibot kita sa espirituwal na mga bagay, an oras garo baga mas madaling minalihis. Sa pakarealisar na an kada aldaw na minalihis orog na nagrarani sa sato sa bagong kinaban, maogma niatong inaako an sibot na buhay na nakakamtan niato ngonyan. Narerealisar man niato an kadonongan nin pagdadanay na sibot, nangorogna ta kakadikit na an panahon niato na magin kalabot sa mayong kamanungdanan na kinabanon na mga aktibidad.—Efe. 5:15, 16.
7 Totoo, igwa nin dakol na gigibohon sa gibohon kan Kagurangnan. Pero magdadanay kitang maogma kun padagos kitang nagsasarig ki Jehova Dios asin ki Jesu-Cristo, na ginigibong nakakarepresko asin kapakipakinabang an satong paglilingkod.—Mat. 11:28-30; 1 Juan 5:3.