Dai Paglimitaran an Saimong Sadiri—Dawa Sibot-Sibot
1. Taano ta may mga nag-aalangan na mag-alok nin pag-adal sa Biblia?
1 May mga nag-aalangan na mag-alok nin pag-adal sa Biblia huli ta sibot-sibot sinda. Nangangaipo nin panahon an pag-asikaso sa sarong tinotokdoan sa Biblia. Nagkakaipo man nin panahon an pag-andam para sa pag-adal, pagkondukta kaiyan, asin pagtabang sa tinotokdoan na pangganahan an personal na kaolangan. Sinabi ni apostol Pablo na itinao nia an saiyang kalag tanganing tabangan an mga nasa Tesalonica na mamidbid si Jehova. (1 Tes. 2:7, 8) Paano kita makakapagkondukta nin pag-adal sa Biblia dawa pano an iskedyul niato?
2. Ano an epekto kan pagkamoot ki Jehova sa paggamit niato kan satong panahon?
2 Nagkakaipo nin Panahon an Pagsamba: Totoo nanggad na an pagsamba nagkakaipo nin panahon. Halimbawa, regular tang tinatawan nin panahon an pag-atender sa mga pagtiripon, pakikikabtang sa ministeryo, pagbasa kan Biblia, asin pamimibi. An sarong sibot na may agom naoogmang magtao nin panahon sa agom nia. Lalo nang dapat na maogma tang ‘tuboson’ an panahon tanganing sambahon si Jehova huli ta namomotan niato sia. (Efe. 5:15-17; 1 Juan 5:3) Oyon ki Jesus, an paggibo nin mga disipulo sarong mahalagang marhay na kabtang kan satong pagsamba. (Mat. 28:19, 20) An paghorophorop kaini makakatabang sa sato na dai mag-alangan na akoon an responsabilidad na magkondukta nin pag-adal sa Biblia.
3. Paano niato maaasikaso an satong kinokonduktahan nin pag-adal sa Biblia kun mayo kita sa kamugtakan na magibo iyan?
3 Pero paano kun igwa kitang trabaho, dai nahahaling helang, o teokratikong mga asignasyon? An nagkapirang parahayag na kun minsan kaipuhan magduman sa ibang lugar nagkokondukta nin pag-adal sa Biblia paagi sa telepono o kompyuter. An mga tugang na may dai nahahaling helang naggibo nin areglo na duman mag-adal sa harong ninda an tinotokdoan sa Biblia. Pinapakiolayan nin nagkapira an maaasahan na parahayag na iyo nguna an magkondukta kun dai sinda puede.
4. Ano an mga bendisyon sa pakikikabtang sa pagkondukta nin pag-adal sa Biblia?
4 Dakulang kagayagayahan an nakamtan ni Pablo sa pagtao kan saiyang panahon asin kusog tanganing tabangan an iba na makanood kan katotoohan. (Gui. 20:35) Kan hinohorophorop nia an bunga kan saiyang pagpapagal sa Tesalonica, napahiro siang pasalamatan si Jehova. (1 Tes. 1:2) Puedeng madagdagan an satong kagayagayahan asin pagkakontento sa ministeryo kun makondukta kita nin pag-adal sa Biblia dawa sibot-sibot kita.