Omawon si Jehova Aroaldaw

¹ An satong Dios, si Jehova, iyo an Burabod nin gabos na buhay asin kaogmahan. Angay siang omawon kan gabos niang linalang. Bilang indibiduwal, mawot niatong magsabi arog kan salmista: “Madugang ako sa gabos mong ikaoomaw. Isasaysay kan sakong ngoso an saimong katanosan, sa bilog na aldaw an saimong pagliligtas.” (Sal. 71:​14, 15) Tanganing magibo ini, dapat niatong hanapon an mga paagi na omawon si Jehova aroaldaw.

² An enot na mga Kristiano nagtao nin marahay na halimbawa sa pag-omaw ki Jehova. Mapadapit sa 3,000 na binautismohan kan Pentecostes, an Gibo 2:​46, 47 nagsasabi: “Sa aroaldaw sinda danay na nasa templo na may pagkasararo, . . . na nag-oomaw sa Dios asin nakakukua nin pabor sa bilog na banwaan.” Nakanood sinda nin makangangalas na mga katotoohan dapit ki Jehova asin sa saiyang Mesiyas. An saindang kagayagayahan nakapakosog sa iba pa na maghinanyog asin makanood patin omawon si Jehova.

³ Igwa nin mga Oportunidad Aroaldaw: Dakol ngonyan an nakanonompong na puede sindang mag-omaw ki Jehova aroaldaw paagi sa impormal na pagpatotoo. Nakatatabang sainda an patienot na pag-andam na magin mas mabunga. Nadiskobre nin sarong tugang na babae na nagdesisyon na makikabtang sa impormal na pagpatotoo na may puminasa kan duwang bintana asin luminaog sa saiyang kotse. Uminapod sia nin mahirahay dangan nag-andam na magpatotoo sa parahirahay. Kabale sa saiyang pag-andam an pamimibi para sa paggiya ni Jehova. Pinatotoohan nia an parahirahay sa laog nin sarong oras asin ikinapasakamot sa saiya an librong Mabuhay Sagkod Lamang.

⁴ An saro pang tugang na babae regular na nakakaolay an sarong kataed mientras na ilinalakawlakaw ninda an saindang mga ayam. Sarong aldaw, nagkaigwa sinda nin odok na orolay dapit sa mga problema sa buhay, asin iyan guminiya sa orog pang pag-orolay. Pag-abot nin panahon, naponan an pag-adal sa Biblia. Interesante nanggad, sa huri itinuga kan kataed na dai kutana sia naghinanyog sa Mga Saksi ni Jehova kun sinda nagtoktok sa saiyang pinto, huli ta dai sia nagtutubod sa Dios o sa Biblia.

⁵ An iba nakakapatotoo kun minatoktok sa saindang pinto an mga ahente. An sarong tugang na babae sa Irlandia sinongko nin sarong lalaki na nagpapabakal nin seguro. Ipinaliwanag nia na naglalaom sia na makamtan an buhay na daing katapusan. Ini bago para sa lalaking ini na Romano Katoliko. Inako nia an librong Mabuhay Sagkod Lamang, nag-atender nin pagtiripon kan suminunod na semana, asin uminoyon na magkaigwa nin pag-adal sa Biblia. Ngonyan an ahenteng ini saro nang bautisadong tugang.

⁶ Kita gabos magin alisto sa mga oportunidad na omawon si Jehova aroaldaw. Maglaag nin pirang magasin o tract kun saen puede iyan na maheling asin ikaalok sa mga bisita. May mga hoben na Saksi sa eskuelahan na nagbubugtak nin literatura sa Biblia sa saindang tukawan bilang sarong paagi na makapoon nin pakipag-olay sa saro na nakarereparo kaiyan asin naghahapot. Isaisip an saro o duwang reperensia sa Kasuratan na puede nindong magamit. Arangon ki Jehova na tabangan kamo. Bebendisyonan kamo sa paggibo kaiyan.​—1 Juan 5:14.