Pagbalangibog kan Katotoohan Aroaldaw Bilang Pag-arog ki Jesus
1 Si Jesus may espesipikong trabaho na gigibohon kan sia magdigdi sa daga sa ‘pagpatotoo sa katotoohan.’ (Juan 18:37) An gibohon na ini arog sa pagkakan para sa saiya. (Juan 4:34) Ibinareta ni Lucas na si Jesus padagos na “nagtokdo aroaldaw sa templo.” Kan madali na siang magadan, ikinapahayag nia sa saiyang Ama: “Pinamuraway taka sa daga, na hinaman ko an trabaho na itinao mo sakong gibohon.”—Juan 17:4.
2 Kun pano an satong puso nin pag-apresyar sa gabos na ginibo ni Jehova, kita man napahihiro na magtaram manongod sa saiya sa aroaldaw. Kita nagigin siring man sana kan mga disipulo ni Jesus na mapusong nagpahayag: “Dai kami puedeng mag-ontok sa pagtaram dapit sa mga bagay na samong naheling asin nadangog.” (Gibo 4:20) An saindang pagtaram dapit ki Jehova dagos-dagos, huli ta an rekord nagsasabi na “aroaldaw . . . nagpadagos sinda na dai nin ontok.” (Gibo 5:42) Maninigo niatong hapoton an satong sadiri, ‘Ako daw paraarog sa sakong Paratokdo, si Jesus?’
3 Paghuhulit na May Pagkaapurado: Ihinula ni Jesus na kun ikinapahayag na an mensahe kan Kahadean sa bilog na daga, “dangan madatong an katapusan.” (Mat. 24:14) Maninigong itadom kaini sa satong isip an importansia asin pagkaapurado kan satong gibohon. Mantang harani na an katapusan, nainaan na an panahon na natatada sa pagtapos kan gibohon na ini!
4 Ipinaheheling kan mga bareta na pinaririkas ni Jehova an gibohon na pagtitipon. (Isa. 60:22) Sa dakol na nasyon, nagbuburunyog an mga tawo sa katotoohan, na nagpapahayag: “Maiba kami sa saindo, huli ta nabaretaan niamo na an Dios yaon dian sa saindo.” (Zac. 8:23) Totoo an mga tataramon ni Jesus: “An anihon mahiwas, alagad an mga paraani kakadikit. . . . Makimaherak kamo sa Kagurangnan kan anihon na magsobol nin dakol pang paraani sa saiyang anihon.”—Mat. 9:37, 38.
5 Ipaaram an Katotoohan Aroaldaw: Aroaldaw maninigo kitang maghanap nin mga paagi na ipaabot sa iba an katotoohan. Puede daw nindong apodan sa telepono an sarong katood? O sumurat? Kumusta man an pag-alok nin tract sa paratinda kun kamo namamakal? Posibleng igwa kita nin iba pang mga oportunidad tanganing ikahiras niato sa iba an satong paglaom.
6 Aroaldaw maninigo niatong arogon an aktitud ni Jesus, na nagpaliwanag kun taano sia ta isinugo sa daga: “Kaipuhan na ipahayag ko . . . an maogmang bareta kan kahadean nin Dios.” (Luc. 4:43) Kun gusto niatong magin siring sa satong Paratokdo, bobooton man niato na gumibo kaiyan.—Luc. 6:40.