Nungka na Nagin Arog Kaini Karahay an Satong Kamugtakan sa Espirituwal!
1 An kadaklan na tawo naghihidaw sa aldaw na makasasabi na sinda, “Nungka na nagin arog kaini karahay an satong kamugtakan!” Boot nindang sabihon na naglalaom sindang magkaigwa nin abundang materyal na mga bagay, tangani na sinda ‘makapagpahingalo, makakakan, mag-inom, asin magpasiramsiram.’ (Luc. 12:19) Kabaliktaran, ngonyan mismo makasasabi kita na sa espirituwal na sentido, kita dai nagkukulang. (Sal. 34:10) Paano daw iyan posible?
2 An Talinhaga 10:22 nagsasabi na “an bendisyon ni Jehova—iyan an nakapayayaman.” Makasasabi kita na an Dios “nagtatao sa sato kan gabos na bagay para sa satong kaogmahan.” (1 Tim. 6:17) Ginigibo kita kaini na pinakamayaman na mga tawo digdi sa daga!
3 Pagmidbid sa mga Bendisyon sa Sato: Sa ibong kan pagkakaigwa nin kadikiton sa materyal, bako kitang sobra kahadit dapit sa satong mga pangangaipo sa aroaldaw. Aram ni Jehova kun ano an satong kaipuhan, asin nanunuga siang itatao iyan. (Mat. 6:31-33) Nagtatao ini sa sato nin katoninongan sa isip na tunay na mayong kaagid sa halaga.
4 Minsan siring, an satong espirituwal na mga bendisyon mas dakula pa ngani. Minadepende an satong buhay sa espirituwal na pagkakan gikan ki Jehova. (Mat. 4:4) An mga minadolok sa kinabanon na mga gikanan para sa espirituwal na pagkakan nagugutom mientras na kita lubos na pinaninigoan nin bastante kan ‘fiel na oripon.’—Isa. 65:13; Mat. 24:45.
5 An satong pambilog na kinaban na kasararoan nin magturugang nagtatao sa sato nin pakikiasosyar sa mamomoton na mga tugang sa gabos na parte kan daga. (Juan 13:35) An lokal na kongregasyon sarong lugar na makanonompong kita nin karangahan asin karepreskohan. An kamagurangan nagbabantay sa satong kalag, na tinatabangan kitang makapanggana sa dakol na klase nin problema. (Heb. 13:17) An satong pakikidayupot sa satong mga tugang nakaparirigon sa boot asin nakapakokosog sa sato na magtagal.—Roma 1:11, 12.
6 Pati an satong gibohon sarong bendisyon. An paghiras kan maogmang bareta nagtatao nin kagayagayahan sa iba asin kaogmahan sa sato mismo. (Gibo 20:35) Tunay na naheheling niato an karahayan sa gabos na satong pinagpagalan.—Ecl. 2:24.
7 Orog sa gabos, igwa kita kan makangangalas na paglaom para sa ngapit. (Roma 12:12) Naglalaom kita sa sarong sangkap na bagong kinaban na may katanosan, na iistaran niato kaiba kan satong mga namomotan na may kaogmahan asin katoninongan sagkod lamang!
8 Paano Niato Ikapaheheling an Satong Apresasyon? Nungka kitang makababayad ki Jehova sa saiyang ginibo para sa sato. Makapahahayag sana kita nin pag-apresyar paagi sa (1) pagpasalamat sa saiya aroaldaw huli sa saiyang dai na kutana maninigong kabootan (Efe. 5:20), (2) pagpaheling kan satong pagkamoot paagi sa pagigin makinuyog (1 Juan 5:3), (3) pagpakangbanal sa saiyang ngaran paagi sa paghuhulit kan maogmang bareta (Sal. 83:18), asin (4) pagsuportar sa Kristianong kongregasyon paagi sa satong bilog na pusong pakikikooperar.—1 Tim. 3:15.
9 Igwa kita kan gabos na dahelan na magin an pinakamaogmang mga tawo digdi sa daga. (Sal. 144:15b) An sato logod na kaisipan, paggawe, asin paglilingkod magpabanaag kan kagayagayahan na namamatean niato sa satong espirituwal na paraiso—nungka na nagin arog kaini karahay an satong kamugtakan!