Ihulit an Maogmang Bareta sa Gabos na Lugar

¹ Ihinulit kan enot na mga Kristiano an maogmang bareta sa gabos na lugar. Maigot sindang marhay kaya mayo pang 30 taon kan buhayon liwat si Jesu-Cristo, an mensahe kan Kahadean ‘ikinahulit na sa gabos na linalang sa sirong nin langit.’​—Col. 1:23.

² An maigot na mga lingkod ni Jehova ngonyan may parehong katuyohan​—paabotan an gabos na mapupuede kan maogmang bareta kan Kahadean. Ano an makatatabang sa sato na magibo an pasohan na ini? Padakol nang padakol na tawo an nagtatrabaho nin bilog na panahon asin parateng mayo sa harong kun kita minasongko. Kun sinda dai nagtatrabaho, sinda nagbibiahe, nananaod, o nag-aaling-aling. Paano an mga angay sa tahaw ninda napaaabotan kan mensahe kan Kahadean?​—Mat. 10:11.

³ An iba nakakaolay sa saindang pinagtatrabawohan. Dawa an saradit na banwaan igwang komersial na seksion kun saen an dakol na tawo yaon sa kadaklan na oras kan aldaw. Sa darakulang siudad, an mga tawo na nagtatrabaho sa industriyal na mga lugar o haralangkaw na edipisyo nin opisina asin an mga nag-eerok sa guardiadong marhay na mga apartment nag-aako nin patotoo​—an dakol sa kaenot-enote. Sa mga Sabado asin Domingo, an mga nakaolay mientras na nagrerelaks sa mga parke, lugar nin pag-aling-aling, o mientras na naghahalat sa mga paradahan o sa darakulang pamakalan nanompongan na marahay an pag-ako sa maogmang bareta.

⁴ Padakol nang padakol na parahayag an naggigibo nin espesyal na paghihingoa na magpatotoo sa pampublikong mga lugar, saen man manonompongan an mga tawo. Sa primero, an mga Saksing ini nag-aalangan asin garo baga ninenerbios huli ta natood sa paghuhulit sa harong-harong. Ano na an saboot ninda ngonyan?

⁵ “Ginibo kaiyan na magin aktibo giraray an sakong ministeryo!” an kagsing nin sarong eksperyensiadong tugang na lalaki. An saro pa nagsabi: “Pinagdanay ako kaiyan na konsentrado.” An mas gurang nang payunir nagkomento: “Nakapabagsik iyan sa mental, pisikal, asin espirituwal, . . . asin ako nagtatalubo pa!” An sarong parahayag nagsabi na naaabot na nia ngonyan an dakol na tawo na dai pa noarin man nakaolay an Mga Saksi ni Jehova. An hobenes entusiastiko man na nakikikabtang sa gibohon na ini. Arog kaini an pagkapahayag nin sarong hoben: “Nakaoogma iyan ta nakakaolay nindo an kadakoldakol na tawo!” An saro pa nagsabi: “Nakapagpapasakamot ako nin mas dakol na literatura kisa kasuarin pa man!” An gabos na ini nangyayari sa teritoryo na paorootrong nahuhulitan!

⁶ Nangengenot an Nagbibiaheng mga Paraataman: Nakaaaram na “an kamugtakan kan kinaban na ini nagbabago,” dai pa sana nahahaloy na isinuherir kan Sosyedad na liwaton kan nagbibiaheng mga paraataman an saindang iskedyul nin paglilingkod sa langtad serosemana tangani na sagkod sa pinakadakol na tawong mapupuede an mapaabotan kan maogmang bareta. (1 Cor. 7:31) Sa laog nin dakol na taon, itinagama kan mga paraataman sa sirkito an mga aga sa tahaw kan semana sa paghuhulit sa harong-harong, mantang idinusay an mga hapon sa mga pagdalaw liwat asin pagkondukta nin mga pag-adal sa Biblia sa harong. Sa nagkapirang lugar, an iskedyul na iyan tibaad praktikal pa. Sa iba, tibaad dikit an magigibo paagi sa pagharongharong durante kan mga aga sa tahaw nin semana. Sa siring na mga situwasyon, puedeng magdesisyon an nagbibiaheng paraataman na sa amay na aldaw marahay na maghulit sa mga tindahan o magpatotoo sa tinampo. O puede niang areglohon an saradit na grupo na magpatotoo sa haralangkaw na edipisyo nin opisina, mga pamakalan, paradahan, o iba pang pampublikong mga lugar. Paagi sa mas epektibong paggamit nin oras sa paglilingkod sa langtad, dakol pang tawo an makakaolay.

⁷ Ipinaheheling kan mga report na an pagliliwat na ini inakong marhay kan nagbibiaheng mga paraataman asin siring man parahayag. Hinagad kan nagkapirang grupo nin kamagurangan na sanayon kan paraataman sa sirkito an pirang parahayag sa mga kabtang kan gibohon na nangangaipo nin atension. Nakinabang an mga parahayag na ini paagi sa pag-iba sa nagbibiaheng paraataman mantang ginigibo nia an saro sa mga aktibidad na ini. Sinda man nakapagsanay nin iba. (2 Tim. 2:2) Bilang resulta, dakol nang tawo an naaabot ngonyan kan maogmang bareta.

⁸ Siempre, dai na nindo kaipuhan pang halaton na dumalaw an paraataman sa sirkito tangani na probaran an nagkapira sa iba pang mga paagi na ini nin paghuhulit. Uya an laen-laen na ideya na puede nindong manompongan na praktikal sa saindong teritoryo:

⁹ Pagpatotoo sa Tinampo: ‘Haen an gabos na tawo?’ an kun beses ihinahapot niato mantang sinosongko niato an sarong kahaharongan na daing tawo sarong aga sa tahaw kan semana. An iba tibaad namamakal. Naprobaran na daw nindong makaolay sinda paagi sa pagpatotoo sa tinampo? Kun tama an paggibo kaiyan, an kabtang na ini kan ministeryo puedeng magin mabungang marhay. Imbes na tumindog sa sarong lugar na kapot an mga magasin, pinakamarahay na dolokon an mga tawo asin ponan an makikatood na pag-orolay. Dai kaipuhan na magpatotoo sa lambang minaagi. Makipag-olay sa mga dai naghihidale, siring baga kan mga nagmamasidmasid sa mga tindahan, mga nasa nakaparadang sasakyan, o mga tawong naghahalat nin pampublikong transportasyon. Sa primero, puedeng tumao sana kamo nin makikatood na pagtaratara asin halaton an reaksion. Kun boot kan tawo na makipag-olay, hagadon an saiyang opinyon manongod sa sarong tema na paghona nindo tibaad interesante sa saiya.

¹⁰ Kan dinadalaw an sarong kongregasyon, inagda kan nagbibiaheng paraataman an anom na parahayag na umiba sa sainda mag-agom sa pagpatotoo sa tinampo. May anong mga resulta? “Nagkaigwa kami nin kahangahangang aga!” an bareta nia. “Mayo nin mga tawong dai sa harong. Otsentang magasin asin dakol na tract an ikinapasakamot. Nagkaigwa kami nin nagkapirang nakapupukaw na pag-orolay. An saro sa mga parahayag, na naghulit sa tinampo sa kaenot-enote, nagkagsing: ‘Dakol nang taon akong nasa katotoohan asin dai ko narerealisar kun ano an nalilipasan ko!’ Sa katapusan kan semana, naubos an sobrang istak na suplay nin magasin kan kongregasyon.”

¹¹ Mantang naglilingkod sa sunod na kongregasyon, naisihan kan iyo man sanang nagbibiaheng paraataman na an nagkapirang parahayag nakikabtang sa pagpatotoo sa tinampo sarong amay na aga alagad limitado sana an kapangganahan. An sarong tugang na babae duwa sanang tawo an nakaolay durante kan bilog na peryodo nin pagpatotoo, huling an gabos na nanompongan nia naghihidale pasiring sa trabaho. Isinuherir kan nagbibiaheng paraataman na sinda gabos bumalik sa iyo man sanang tinampo mataodtaod kan aga. Nagduman sinda, asin nagdanay sinda sagkod odto. An tugang na babae na nagkaigwa nin duwa sanang pakipag-olay kan mas amay na aga nakagibo nin orog karahay kan sia bumalik. Nakapasakamot sia nin 31 magasin asin 15 brochure, nakua an mga ngaran asin adres nin pitong indibiduwal, asin nakapoon nin duwang pag-adal sa Biblia sa harong! An iba sa grupo nagkaigwa nin kaparehong nakaparirigon sa boot na mga bunga.

¹² Kun nakanonompong kamo nin saro na nagpapaheling nin interes, pagmaigotan na kuanon an ngaran kan tawo, adres, asin numero kan telepono. Imbes na hagadon tolos-tolos an impormasyon, puede nindong sabihon: “Naogma ako sa orolay na ini. Igwa daw nin paagi na ikapadagos niato iyan sa ibang panahon?” O hapoton: “Igwa daw nin paagi na maabotan ko kamo sa harong?” An dakol na nakaolay sa paaging ini minaoyon na dalawon liwat. Siertohon na igwa kamo nin supisyenteng suplay nin mga handbill para sa siisay man na gustong umatender sa satong mga pagtiripon.

¹³ Kun nakaolay nindo an sarong interesadong tawo na nag-iistar sa teritoryo na asignado sa ibang kongregasyon, maninigo nindong itao an impormasyon tangani na makultibar kan mga tugang duman an interes. An pagpatotoo daw sa tinampo epektibong paagi na ikapalakop an maogmang bareta sa saindong lugar? Kun iyo, repasohon an artikulong “Paghanap sa mga Interesado Paagi sa Epektibong Pagpatotoo sa Tinampo” sa Hulyo 1994 luwas kan An Satong Ministeryo sa Kahadean. Dangan iareglo na magpatotoo sa tinampo sa angay na oras nin aldaw na magpapangyari sa saindo na aboton an pinakadakol na tawo na mapupuede.

¹⁴ Pagpatotoo sa Pampublikong Transportasyon: Sarong aga nagkapirang payunir an nagdesisyon na magpatotoo sa mga tawo na naghahalat nin auto harani sa sarong lokal na kolehio. Mantang maogma sindang nakikipag-olay, igwa nin problema. Oras na maponan na an orolay, minaabot an auto, na minapaontok kan orolay. Rinesolberan kan mga payunir an problema paagi sa paglunad sa auto asin pagpadagos na magpatotoo sa mga pasahero mantang sinda nagbibiahe paluwas sa banwaan. Sa katapusan kan biahe, minalunad an mga payunir sa pabalik na auto, na nagpapatotoo mantang sinda nagbibiahe. Pakalihis nin nagkapirang pabalikbalik na biahe, sinuma ninda an mga resulta kan saindang mga paghihingoa: Labing 200 na magasin an ikinapasakamot asin anom na pag-adal sa Biblia an naponan! May mga pasaherong boluntad na itinao an saindang adres asin numero nin telepono tangani na madalaw sinda sa harong. Kan suminunod na semana, buminuelta an mga payunir sa pondohan nin auto asin sinunod an iyo man sanang paagi arog kan nakaagi. Nakapasakamot sinda nin 164 magasin asin nakapoon nin saro pang pag-adal sa Biblia! Sa sarong pondohan sarong pasahero an luminunad sa auto asin tuminukaw sa sasaro na sanang tukawan​—kataed kan sarong payunir. Hineling nia an tugang na lalaki asin nagsabi na nakahuyom: “Aram ko, igwa kamo nin Torrengbantayan para sa sako!”

¹⁵ An dakol na parahayag epektibong nakapagpapatotoo mientras na nagbibiahe sa auto, tren, o eroplano. Paano kamo makapopoon nin pakikipag-olay sa sarong pasahero na kataed nindo? An sarong 12 anyos na parahayag pinonan sanang basahon an sarong kopya nin Awake! sa auto, na naglalaom na mapukaw an pag-usyoso nin sarong tin-edyer na daragita na kataed nia. Epektibo idto! Hinapot sia kan daragita kun ano an saiyang binabasa, asin nagsimbag an hoben na binabasa nia an manongod sa solusyon sa mga problema na dapat atubangon nin hobenes. Idinugang nia na nakinabang siang marhay sa artikulo asin na idto makatatabang man sa saiya. Maogma niang inako an mga magasin. An saindang pag-orolay nadangog nin duwa pang hoben na naghagad man nin mga kopya kan mga magasin. Sa puntong ini, puminondo an drayber sa gilid kan tinampo asin naghapot kun taano ta kadakoldakol na nagkakainteres sa mga magasin na ini. Kan maaraman nia, nag-ako man sia nin mga kopya. Siempre, ni saro sa mga ini dai kutana nagin posible kun an hoben na parahayag mayong bastanteng suplay nin mga magasin na ikahihiras sa gabos na nagpaheling nin interes!

¹⁶ Pagpatotoo sa mga Parke Asin Paradahan: Kun itinotogot kan kamugtakan nin panahon, an pagpatotoo sa mga parke asin paradahan ekselenteng paagi na maabot an mga tawo. Naprobaran na daw nindong magpatotoo sa paradahan nin sarong komersial na lugar? Pag-abot nindo sa paradahan, gumamit nin pirang minuto sa pag-obserbar sa saindong palibot. Humanap nin saro na dai naghihidale o saro na naghahalat sa nakaparadang kotse asin probaran na pumoon nin makikatood na pakipag-olay. Kun nagpapadagos an orolay, iintrodusir an mensahe kan Kahadean. Probaran na magpatotoo nin separado alagad kaiba an sarong parahayag sa harani. Likayan an pagdara nin dakula, magabaton na bag o sa ibang paagi nakaaapod nin atension sa saindong gibohon. Magin madonong. Tibaad pinakamarahay na gumamit nin halipot sanang panahon sa sarong paradahan dangan bumalyo sa iba. Kun habo nin saro na makipag-olay sa saindo, magalang na humale asin humanap nin iba na makakaolay. Ginagamit an paaging ini, sarong tugang na lalaki an nakapasakamot nin 90 magasin sa laog nin sarong bulan mientras na nagpapatotoo sa mga paradahan!

¹⁷ May mga tawo na minaduman sa parke tangani na magrelaks; an iba minaduman tangani na magkawat o makaibaiba an saindang mga aki. Dai pinakikiaraman an saindang mga aktibidad, humanap nin oportunidad na makapagpatotoo. An sarong tugang na lalaki pinonan na kaolayon an paralinig sa sarong parke asin nadiskobre nia na ini nahahadit dapit sa droga asin sa ngapit kan saiyang mga aki. Naponan an pag-adal sa Biblia asin iyan regular na kinokonduktahan sa parke!

¹⁸ Impormal na Pagpatotoo sa Komersial na mga Lugar: Mantang bako perming posible na pormal na makapatotoo sa mga tindahan sa mga pamakalan huli sa lokal na mga restriksion sa siring na mga aktibidad, may mga parahayag na minagibo nin mga oportunidad na magpatotoo dian nin impormal. Minatukaw sinda sa bangko asin pinoponan an makikatood na pakipag-olay sa iba na minapondo tangani na magpahingalo. Kun ipinaheheling an interes, madonong nindang iinaalok an sarong tract o magasin asin hinihingoa na gumibo nin mga areglo para sa pagdalaw liwat. Pakalihis nin pirang minutong pagpatotoo sa sarong seksion kan komersial na lugar, minadagos sinda sa ibang seksion asin kinakaolay an iba pa. Siempre, maninigong mag-ingat na dai makakua nin dai maninigong atension mientras na impormal na nagpapatotoo sa paaging ini.

¹⁹ Kun tinataratara an sarong tawo, ponan an pakikipag-olay sa makikatood na paagi. Kun maghimate an naghihinanyog sa saindo, hapoton, dangan maghinanyog nin atentibo mantang ipinahahayag nia an saiyang sadiri. Magkaigwa nin personal na interes sa saiyang sinasabi. Ipaheling na pinahahalagahan nindo an saiyang opinyon. Kun mapupuede, umoyon sa saiya.

²⁰ An sarong tugang na babae nagkaigwa nin maogmang pakipag-olay sa sarong gurang nang babae paagi sa pagsabing mahalon na an barakalon. Uminoyon tolos an babae, asin sarong maogmang pag-orolay an ibinunga. Nakua kan tugang na babae an ngaran asin adres kan babae, asin nagibo an pagdalaw liwat kan semana man sanang idto.

²¹ Paghuhulit sa mga Tindahan: May mga kongregasyon na igwa nin komersial na mga lugar bilang kabtang kan iinasignar sa sainda na teritoryo. An tugang na lalaki na nag-aasikaso kan teritoryo puedeng mag-andam nin espesyal na mga kard nin mapa kan surusuan na marhay na komersial na mga seksion na ini. An ano man na kard nin mapa kan residensial na teritoryo na kasaknib kaiyan maninigong malinaw na magpaheling na an komersial na mga lugar huhulitan nin separado. Sa ibang teritoryo, an komersial na mga lugar puedeng hulitan kaiba kan mga residensia. Puedeng agdahon kan kamagurangan an kualipikadong mga parahayag na hulitan nin regular an komersial na mga lugar tangani na an paghuhulit sa mga tindahan dai mapabayaan.

²² Kun kamo inaagda na makikabtang sa gibohon na ini asin dai pa nindo noarin man nagigibo iyan, an marahay na paagi na ‘magkaigwa nin kapusoan’ iyo na hulitan nguna an nagkapirang mas sadit na tindahan; dangan, kun mas kompiado na kamo, hulitan an mas darakulang tindahan. (1 Tes. 2:2) Kun naghuhulit sa mga tindahan, magbolos na siring kun nag-aatender kamo sa pagtiripon sa Kingdom Hall. Kun mapupuede, lumaog sa tindahan kun mayong mga parokyano na naghahalat na maserbihan. Hagadon na makaolay an manedyer o an tawo na namamahala. Magin mainit, asin orog sa gabos, magin madali sana. Dai kaipuhan na humagad nin dispensasyon. An dakol na komersial na lugar interesado sa mga parokyano asin linalaoman na an mga pagkaistorbo.

²³ Pakataratara sa sarong namamahala sa tindahan, puede nindong sabihon ini: “An mga negosyante igwa nin pano-panong mga iskedyul na bihira na niamo sindang manompongan sa harong, kaya sinosongko niamo kamo digdi sa saindong lugar nin negosyo tangani na walatan kamo nin nakapupukaw sa isip na artikulong mababasa.” Dangan magkomento nin saro o duwa dapit sa bagong magasin.

²⁴ O puede nindong probaran ini kun kinakaolay an sarong manedyer: “Nariparo niamo na an mga negosyante naghihingoang maimpormaran na marhay. An pinakahuring luwas kan An Torrengbantayan (o Awake!) nagtatampok nin artikulo na nakaaapektar sa sato gabos personalmente.” Ipaliwanag kun ano iyan, asin magkonklusyon paagi sa pagsabi: “Sierto niamong maoogma kamong basahon iyan.”

²⁵ Kun igwang mga empleyado, asin garo baga angay, puede nindong idagdag: “Boot daw nindong itao ko an iyo man sanang halipot na pag-atubang sa saindong mga empleyado?” Kun magtogot, girumdoma na nanuga kamong magin madali sana, asin an manedyer malaom na ootobon nindo an saindong tataramon. Kun may mga empleyadong boot na makipag-olay nin halawig, pinakamarahay na dalawon sinda sa saindang harong.

²⁶ Dai pa sana nahahaloy nagkapirang parahayag sa sarong sadit na banwaan an uminiba sa paraataman sa sirkito sa paghuhulit sa mga tindahan. An iba sa mga parahayag natakot sa primero, huling dai pa noarin man nakagibo kaiyan; alagad dai nahaloy nagin pamugtak an boot ninda asin nagpoon nang ikaogma iyan. Mayo pang sarong oras, nakaolay ninda an 37 katawo asin nakapasakamot nin 24 magasin asin 4 na brochure. Nagkomento an sarong tugang na lalaki na sa parate sa laog nin sarong bulan na pagharongharong, dai ninda nakakaolay an pinakadakol na tawo siring kan nakaolay ninda mientras na naghuhulit sa mga tindahan sa siring kahalipot na oras.

²⁷ Paggibo nin mga Oportunidad na Makapaghulit: Si Jesus dai nagkonsentrar kan saiyang pagpatotoo sa pormal na mga kamugtakan. Ilinakop nia an maogmang bareta sa gabos na angay na okasyon. (Mat. 9:​9; Luc. 19:​1-10; Juan 4:​6-15) Mangnoha kun paano an ibang parahayag naggigibo nin mga oportunidad na makapaghulit.

²⁸ May mga inuugale na magpatotoo sa mga magurang na naghahalat sa saindang mga aki harani sa laogan nin sarong eskuelahan. Mantang dakol na magurang an minaabot nin amay na sagkod sa 20 minutos, igwa pa nin panahon na kaolayon sinda sa nakapupukaw na paagi manongod sa Makakasuratan na topiko.

²⁹ Dakol na payunir an naghihingoang aboton an mga tawo na tibaad igwa nin espesyal na interes sa sarong partikular na tema na ipinaliliwanag sa satong mga magasin. Halimbawa, an sarong tugang na babae nakakua nin mararahay na reaksion sa pagdalaw sa anom na eskuelahan sa teritoryo kan saiyang kongregasyon na dara an mga seryeng “Schools in Crisis,” na luminuwas sa Disyembre 22, 1995 Awake! Sinongko man nia an family-care services na dara an mga magasin manongod sa buhay pampamilya asin pag-abuso sa aki asin inimbitaran na bumalik na dara an mga bagong luwas na nagpapaliwanag sa kaagid na mga topiko. An paghimate na inako nia sa opisina para sa mga mayong trabaho sa Marso 8, 1996 na Awake! manongod sa kadaihan nin trabaho ilinadawan na “labi-labi.”

³⁰ An sarong paraataman sa distrito nagbareta na sinda mag-agom regular na nagpapatotoo nin impormal mientras na sinda namamakal sa groseriya. Namamakal sinda sa oras nin aldaw na an tindahan bakong gayong surusuan, asin an mga parokyano naglalakaw sa mga agihan na garo namamasyar. Nagbareta sinda nin dakol na mararahay na pakikipag-olay.

³¹ Dakol na parahayag an nagbabareta nin mararahay na resulta mantang nagpapatotoo sa mga tawo sa pampublikong mga pasilidad sa paglaba. Dai sana sinda nagwawalat nin mga magasin kun mayong mga parokyano. An saindang pasohan iyo na paabotan an mga tawo kan maogmang bareta, kaya naghihingoa sindang kaolayon personalmente an mga naggagamit kan pasilidad.

³² Sa ibang lokalidad, an piniling mga parahayag igwang autorisasyon na magpatotoo sa mga aeropuerto. Paminsanminsan nagkaigwa sinda nin kagayagayahan na makapatotoo sa internasyonal na mga biahero na nag-iistar sa mga nasyon na didiit an bilang kan banwaan ni Jehova. Kun may nanonompongan na interes, nakapag-aalok sinda nin tract o mga magasin.

³³ Kun dai tinotogotan na magpatotoo personalmente sa mga nakaistar sa guardiadong marhay na mga apartment sa teritoryo kan kongregasyon, an iba ginibong ugale na magpatotoo nin mataktika sa mga guardia na nagtatrabaho o sa mga manedyer na nasa mga opisina. An kaagid na paagi ginagamit sa pribado, natatrangkahan na mga komunidad. An sarong paraataman sa sirkito asin an nagkapirang parahayag dinalaw an pitong grupo nin mga apartment sa paaging ini. Sa kada situwasyon, sinasabihan ninda an manedyer na dawa ngani dai sinda tinotogotan na dalawon an mga apartment sa parate niatong paagi, habo nindang malipasan nia an impormasyon sa pinakahuring mga babasahon. An mga manedyer sa gabos na pitong grupo nin mga apartment maogmang nag-ako kan mga magasin asin naghagad man para sa masunod na mga luwas! Dangan an mga residente sa grupo nin mga apartment na idto nakaolay paagi sa telepono.

³⁴ Maghingoa na Maghulit sa Gabos na Lugar: An pag-otob sa satong pagdusay kabale an pakamate nin pagkaapurado dapit sa asignasyon sa sato na maghulit kan mensahe kan Kahadean. Tangani na maabot an mga tawo sa oras na kombenyente sa sainda, kaipuhan niatong lingawan an satong personal na mga kagustohan tangani na ‘sa gabos na paagi ikaligtas niato an nagkapira.’ An gabos na nagdusay na lingkod ni Jehova boot na makapagsabi, siring ki apostol Pablo: “Ginigibo ko an gabos na bagay para sa kapakanan kan maogmang bareta, tanganing ikahiras ko iyan sa iba.”​—1 Cor. 9:​22, 23.

³⁵ Isinurat pa ni Pablo: “Kun siring, ogmahon pa akong maghambog kun dapit sa sakong mga kaluyahan, tanganing an kapangyarihan kan Cristo magdanay sa ibabaw ko na siring sa sarong tolda. . . . Huli ta kun ako maluya, dangan ako makosog.” (2 Cor. 12:​9, 10) Sa ibang pagtaram, mayo ni saro sa sato na makagigibo kan trabahong ini sa satong sadiring kosog. Kaipuhan kitang mamibi ki Jehova para sa saiyang makapangyarihan na banal na espiritu. Kun mamimibi kita sa Dios para sa kosog, makakokompiar kita na sisimbagon nia an satong mga pamibi. Dangan an satong pagkamoot sa mga tawo mapahiro sa sato na hanapon an mga oportunidad na ikahulit sa sainda an maogmang bareta, saen man sinda puedeng manompongan. Sa masunod na semana, taano ta dai probaran an saro sa mga suhestion na itinampok sa suplementong ini?