Hapot

◼ Kun hinahagad sa kongregasyon na tumabang sa pag-areglo nin seremonya sa lobong, puedeng lumataw an minasunod na mga hapot:

Siisay an maninigong magtao kan pahayag sa lobong? Desisyon ini na dapat gibohon kan mga miembro nin pamilya. Puede sindang pumili nin siisay man na bautisadong tugang na lalaki na may marahay na dangog. Kun hagadon sa grupo nin kamagurangan na magtao nin sarong espiker, sa parate mapili sinda nin sarong may kakayahan na magurang sa kongregasyon na magtao nin pahayag na basado sa outline kan Sosyedad.

Puede daw na gamiton an Kingdom Hall? Iyo, kun tumogot an grupo nin kamagurangan asin kun dai iyan makaeentremeter sa regular na nakaiskedyul na mga pagtiripon. Puedeng gamiton an hall kun may malinig na reputasyon an nagadan asin miembro kan kongregasyon o menor de edad na aki nin sarong miembro. Kun nagcausa nin maraot na dangog sa publiko an indibiduwal paagi sa paggawe na bakong sa Kristiano, puedeng magdesisyon an kamagurangan na dai itogot an paggamit kan hall.​—Helingon an librong Our Ministry, pahina 62-3.

Sa parate, dai ginagamit an mga Kingdom Hall para sa mga seremonya sa lobong nin mga daing pagtubod. Puedeng gumibo nin iksepsion kun an nabayaan na mga miembro kan pamilya aktibong nakikiasosyar bilang bautisadong mga parahayag, midbid kan nagkapirang parahayag sa kongregasyon an nagadan na oyon sa katotoohan asin igwa nin marahay na reputasyon sa komunidad, asin mayo nin kinabanon na mga kaugalean na kaiba sa programa. Mayo nin ano man na maninigong gibohon na bakong marahay sa pagheling kan kongregasyon o makaaati sa reputasyon kaiyan.

Kun itinotogot an paggamit kan Kingdom Hall, kokonsideraron kan kamagurangan kun baga linalaoman sono sa kaugalean na maheling na an lungon yaon sa seremonya sa lobong. Kun iyo, puede nindang togotan na ilaog iyan sa hall.

Kumusta man an seremonya sa lobong nin kinabanon na mga tawo? Kun may marahay na reputasyon sa komunidad an nagadan, an sarong tugang na lalaki puedeng magtao nin nakararangang pahayag sa Biblia sa punerarya o sa kataed kan lolobngan. Sasayumahan kan kongregasyon na asikasohon an seremonya sa lobong nin saro na midbid sa inmoral, bakong sono sa ley na paggawe o na an estilo nin pamumuhay kontra sa mga prinsipyo kan Biblia. An sarong tugang na lalaki siertong dai makikikabtang sa sarong klerigo sa pagkondukta nin seremonya nin iriba-ibang relihion ni sa ano pa man na seremonya sa lobong na ginigibo sa sarong iglesia nin Dakulang Babilonya.

Kumusta kun tiwalag an nagadan? Sa pankagabsan dai makikilabot an kongregasyon, ni na puedeng gamiton an Kingdom Hall. Kun an saro nagtatao na nin ebidensia nin pagsolsol asin nagpapaheling nin pagmawot na makabalik, an konsensia nin sarong tugang na lalaki puedeng tumogot sa saiya na magtao nin pahayag sa Biblia sa punerarya o sa kataed kan lolobngan, tangani na magtao nin patotoo sa mga daing pagtubod asin rangahon an mga paryente. Minsan siring, bago gibohon an desisyon na ini, madonong na konsultahon kan tugang na lalaki an grupo nin kamagurangan asin konsideraron an irinerekomendar ninda. Kun bakong madonong na makilabot an tugang na lalaki na iyan, tibaad angay na sarong tugang na lalaki na miembro kan pamilya kan nagadan an magtao nin pahayag tangani na rangahon an mga paryente.​—Helingon an The Watchtower na Oktubre 15, 1990, pahina 30-1; An Torrengbantayan na Abril 1, 1982, pahina 17 [w81-E 9/15, p. 31]; asin an The Watchtower na Hunyo 1, 1977, pahina 347-8.