Enoton an Orog na Mahalagang mga Bagay
1 Ano an nagkapirang importanteng bagay na mahalagang marhay sa satong espirituwal na ikararahay? Siertong kabale digdi an personal na pag-adal, pag-atender sa pagtiripon, daing ontok na pamibi, marahay na pakikiasosyar, asin Kristianong ministeryo. Dai niato mamamantener an marahay na espirituwal na salud kun dai pagdadanayon na enot sa satong buhay an importanteng mga bagay.
2 Minsan siring, kita gabos igwa nin pakikipaglaban tumang sa makalaman na mga horot asin may pangangaipo nin disiplina. (Gal. 5:17) Nungka na maninigong magin saboot niato na dakol pa an makakamtan paagi sa pag-aaabot sa paslong mga interes. (Jer. 17:9) Kun siring, tanganing maprotehiran niato an satong puso asin malikayan na malagalag, importante an regular na pagsiyasat sa sadiri.—Tal. 4:23; 2 Cor. 13:5.
3 Siyasaton an Saindo Mismong Puso: Magigibo nindo ini paagi sa nagkapirang prangkang hapot sa saindong sadiri: Naghihidaw daw ako na basahon an Tataramon nin Dios? (1 Ped. 2:2) Inaapresyar ko daw an kahalagahan kan pag-atender sa gabos na pagtiripon kan kongregasyon? (Heb. 10:24, 25) Nagmamaigot daw ako sa pamimibi? (Roma 12:12) Hinihingoa ko daw na makiiba sa mga tawong may espirituwal na kaisipan? (Roma 1:11, 12) Nakamamate daw ako nin personal na obligasyon na ipahayag an maogmang bareta? (1 Cor. 9:16) An positibong mga simbag magpapaheling na kamo nagmamawot na enoton an orog na mahalagang mga bagay.
4 Siyasaton an Saindong Aroaldaw na Kaugalean: Kaipuhan nindong kultibaron an pagsiyasat kan mga mawot kan saindong puso paagi sa pag-establisar nin mga prioridad sa paggamit nin panahon. Kabale digdi an pag-iskedyul nin regular na panahon para sa pagbasa kan Biblia asin kan kada isyu kan An Torrengbantayan asin Awake!, siring man an pag-andam para sa mga pagtiripon. Dapat man na magtagama nin panahon para sa pamilya kapwa sa pag-adal asin sa iribang pamimibi. Magbugtak nin limitasyon kun gurano kadakol na panahon an gagamiton sa atubangan kan TV o komputer. Magin determinadong umatender sa gabos na pagtiripon kan kongregasyon, asin ipaorog an pag-atender sa pagtiripon. Magplano na makikabtang an bilog na pamilya sa paglilingkod sa langtad kada semana.
5 Daing duwa-duwa, an pag-enot sa orog na mahalagang mga bagay sa satong buhay mapatutunayan na sarong dahelan nin kagayagayahan.