Mga Pag-adal sa Biblia na Nagbubunga nin mga Disipulo
1 “Ano an nakaoolang sako na mabautismohan?” an hapot kan kapon na Etiope pakatapos na si Felipe ‘magpahayag sa saiya kan maogmang bareta manongod ki Jesus.’ (Gibo 8:27-39) Sa situwasyon kan kapon, igwa na sia nin pagkamoot sa ipinasabong na mga surat nin Dios, asin pakaako nin espirituwal na tabang gikan ki Felipe, andam na siang magin sarong disipulo. Alagad bakong gabos na tawo kombensido na kaipuhan ninda mismong siyasaton an Kasuratan.
2 Makaoogma nanggad, itinao kan organisasyon ni Jehova an brosyur na, Ano an Kahagadan sa Sato nin Dios?, tanganing enkaminaron an mga tawo na siyasaton ninda mismo an mensahe kan Biblia. Sa pira sanang halipot na pahina, dakol an manonodan nin mga tawo dapit sa Kasuratan. Siring man, sa Leksion 15 asin 16 tinatabangan sinda kaiyan na masabotan an kahagadan sa sainda nin Dios. An magayon na instrumentong ini dinisenyo tanganing motibaron an mga tawo sa laog nin halipot na panahon na gumibo nin mga aksion na mapaogma si Jehova.
3 Kun mapoon nin pag-adal sa Biblia, makatatabang na repasohon an ekselenteng mga suhestion na ipinublikar sa suplemento kan Hunyo 1996 na An Satong Ministeryo sa Kahadean kun paano makakokondukta nin mabungang pag-adal sa librong Kaaraman. Durante kan pag-adal, konsideraron an pag-oswag kan estudyante tanganing madeterminaran nindo kun arin na mga kabtang an nangangaipo nin dugang pang atension. Enkaminaron an estudyante na andamon nin patienot an saiyang mga leksion, na hinahanap an mga teksto. An mga komento sa saiyang sadiring pananaram puedeng magpabanaag kan saiyang odok sa pusong pag-apresyar sa katotoohan. Parateng marikas na nag-ooswag an mga nagbabasa man kan mga publikasyon kan Sosyedad asin regular na nag-aatender sa mga pagtiripon kan kongregasyon. Enkaminaron sia na magtaram nin impormal sa iba dapit sa saiyang nanonodan. Maboot na ipaheling sa saiya kun ano an kaipuhan niang gibohon tanganing umoswag sa espirituwal. Dai kita maninigong padagos na sanang magkokondukta nin mga pag-adal sa mga bakong desidido. An mga estudyante maninigong boluntad na mag-adal, marigon na manindogan para sa katotoohan, asin umoswag pasiring sa pagdusay asin bautismo.
4 Sa nagkapirang pamilya, labi sa sarong pag-adal an kinokonduktahan, huling an laen-laen na miembro kan pamilya may separadong mga pag-adal. Minsan siring, an pagkaigwa nin sararong pampamilyang pag-adal tibaad mas marahay sa kadaklan na situwasyon, huling matabang iyan na pagsararoon an pamilya sa espirituwal.
5 An pagboot ni Jesus iyo na kita gumibo nin mga disipulo. (Mat. 28:19) Tanganing magibo iyan, dapat kitang magkondukta nin mga pag-adal sa Biblia na nakatatabang sa iba na umoswag sagkod sa punto na tibaad maghapot sinda, “Ano an nakaoolang sako na mabautismohan?”