Dagkahon an mga Inaadalan sa Biblia na Umoswag
1 Sa mga Ebanghelyo an terminong “disipulo” aplikado sa mga bako sanang minatubod sa mga katokdoan ni Cristo kundi nagkukuyog man nin maingat dian. (Mat. 28:19, 20) Nasasabotan daw ini nin mga inaadalan sa Biblia? Paano niato sinda madadagka na umoswag sa pagigin mga disipulo?
GIYAHAN AN INTERES SA ORGANISASYON
2 An pag-oswag kan inaadalan konektado nanggad sa saiyang pag-apresyar sa organisasyon ni Jehova. Kun siring, paninimbagan niato bilang mga paratokdo na giyahan an interes kan inaadalan sa organisasyon nin Dios. Sa dakol nang taon sinasadol kita na gumamit nin singko o dies minutos sa kada pag-adal na ipaliwanag an sarong bagay manongod sa organisasyon. An pulyetong An mga Saksi ni Jehova—Sararong Nag-ootob sa Kabotan nin Dios sa Bilog na Kinaban marahayon para sa katuyohan na ini. Igwa daw nin kopya an inaadalan nindo sa Biblia? Kun mayo, siertohon na magkaigwa tolos sia. Sadolon siang basahon iyan, asin ipaliwanag na pag-oolayan nindo an halipot na kabtang kaiyan sa kada pag-adal.
3 An impormasyon sa pahina 14 asin 15 kan pulyetong Nag-ootob sa Kabotan nin Dios nagpaparigon sa apresasyon sa kada saro kan mga pagtiripon kan kongregasyon. Taano ta dai pag-olayan an saro o duwang parapo kada semana? Ipaliwanag kun paano an kada pagtiripon nakapagpapanigo sa sarong partikular na pangangaipo. Dagkahon sia nin mainit na umiba sa sato sa Kingdom Hall tanganing personal na maeksperyensiahan an pagkasararo asin pagkamoot sa tahaw kan tiripon na banwaan ni Jehova.—Sal. 133:1; Juan 13:35.
PUKAWON AN ESPIRITUWAL NA PAG-OSWAG
4 An mga bagohan kaipuhan na mag-adal, umoswag sa kaaraman asin pag-aplikar kan Tataramon nin Dios. Sa dahelan na ini ipagpapadagos niato an pag-adal sa Mabuhay Sagkod Lamang asin United in Worship minsan nagpabautismo na an satong inaadalan bago matapos an mga publikasyon na ini. Maninigo man na ipaliwanag niato an halaga nin pagkaigwa nin suskripsion sa Torrengbantayan asin Awake! asin pagkua nin iba pang publikasyon kan Sosyedad tanganing masubaybayan an “kakanon sa igong panahon.” (Luc. 12:42) An mga naggigibo kaiyan magkakagamot, magigin marigon, asin magigin masarig sa pagtubod.—Col. 2:7.
5 Kaipuhan nin mga inaadalan sa Biblia an satong tabang tangani sindang magtalubo sa pagkamaygurang. (Heb. 5:14) Maninigo kitang magtao nin komendasyon tanganing madagka an pag-oswag. (Fil. 3:16) Ihinihiras na daw nia sa mga kapamilya asin kamidbid an mga nanonodan nia? Kun sia kuwalipikado, nag-ayon na daw sia sa Teokratikong Paadalan sa Pagmiministro? Boot daw niang magin parahayag?
6 Dai noarin man paglingawan an puwersa nin pamibi para sa mga inaadalan sa Biblia. Arangon ki Jehova na giyahan sindang humiro. (1 Cor. 3:6, 7) Sinda logod gumibo nin desididong aksion na makiasosyar sa kongregasyon asin sa siring makadugang sa pag-omaw sa ngaran ni Jehova.